Ko a tia ni wareki raoi kaongora man Te Taua-n-Tantani n taai aika tibwa nako? Noria ngkana ko kona ni kaekai titiraki aikai:

A riai Kristian n tataro nakon Iesu Kristo?

A aki. E reireinira Iesu arora n tataro nakon Iehova ao e kaota te katoto n arona n tataro nakon Tamana. (Mat. 6:6-9; Ioa. 11:41; 16:23) N aron anne, a tataro taan rimwina rimoa nakon te Atua ao tiaki nakon Iesu. (Mwa. 4:24, 30; IKoro. 1:3)—1/1, iteraniba 14.

Tera ae ti na katauraoia ni katoa ririki imwaini kauringani maten Iesu?

Ti riai n irira te wareware n te Baibara are e a tia ni baireaki ibukin te tai anne. Ti kona naba ni kakorakoraira ni karababaa ara mwakuri ni minita n te namwakaina anne. Ao ti kona n iaiangoa ao n tataroa te kantaninga are e anganira te Atua.—1/15, iteraniba 14-16.

Tera nanoni mii aika kaminonano iroun Ioteba, ake a miia uoman buure aika I-Aikubita?

E tuangaki te tia taraa nimani Barao iroun Ioteba bwa e na kaokaki nakon nakoana rimoa. Ao ibukin te tia umum, e nanonaki iai ae e na kamateaki irouni Barao ao ni katineaki n te kai. A kakoroaki raoi nanoni mii akanne. (KBwaai. 40:1-22)—2/1, iteraniba 12-14.

Tera te bwaintangira ae kamimi are a anganaki taari i Tiaban?

A anganaki te boki ae uarereke ae kanoan te boki ae Mataio man te Rairai ae te Aonnaba ae Boou. E kabonganaaki ngkai n te uarongorongo ao a bati aika butimwaeia ake a aki taneiai ma te Baibara.—2/15, iteraniba 3.

Baikara bwaai aika riki n te moan tienture ake a buoka kabutaan te rongorongo ae raoiroi?

Ni kamatoaan te tua ae te Pax Romana, e a karako riki iai te aki boonnano. A kona taan rimwini Kristo rimoa ni kabonganai kawai aika aoraoi ao a mwangaanga nako. E taabangaki kabonganaan te taetae ni Kuriiti, e nakoraoi iai te uarongorongo ao e buta naba nakoia I-Iutaia ake a maeka n aonon te embwaea. Ao a kabongana te tua n te tautaeka n Rom taan rimwin Kristo, ni boutokaa iai te rongorongo ae raoiroi.—2/15, iteraniba 20-23.

E aera bwa a aki bukamarua te Itita Kristian ni koaua?

E bon tua Iesu nakoia taan rimwina bwa a na kauringa matena ao tiaki mangautina. (Ruka 22:19, 20)—3/1, iteraniba 8.

E aera bwa n ririki aika tibwa nako, a aki rangi n tataekinaki n ara boki banna ao kaikonakani banna aika n te Baibara?

E taekinaki n te Baibara bwa iai tabeman aika a riki bwa banna ibukin te bwai ae kakawaki riki. Iai te katoto teuana n I-Karatia 4:21-31. Ma e kakawaki bwa ti na aki iangoia n taekini bwaai ake a kaikonakaki. Ma ti kona ni karekea reireiara mairouia aomata akanne ao bwaai aika riki n te Baibara. (IRom. 15:4)—3/15, iteraniba 17-18.

Bukin tera bwa e kakawaki kunean tabeua mwakorokoroni beeba rimoa aika te papyrus, n te bwariko ni maange i Aikubita?

A tia ni kuneaki tabeua beeba ae aron akanne ma kanoan ana Euangkerio Ioane n te tienture ae nako. A bae ni koreaki n te tai ae rangi ni maan tao tatabebwi te ririki n nako imwini korean te boki aei iroun Ioane, ao a kamatoaaki koroboki ake i nanona ibukira ni boong aikai, are e a katuruturuaki iai onimakinan te Baibara.—4/1, iteraniba 10-11.

Bukin tera bwa kabanean te tia bure ae aki raraoma man te ekaretia bon te babaire ae tatangira?

E kaotaki te babaire ae kakawaki n te Baibara ibukini kabanean temanna n te ekaretia ae kona n anga mwina aika raoiroi. (1 Kor. 5:11-13) E karineaki iai aran te Atua, e kamanoaki itiakin te ekaretia ao e kona ni kaoka ana iango te tia bure.—4/15, iteraniba 29-30.