Binasayo kadi a naimbag dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

Rumbeng kadi nga agkararag dagiti Kristiano ken Jesu-Kristo?

Saan. Insuronatayo ni Jesus nga agkararag ken Jehova, ken inyulidanna ti panagkararag iti Amana. (Mat. 6:6-9; Juan 11:41; 16:23) Gapuna, dagiti nagkauna a pasurotna nagkararagda iti Dios, saan ket a ken Jesus. (Ara. 4:24, 30; Col. 1:3)—1/1, panid 14.

Ania ti mabalin nga aramidentayo kada tawen kas panagsagana iti pananglaglagip iti ipapatay ni Jesus?

Ti maysa nga aramidentayo ket ti panangsurot iti eskediul ti panagbasa iti Biblia mainaig iti dayta nga okasion. Mabalin met a mangbusbostayo iti ad-adu a tiempo iti ministerio. Ken nasayaat nga ikararag ken mennamennaentayo ti namnama nga inted ti Dios kadatayo.—1/15, panid 14-16.

Ania ti nagbanagan ti dua a balud nga Egipcio a nangestoria ken Jose iti makariribuk a tagtagainepda?

Imbaga ni Jose iti agaw-awit iti kopa ni Faraon a maisublinto iti akemna. No maipapan iti panadero, imbagana nga ibilin ni Faraon a mapapatay sa maibitay iti kayo. Agpada a pimmudno dagita. (Gen. 40:1-22)—2/1, panid 12-14.

Ania a sorpresa a sagut ti naawat dagiti kakabsat iti Japan?

Nakaawatda iti libro a naglaon iti Ebanghelio ni Mateo manipud iti New World Translation. Maipapaima dayta iti ministerio, ken inawat dayta ti adu a tattao a saan unay a pamiliar iti Biblia.—2/15, panid 3.

Ania dagiti kasasaad idi umuna a siglo a nakatulong tapno maisaknap ti naimbag a damag?

Babaen iti Pax Romana, nataltalna ti kasasaad. Dagiti nagkauna nga adalan nakapagdaliasatda kadagiti napagkakamang a nasayaat a kalsada. Nasaknap met a maus-usar ti lengguahe a Griego, a nakatulong iti panangasaba uray kadagiti Judio a nagnaed iti nadumaduma a lugar a sakup ti imperio. Nakatulong pay kadagiti adalan ti linteg ti Roma tapno maidepensada ti panangikasaba iti naimbag a damag.—2/15, panid 20-23.

Apay a saan a selselebraran dagiti pudno a Kristiano ti Easter?

Imbilin ni Jesus kadagiti pasurotna a laglagipenda ti ipapatayna, saan a ti panagungarna. (Luc. 22:19, 20)—3/1, panid 8.

Iti nabiit pay a tawtawen, apay a sagpaminsan laengen a madakamat kadagiti publikasiontayo dagiti salaysay iti Biblia ken ti simboliko a kaipapanan wenno dakdakkel a kaitungpalanda?

Adda dagiti indibidual a nadakamat iti Biblia nga adda dakdakkel nga iladladawanda iti masanguanan. Ti maysa a pagarigan ket mabasa iti Galacia 4:21-31. Ngem no awan ti ibaga ti Biblia, nasaysayaat no ditay ipapan nga adda dakdakkel nga iladladawan ti maysa a salaysay ti Biblia. Ngem makasursurotayo kadagiti indibidual ken salaysay a nadakamat iti Biblia. (Roma 15:4)—3/15, panid 17-18.

Apay a paginteresantayo ti maysa a pirsay a papiro a nasarakan iti bunton ti basura iti Egipto?

Iti napalabas a siglo, adda nasarakan a pirsay a papiro a naglaon iti dadduma a paset ti Ebanghelio ni Juan. Mabalin a naisurat dayta sumagmamano a dekada kalpasan nga insurat ni Juan ti librona, ket ti linaonna patalgedanda nga umiso ti mabasbasatayo ita a mangipakita a mapagtalkan ti Biblia.—4/1, panid 10-11.

Apay a naayat nga urnos ti panangilaksid iti maysa a nakabasol a saan nga agbabawi?

Dinakamat ti Biblia ti urnos mainaig iti panangilaksid a pakagunggonaantayo. (1 Cor. 5:11-13) Maidaydayaw ti nagan ti Dios, agtalinaed a nadalus ti kongregasion, ken mabigbig ti maysa ti kinadagsen ti basolna.—4/15, panid 29-30.