Hihi nĩ ũthomete na kinyi icunjĩ cia ica ikuhĩ cia Mũrangĩri? Ta rora kana no ũhote gũcokia ciũria ici:

Hihi Akristiano nĩ magĩrĩirũo nĩ kũhoya Jesu Kristo?

Aca. Jesu aatũrutire tũhoyage Jehova, na akĩiga kĩonereria na njĩra ya kũhoya Ithe. (Mat. 6:6-9; Joh. 11:41; 16:23) Arũmĩrĩri a Jesu a tene maahoyaga Ngai no ti Jesu. (Atũm. 4:24, 30; Kol. 1:3)—1/1, karatathi ga 14.

Nĩ maũndũ marĩkũ tũngĩka o mwaka tũkĩĩharĩria nĩ ũndũ wa gĩkuũ kĩa Jesu?

Ũndũ ũmwe nĩ kũrũmĩrĩra mũtaratara wa ũthomi wa Bibilia wa Kĩririkano. Ningĩ no tuongerere ũtungata witũ. Na no twĩcũranie na njĩra ya mahoya ũhoro wa kĩĩrĩgĩrĩro kĩrĩa Ngai atũheete.—1/15, karatathi ga 14-16.

Gwathire atĩa harĩ ohwo erĩ a Misiri arĩa maatarĩirie Jusufu iroto ciao iria ciamathumbũraga?

Jusufu eerire muohwo ũrĩa watwaragĩra Firauni gĩa kũnyua atĩ nĩ angĩacokirio wĩra-inĩ ũcio. Nake ũrĩa wamũthondekagĩra mĩgate akĩmwĩra atĩ nĩ angĩoragirũo nĩ Firauni na acuurio mũtĩ-inĩ. Ũtaũri wa iroto icio cierĩ nĩ wahingire. (Kĩam. 40:1-22)—2/1, karatathi ga 12-14.

Aarĩ na ariũ a Ithe witũ a Japani maaheirũo kĩheo kĩrĩkũ kĩa magegania?

Nĩ maacabĩirũo kabuku ka ibuku rĩa Mathayo kuuma thĩinĩ wa Bibilia ya New World Translation. Nĩ marakaheana ũtungata-inĩ na nĩ karamũkĩrũo wega nĩ andũ aingĩ arĩa matoĩ maũndũ maingĩ ma Bibilia.—2/15, karatathi ga 3.

Nĩ maũndũ marĩkũ maatũmire ũhoro ũrĩa mwega ũthereme karine-inĩ ya mbere?

Nĩ ũndũ wa thayũ wa Roma kana Pax Romana gũtiakoragwo na ngũĩ. Tondũ kwarĩ na barabara nyingĩ njega, Akristiano a tene nĩ maahotaga gũthiĩ kũndũ na kũndũ. Rũthiomi rwa Kĩngiriki nĩ rwahũthagĩrũo kũndũ kũingĩ, ũndũ ũrĩa wahũthirie wĩra wa kũhunjia, nginya kũhunjĩria Ayahudi arĩa maaikaraga kũrĩa guothe gwathamakagwo nĩ Roma. Ningĩ Akristiano a tene nĩ mangĩahũthĩrire watho wa Roma kũgitĩra ũhoro ũrĩa mwega.—2/15, karatathi ka 20-23.

Akristiano a ma magaga gũkũngũĩra Ista nĩkĩ?

Jesu eerire arũmĩrĩri ake maririkanage gĩkuũ gĩake no ti kũriũka gwake. (Luk. 22:19, 20)—3/1, karatathi ga 8.

Nĩkĩ mĩaka-inĩ ya ica ikuhĩ nĩ maita manini mabuku maitũ makoretwo makĩrutana atĩ mũndũ kana kĩndũ kĩna nĩ kĩĩruru kĩa ũndũ ũngĩ ũgooka?

Bibilia nĩ yonanagia atĩ nĩ kũrĩ andũ amwe maarĩ kĩĩruru kana maarũgamĩrĩire ũndũ ũngĩ mũnene makĩria. Ngerekano ĩmwe nĩ ĩrĩa ĩgwetetwo thĩinĩ wa Agalatia 4:21-31. O na kũrĩ ũguo, tũtiagĩrĩirũo nĩ gwĩciragĩria atĩ mũndũ kana kĩndũ nĩ kĩĩruru gĩa kĩndũ kĩngĩ. Ĩndĩ, no tũrore maũndũ marĩa tũngĩĩruta kuumana na andũ kana maũndũ marĩa magwetetwo Bibilia-inĩ. (Rom. 15:4)—3/15, karatathi ga 17-18.

Ibuku rĩmwe rĩrĩa rĩathondeketwo na mathanjĩ rĩrĩa rĩonekire kĩara-inĩ bũrũri-inĩ wa Misiri nĩ rĩa bata nĩkĩ?

Karine-inĩ ĩrĩa hĩtũku nĩ kuonekire gĩcunjĩ kĩa ibuku ta rĩu rĩrĩa rĩarĩ na tũcunjĩ tũmwe twa Injiri ya Johana. Ibuku riũ no kũhoteke rĩandĩkirũo mĩaka mĩrongo ĩigana ũna thutha wa Johana kwandĩka ibuku rĩake. Maũndũ marĩa marĩ thĩinĩ warĩo nĩ mekagĩra mũkonde atĩ Bibilia nĩ ibuku rĩa ma.—4/1, karatathi ga 10-11.

Mũbango wa kweheria mũndũ wĩhĩtie kĩũngano-inĩ nĩ wa wendo nĩkĩ?

Bibilia nĩ ĩtaarĩirie ũhoro wa ikinya rĩu iritũ rĩa kweheria ehia kĩũngano-inĩ rĩrĩa rĩkoragwo na ũguni. (1 Kor. 5:11-13) Kweheria mwĩhia kĩũngano-inĩ nĩ gũtĩithagia rĩĩtwa rĩa Ngai, gũkagitĩra kĩũngano, na no gũteithie mũndũ ũcio wĩhĩtie erire.—4/15, karatathi ka 29-30.