Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

Pe e tatau ona tatou tatalo iā Iesu Keriso?

E leai. Na aʻoaʻoina i tatou e Iesu e tatalo iā Ieova, ma sa ia faataatia se faaaʻoaʻoga e ala i le tatalo i lona Tamā. (Mata. 6:6-9; Ioa. 11:41; 16:23) Na tatalo foʻi ona uluaʻi soo i le Atua ae lē o Iesu. (Galu. 4:24, 30; Kolo. 1:3)—1/1, itulau e 14.

O le ā e tatou te faia i tausaga uma e sauniuni ai mo le faamanatuina o le maliu o Iesu?

O se tasi o mea e mafai ona tatou faia, o le mulimuli lea i le faasologa o le faitauga Tusi Paia e fesootaʻi atu i lona maliu. E mafai foʻi ona tatou faia ni taumafaiga e faatele ai so tatou sao i le faiva i le vaitaimi o le Faamanatuga. Ia tatalo ma manatunatu i lo tatou faamoemoe mai i le Atua.—1/15, itulau e 14-16.

O le ā na tupu i pagota Aikupito e toʻalua ia na faamatala atu a la miti iā Iosefa?

Na faamatala atu e Iosefa i le tautū uaina a Farao o le a toe faafoʻisia o ia i lona tulaga. Ae o le uiga o le miti a le faifalaoa, o le a fasiotia o ia e Farao ma faatautau i le laau. Na saʻo le faamatalaina o miti. (Kene. 40:1-22)—2/1, itulau e 12-14.

O le ā le meaalofa na maua e uso Iapani na faateʻia ai i latou?

Na latou mauaina se tamaʻitusi o loo iai le tusi a Mataio mai i le Faaliliuga a le Lalolagi Fou. Ua ofo atu i le faiva ma ua taliaina e le toʻatele o ē e lē masani i le Tusi Paia.—2/15, itulau e 3.

O ā tulaga sa iai i le uluaʻi senituri na fesoasoani i le folafolaina atu o le tala lelei?

O le tulaga lelei o le Pax Romana po o le lē tele o ni fetauaʻiga. Na faimalaga soo i auala lelei. Sa taatele le faaaogāina o le gagana Eleni, na faafaigofie ai le talaʻiga, lea na oo atu i tagata Iutaia o ē na salalau solo i le emepaea. Sa mafai ona faaaogā e soo le tulafono a Roma e puipuia ai le tala lelei.—2/15, itulau e 20-23.

Aiseā e lē faamanatuina ai e Kerisiano le Eseta?

Na faatonu e Iesu ona soo ia faamanatu lona maliu, ae e lē o lona toetū. (Luka 22:19, 20)—3/1, itulau e 8.

I tausaga talu ai nei, aiseā ua seāseā ai ona toe talanoaina i a tatou lomiga faaataga (type) ma le faataunuuga (antitype) o nisi mea o le Tusi Paia?

Ua faapea mai le Tusi Paia o nisi tagata taʻitoʻatasi ua avea ma faaataga o se mea e sili atu. O se faataʻitaʻiga o lenei mea o loo maua i le Kalatia 4:21-31. Peitaʻi e sili ai le aua neʻi taumafai e fafau aʻe le faataunuuga o se mea. E mafai ona tatou aʻoaʻoina ni lesona mai i tagata taʻitoʻatasi ma mea na tutupu o loo taʻua i le Tusi Paia. (Roma 15:4)—3/15, itulau e 17-18.

Aiseā ua avea ai se manusikulipi na tusia i paʻu o laau lea na toe maua mai i faaputuga lapisi i Aikupito anamua o se mea e fiafia ai?

I le senituri ua mavae atu, na maua se manusikulipi o loo aofia ai se vaega o le Evagelia a Ioane. O lenei manusikulipi atonu na tusia ina ua mavae ni nai faitau sefulu tausaga talu ona tusia e Ioane lana tusi, ma o mea o loo tusia ai ua faamautinoa ai iā i tatou le maufaatuatuaina o le Tusi Paia.—4/1, itulau e 10-11.

Aiseā o se sauniuniga alofa ai le faateʻaina o se tagata faimea sesē ae lē salamō?

Ua faailoa mai e le Tusi Paia le faatulagaga tāua o le faateʻaina, lea e mafai ona maua ai aogā. (1 Kori. 5:11-13) E faamamaluina ai le suafa o le Atua, puipuia ai le mamā o le faapotopotoga, ma e toe sagatonu ai le mafaufau o le tagata faimea sesē.—4/15, itulau e 29-30.