Nũsomete nesa makaseti ma Mũsyaĩĩsya ala mela kuma? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Aklĩsto nĩmaĩle kũmũvoya Yesũ Klĩsto?

Aiee. Yesũ atũmanyĩisye kũmũvoya Yeova, na we mwene nĩweekaa ũu nũndũ amũvoyaa Ĩthe. (Mt. 6:6-9; Yoa. 11:41; 16:23) Nĩkyo kĩtumi aatĩĩi make ma mbee mavoyaa Ngai, ĩndĩ ti ũ Yesũ. (Meko 4:24, 30; Ako. 1:3)—1/1, ĩthangũ ya 14.

Nĩ kyaũ twaĩle kwĩkaa kĩla mwaka nĩ kana twĩyũmbanĩsye kũlilikana kĩkw’ũ kya Yesũ?

Ũndũ ũmwe tũtonya kwĩka nĩ kũatĩĩa nesa mũvango wa kũsoma Mbivilia ũla twĩthĩawa tũnengetwe ĩvindanĩ yĩu. Ũndũ ũngĩ tũtonya kwĩka ĩvindanĩ yĩu nĩ kũtata twongele ĩvinda yĩla tũtũmĩaa ũthũkũminĩ witũ. Na ĩngĩ no tũvoye na tũisũanĩa mũno ĩũlũ wa wĩkwatyo ũla Ngai ũtũnengete.—15/1, ĩthangũ ya 14-16.

Ala avungwa elĩ ma Misili matavisye Yosevu ndoto syoo mesie kwĩkanwa namo ata?

Yosevu atavisye ũla wanengae Valao mbinyu kana akatũngwa wĩanĩ wake. Ĩndĩ ũla wauaa mĩkate eeiwe ndoto yake yoonanasya kana Valao akamũaa na aimwamba mũtĩnĩ. Maũndũ maendie o ũndũ Yosevu wawetete. (Mwa. 40:1-22)—1/2, ĩthangũ ya 12-14.

Ana-a-asa ma Japan makwatie mũthĩnzĩo wĩva wa mwanya?

Makwatie kavuku ke na ũvoo wa Mathayo o tondũ ũandĩkĩtwe Mbivilianĩ ya Tafsiri ya Ulimwengu Mpya. Ana-a-asa asu nĩmanenganae kavuku kau ũtavany’a, na nĩketĩkĩlĩtwe nĩ andũ aingĩ o na matesĩ Mbivilia nesa.—15/2, ĩthangũ ya 3.

Nĩ maũndũ meva maĩ ĩvinda ya atũmwa ala matumie ũvoo mũseo ũnyaĩĩka mũno?

Nũndũ Mũuo wa Lomi (Pax Romana) wekalile kwa ĩvinda ĩasa, kĩsio kĩla kyasumbĩkĩtwe nĩ Lomi kĩyaĩ na ithokoo mbingĩ. Kwaĩ malelũ maingĩ na maseo ala maĩ matonya kũtũmĩwa nĩ amanyĩw’a. Nakyo Kĩkiliki nĩkyo kyatũmĩawa nĩ aingĩ, na kwoou yaĩ laisi kũtavya andũ aingĩ ũvoo, vamwe o na Ayuti ala manyaĩĩkĩte ũsumbĩnĩ ũsu wa Lomi. Na ĩndĩ amanyĩw’a maĩ matonya kũtũmĩa mĩao ya Lomi nĩ kana mokitĩe ũvoo mũseo.—15/2, ĩthangũ ya 20-23.

Nĩkĩ Aklĩsto ma w’o matatanĩaa sikũkũ ya Isita?

Yesũ eeaĩe aatĩĩi make malilikanae kĩkw’ũ kyake, ĩndĩ ti ũthayũũkyo wake. (Luka 22:19, 20)—1/3, ĩthangũ ya 8.

Mbona matukũ aa mavuku maitũ maielesya ngewa sya Mbivilia maikothaa kũweta kyuu na kĩla kya w’o?

Mbivilia nĩwetaa kana andũ amwe maĩ syuu sya maũndũ angĩ manenange. Ngelekany’o ĩmwe ya syuu yĩ ĩandĩkonĩ ya Akalatia 4:21-31. Ĩndĩ o na vailyĩ ũu, ti ũseo mavinda onthe kũmanthĩthya syuu Maandĩkonĩ. Ĩla tũũsoma ĩũlũ wa andũ kana maũndũ ala mawetetwe Mbivilianĩ, no tũmanthe nĩ kyaũ tũtonya kwĩmanyĩsya ngewanĩ isu. (Alo. 15:4)—15/3, ĩthangũ ya 17-18.

Nĩkĩ twaĩle kwendeew’a mũno nĩ kalungu ka ĩkangaa kala keethĩiwe ĩvumbunĩ ĩnene ya takataka ya tene nthĩ ya Egypt?

Myakanĩ ya 1900, ve kalungu koonekie ke na ilungu imwe sya ĩvuku ya Ũvoo Mũseo wa Yoana. Kalungu kau nĩkatonya kwĩthĩwa kaseũviw’e myaka mĩongo yĩana ũna ĩtina wa Yoana kũandĩka ĩvuku yĩu yake. Ũvoo ũla wĩ kalungunĩ kau nũtũĩkĩĩthasya kana ĩvuku yĩla twĩ nayo ya Yoana nĩ ya w’o, na kana o nayo Mbivilia nĩ ya w’o.—1/4, ĩthangũ ya 10-11.

Nĩkĩ kũtenga mwĩki wa naĩ ũtekwenda kwĩlila nĩ nzĩa ya kwonany’a wendo?

Mbivilia nĩeleetye ĩũlũ wa mũvango wa kũtenga andũ. Kũtenga andũ nĩ ũndũ ũte wa ngũĩ na nũtonya kũtethya mũno. (1 Ako. 5:11-13) Mũvango ũsu nũtumaa ĩsyĩtwa ya Ngai yĩtaĩwa, ũkasũvĩa kĩkundi kĩikavukw’e, na no ũtume mwĩki wa naĩ avindũka kĩlĩko.—15/4, ĩthangũ ya 29-30.