Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:

Onde Akristo pombaka nɔmba Yeso Kristo?

Ndooko. Yeso ndamɛ akatetsha dia nɔmbaka Jehowa, ndo nde akatotshikɛ ɛnyɛlɔ lo nɔmbaka She. (Mat. 6:6-9; Jni. 11:41; 16:23) Diakɔ diele, ambeki ande wa lo ntambe ka ntondo wakalɔmbaka Nzambi, koko aha Yeso. (Ets. 4:24, 30; Kɔl. 1:3)—1/1, lɛkɛ 14.

Kakɔna kakokaso salaka ɔnɔnyi l’ɔnɔnyi dia ndjalɔngɔsɔla lo dikambo dia Eohwelo ka nyɔi ka Yeso?

Yoho mɔtshi ele, ndjelaka ekongelo ka wadielo w’avɛsa wa lo Bible watɛkɛta dikambo sɔ. Sho koka nto nsala la wolo dia mpamia olimu aso w’esambishelo lo nshi yakɔ. Ndo sho kokaka salaka alɔmbɛlɔ le Nzambi kaso l’ɔtɛ w’elongamelo kakandatosha.—1/15, lɛkɛ 14-16.

Ngande wakatshikitana akambo w’ase Edjibito ahende waki lo lokanu l’ɔtɛ wakawakɔndɔlɛ Yɔsɛfu alɔ wakawɛnyi wakaatshindja wɔɔngɔ?

Yɔsɛfu akatɛ kapita k’amangodi a wanu ka Farawɔ ɔnɛ nde ayokaloyama l’olimu wakandakambaka. Lo dikambo dia kapita ka akatshi, kitshimudi ya dɔ diande aki ɔnɛ, lam’ayeta nshi shato Farawɔ ayowohanɛ l’otamba ko nde mvɔ. Tokitshimudi takɔ tshɛ takakotshama. (Etat. 40:1-22)—2/1, lɛkɔ 12-14.

Naa woshasha wa diambo wakakondja anangɛso wa la Japon?

Vɔ wakakondja biukubuku yaki la Evanjiliɔ wa Mateo w’oma lo Bible, Ekadimwelo k’andja w’oyoyo. Vɔ wakatatɛ ndjikahɛ anto l’esambishelo ndo anto efula waki kondjaekesanyiyaka la Bible wakayingɛnangɛna.—2/15, lɛkɛ 3.

Akambo akɔna wakakimanyiya dia lokumu l’ɔlɔlɔ diangana lo ntambe ka ntondo?

Woho wakashikimala Pax Romana akɛnya dia efukutanu komonga efula. Ambeki wa Yeso wa lo ntambe ka ntondo wakakoke munda nkɛndɔ l’etadimbo wakalɔngɔswama dimɛna. Ɔtɛkɛta wa Grɛkɛ wakatɛkɛtamaka l’andja w’otondo, dui sɔ akakimanyiya dia lokumu l’ɔlɔlɔ sambishama kaanga le ase Juda wakadiangana lo diolelo di’otondo. Ndo ambeki asɔ wakakambaka la ɛlɛmbɛ w’ase Rɔmɔ dia mamɛ lokumu l’ɔlɔlɔ.—2/15, lɛkɛ 20-23.

Lande na kahasale Akristo wa mɛtɛ Pasaka?

Yeso akadjangɛ ambeki ande dia mbohɔka nyɔi kande, koko aha eolwelo kande. (Luka 22:19, 20)—3/1, lɛkɛ 8.

Lo ɛnɔnyi wetshi, mbala efula ekanda aso wakakambaka la awui wa didjidji ndo okotshamelo awɔ, lande na kele dui sɔ hayoleka salema?

Bible mbutaka dia anto amɔtshi wakɔsamaka oko didjidji di’awui amɔtshi w’ohomba. Ɛnyɛlɔ kɛmɔtshi ka dui sɔ kekɔ lo Ngalatiya 4:21-31. Koko, lo wedi okina, bu ohomba nkanyiya tsho ko mbisha okotshamelo wa dui dimɔtshi. Koko, sho koka nyanga dia mbeya wetshelo wakokaso nkondja oma le onto akɔ ndo akambo wotami lo Bible. (Rɔmɔ 15:4)—3/15, lɛkɛ 17-18.

Lande na kele yɛtshi ya papirisɛ yakashɔma lo tota dia mindo di’edjedja dia l’Edjibito yekɔ ohomba efula?

Lo ɛnɔnyi wetshi ɛnɛ, yɛtshi mɔtshi yakashɔma yaki la tenyi dimɔtshi di’Evanjiliyɔ wa Joani. Ondo yɔ yakafundama ɛnɔnyi akumi l’ɔkɔngɔ wa Joani mfunda dibuku diande ndo akambo wa lɔkɔ shikikɛka di’awui wele la so wekɔ mɛtɛ ndo ɔnɛ Bible kekɔ mɛtɛ.—4/1, lɛkɛ 10-11.

Lande na kele wotshanyelo w’otshi wa pɛkato wahayatshumoya oma l’etshumanelo ekɔ yɛdikɔ yoludi la ngandji?

Bible mɛnyaka akambo amɔtshi wayokonyaka onto dia mbitshanyema oma l’etshumanelo ndo wahɔ wakoka anto akina nkondja. (1 Kɔr. 5:11-13) Dikambo sɔ, tombolaka lokombo laki Nzambi, namaka pudipudi ka l’etshumanelo ndo koka nkonya osadi wa pɛkato dia ndjatshumoya.—4/15, lɛkɛ 29-30.