Ndi ama etịn̄ enyịn okot mme Enyọn̄-Ukpeme ndondo emi? Ọfọn, se ise m̀mê emekeme ndibọrọ mme mbụme oro ẹtienede mi:

Ndi akpana mme Christian ẹsibọn̄ akam ẹnọ Jesus Christ?

Ihih. Jesus ekekpep nnyịn ete isibọn̄ akam inọ Jehovah. Enye ke idemesie ekesibọn̄ akam ọnọ Jehovah. (Matt. 6:6-9; John 11:41; 16:23) Ntem, mbet Jesus ẹkesibọn̄ akam ẹnọ Abasi, ibọn̄ke inọ Jesus. (Utom 4:24, 30; Col. 1:3)—1/1, page 14.

Nso ke Ikpesinam Kpukpru Isua ke Ini Itịmde Idem Inọ Editi?

N̄kpọ kiet emi ikpanamde edi ndisikot mme itien̄wed Abasi oro ẹwetde ke n̄wed Ẹdụn̄ọde N̄wed Abasi ke Usen ke Usen, emi ẹsidọhọde ikot ke ini Editi. Imekeme n̄ko ndibiere ndikwọrọ ikọ n̄kan nte isikwọrọde. N̄kpọ en̄wen edi ndikere m̀mê Abasi oyom nnyịn idu uwem ke m̀mọ̀n̄—ke heaven m̀mê ke isọn̄?—1/15, page 14-16.

Nso iketịbe inọ nditọ Egypt iba emi ẹketịn̄de ndap ẹnọ Joseph ke ufọk-n̄kpọkọbi?

Joseph ama ọdọhọ akama-cup Pharaoh ke ẹyefiak ẹda enye akanam utom esie. Ke ini asan̄uyo eketịn̄de ndap esie, Joseph ama ọdọhọ enye ke ndap esie ọwọrọ ke Pharaoh oyowot enye eyịri ke eto. Se ikonyụn̄ itịbede inọ mmọ mbiba edi oro. (Gen. 40:1-22)—2/1, page 12-14.

Nso ke ẹkenọ nditọete ke Japan emi mmọ mîkodorike enyịn?

Ẹma ẹsio n̄wed Matthew ke Edikabade Eke Obufa Ererimbot ẹfiak ẹmịn̄ nte ekpri n̄wed. Ẹsinọ mme owo n̄wed emi ke an̄wautom, ndien ediwak mbon emi mîkwe Bible akpa ẹma enye etieti.—2/15, page 3.

Nso ye nso ikanam ẹkeme ndikwọrọ eti mbụk ke eyo mme apostle?

Emem ama odu ke ofụri Obio Ukara Rome ke eyo mme apostle. Nti usụn̄ ama odu, ntre ikọsọn̄ke mme mbet ndika isan̄. Ata ediwak owo—esịnede mme Jew—ẹma ẹdiọn̄ọ usem Greek, ntre mme mbet ẹma ẹda usem emi ẹkwọrọ ikọ. Ibet Rome ama ọnọ mme mbet unen ndikwọrọ eti mbụk.—2/15, page 20-22.

Ntak emi mme ata Christian mîsidiaha Easter?

Jesus ọkọdọhọ mbet esie ẹsiti n̄kpa imọ, ikọdọhọke ẹsiti ediset ke n̄kpa imọ. (Luke 22:19, 20)—3/1, page 8.

Ntak emi nnyịn mîwakke ndiwet n̄kpọ mban̄a ndamban̄a n̄kpọ ye ata idem n̄kpọ ke n̄wed nnyịn nte ikesiwetde ini akpa?

Enyene mme owo emi Bible ọdọhọde ke ẹda ẹban̄a owo en̄wen m̀mê n̄kpọ en̄wen. Uwụtn̄kpọ kiet edi iban iba emi apostle Paul etịn̄de aban̄a ke Galatia 4:21-31. Edi edieke Bible mîtịn̄ke se owo m̀mê se n̄kpọ adade aban̄a, ufọn idụhe nditie n̄kere m̀mê ada aban̄a nso. Nte ededi, imekeme nditie n̄kere se mbụk m̀mê mme owo ke Bible ẹkpepde nnyịn. (Rome 15:4)—3/15, page 17-18.

Ntak emi ikpan̄wed emi ẹkefiọhọde ke itie uduọn̄ọ mbio ke Egypt enyenede ufọn ọnọ nnyịn mfịn?

Ke n̄kpọ nte isua ikie emi ẹkebede, ẹma ẹfiọhọ mbai ikpan̄wed emi ẹkewetde ndusụk se idude ke Gospel John. Etie nte ekedi apostle John ewet n̄wed John ama, n̄kpọ nte isua ifan̄ ẹkebe, owo en̄wen osion̄o ndusụk se enye ekewetde ewet ke n̄wed en̄wen.—4/1, page 10-11.

Ntak Emi Ndisio Anamidiọk Mfep ke Esop Owụtde ke Ẹma Enye?

Bible asiak nsio nsio n̄kpọ emi edide owo akpanam ẹsio enye efep ke esop. Ndisio owo mfep ke esop esinyene ufọn. (1 Cor. 5:11-13) Esinam ẹkpono enyịn̄ Jehovah, isiyakke ẹsabade esop Christian, esinyụn̄ anam enyịn an̄wan̄a anamidiọk.—4/15, page 29-30.