O bau wilika vinaka na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

Dodonu meda masu vei Jisu Karisito na lotu vaKarisito?

Sega. E vakavulici keda o Jisu meda masu vei Jiova, e biuta e dua na ivakaraitaki o Jisu meda masuta na Tamana. (Maciu 6:6-9; Joni 11:41; 16:23) Era dau masu vua na Kalou na nona imuri taumada, era sega ni masu vei Jisu. (Caka. 4:24, 30; Kolo. 1:3)​—1/1, tabana e 14.

Eda na vakavakarau vakacava nida vakananuma na mate i Jisu ena veiyabaki?

Meda muria na ituvatuva ni wili iVolatabu me baleta na ivakananumi. E rawa tale ga nida vakarabailevutaka noda cakacaka vakaitalatala. Meda vakasamataka da qai masulaka noda inuinui soli vakalou.​—1/15, tabana e 14-16.

Na cava e yaco vei rau na kai Ijipita rau tukuna nodrau tadra vei Josefa?

E tukuna o Josefa vei koya e dau liutaki ira na kauta na mena na tui ni na vakasukai ena nona cakacaka e liu. Na nona tadra o koya na dauvavavi e dusia ni na vakamatei koya o Fero qai vakalilici ena kau. E yaco dina na ka e tukuna o Josefa. (Vkte. 40:1-22)​—2/1, tabana e 12-14.

Na iloloma duatani cava era taura na mataveitacini e Japani?

Era taura e dua na ivola e tiko kina na Kosipeli i Maciu e yavutaki mai na ivakadewa vakaivolatabu ni New World Translation. E veisoliyaki ena cakacaka vakaitalatala, era marautaka tale ga e levu era sega ni kila na iVolatabu.​—2/15, tabana e 3.

Na ituvaki cava soti ena imatai ni senitiuri e veivuke ena kena vakatetei na itukutuku vinaka?

Na sautu e Roma e vakatokai na Pax Romana e vakalailaitaka na veiraravui. Era vakayagataka vinaka na tisaipeli taumada na gaunisala vinaka. E vakayagataki na vosa vaKirisi e kilai raraba, e vakatetei kina na itukutuku vinaka, vei ira mada ga na Jiu era veituyaki ena veivanua e qali vakaRoma. Era vakayagataka na tisaipeli na lawa vakaRoma mera taqomaka kina na itukutuku vinaka.​—2/15, tabana e 20-23.

Na cava era sega ni solevutaka kina na lotu vaKarisito na nona vakaturi o Jisu se na Easter?

O Jisu e dusimaki ira nona imuri mera vakananuma nona mate, sega ni nona vakaturi. (Luke 22:19, 20)​—3/1, tabana e 8.

Ena vica tiko ga na yabaki qo, na cava sa sega ni veivosakitaki kina ena noda ivola na kena wasei rua na kilai ni itukutuku vakaivolatabu?

E kaya na iVolatabu ni so na dauveiqaravi era vakatakarakarataka e dua na ka e levu cake. Kena ivakaraitaki na Kalatia 4:21-31. E vinaka meda kua ni vakasamataka se meda kaya na ka e rawa ni vakaibalebaletaka. Ia meda raica ga na ka eda rawa ni vulica vei ira na volai ena iVolatabu kei na itukutuku vakaivolatabu. (Roma 15:4)​—3/15, tabana e 17-18.

Na cava e talei kina na ivovo ni ivolavivigi e kunei ena ibenubenu mai Ijipita?

Ena senitiuri sa oti, eso na tikinivolatabu mai na Kosipeli i Joni e kune ena tikitiki ni ivola qori. De dua e volai ni mate oti ga o Joni ena ikarua ni senitiuri G.V., ia e tautauvata vinaka kei na ka eda wilika nikua ena noda iVolatabu, qai vakadeitaka na kena nuitaki.​—4/1, tabana e 10-11.

Na cava e ka vakayalololoma kina na nona vakasivoi o koya e sega ni veivutunitaka na nona cala?

E vakaraitaka na iVolatabu na ikalawa bibi ni veivakasivoi kei na kena yaga. (1 Kor. 5:11-13) E dokai kina na yaca ni Kalou, taqomaka na savasava ni ivavakoso, me rawa ni kilaiyalona tale kina o koya e cala.​—4/15, tabana e 29-30.