Kasi muli kuŵazga magazini gha Gongwe la Mulinda ghasonosono apa? Yezgani kuzgora mafumbo agha:

Kasi Mkhristu wakwenera Kupemphera kwa Yesu?

Yayi. Yesu wakatisambizga kuti tipempherenge kwa Yehova ndipo nayo wakapempheranga kwa a Wiske. (Mat. 6:6-9; Yoh. 11:41; 16:23) Nakuti ŵalondezgi ŵa Yesu ŵakwambilira nawo ŵakapempheranga kwa Chiuta, kwa Yesu yayi. (Mil. 4:24, 30; Kol. 1:3)—1/1, peji 14.

Ni vinthu wuli ivyo tingachita chaka chilichose apo tikunozgekera kukumbukira nyifwa ya Yesu?

Tingaŵazga mavesi agho ghakuyowoya ivyo vikachitika panyengo iyo Yesu wakaŵa pafupi kufwa. Pa nyengo iyi tingasazgirakoso nyengo iyo tikupharazgira. Kweniso tingalomba kufumira pasi pamtima na kughanaghanirapo chomene ivyo Chiuta watilayizga.—1/15, peji 14-16.

Kasi ntchivichi chikachitikira ŵantchito ŵa Faro ŵaŵiri awo ŵakaphalira Yosefe maloto ghawo mu gadi?

Yosefe wakaphalira wakupelekera nkhombo wa Faro kuti wazamuwezgekera pa ntchito yake. Kweni loto la mulara wa ŵakuphika likang’anamuranga kuti Faro wazamumukoma na kumupayika pa khuni. Vyose ivi vikachitika nadi. (Gen. 40:1-22)—2/1, peji 12-14.

Kasi ŵabali ku Japan ŵakapokera chawanangwa wuli?

Ŵakapokera kabuku ako kali na buku la Mateyu mu Malemba gha Mang’anamuliro gha Caru Ciphya. Kabuku aka ŵakupa ŵanthu mu upharazgi, ndipo ŵanthu ŵanandi awo Baibolo ŵakulimanyisiska yayi ŵakukatemwa chomene.—2/15, peji 3.

Kasi ntchivichi icho chikawovwira kuti makani ghawemi ghathandazgike mu nyengo ya Ŵakhristu ŵakwambilira?

Mu Ufumu wa Roma mukaŵa mtende, ndipo nkhondo zikaŵanga zichoko. Kweniso ŵasambiri ŵa Yesu ŵakendanga mu misewu yiwemi. Panyengo yira, ŵanthu ŵanandi ŵakayowoyanga Chigiriki. Ichi chikawovwira kuti ŵapharazgenge kwambura suzgo, nanga nkhu Ŵayuda awo ŵakaŵa ŵanandi mu Romu. Nakuti ŵasambiri ŵakagwiliskiranga ntchito malango gha charu cha Roma kuti ŵavikilire makani ghawemi.—2/15, peji 20-23.

Chifukwa wuli Ŵakhristu ŵaunenesko ŵakuchitako yayi Isitara?

Yesu wakaphalira ŵalondezgi ŵake kuti ŵakumbukirenge nyifwa yake, kuwuka kwake yayi. (Luka 22:19, 20)—3/1, peji 8.

Chifukwa wuli mazuŵa ghano mabuku ghithu ghakulongosora chomene ivyo nkhani za mu Baibolo zikutisambizga m’malo mwa ivyo zikwimira?

Baibolo likuti ŵanthu ŵanyake ŵakimiranga waka vinthu vinyake vyakuzirwa chomene. Chiyelezgero chimoza chikusangika pa Ŵagalatiya 4:21-31. Ntheura ntchakwenelera yayi kughanaghanira waka kuti nkhani yinyake mu Baibolo yikwimira chinthu chinyake. Kweni tikwenera kuwona ivyo nkhani za mu Baibolo izi zikutisambizga. (Rom. 15:4)—3/15, peji 17-18.

Chifukwa wuli chiphapha cha mipukutu yinyake yakale icho ŵakachisanga ku nkhando ku Egypt ntchakuzirwa chomene?

Cha m’ma 1900, ŵakasanga chiphapha cha buku la makani ghawemi ghakulembeka na Yohane. Mipukutu iyi yikwenera kuti yikalembeka pati pajumpha vyaka vichoko waka kufuma apo Yohane wakalembera buku lake. Ndipo ivyo vili mu mipukutu iyi ndivyo ise tikusambira sono, kulongora kuti Baibolo ndaunenesko.—4/1, peji 10-11.

Chifukwa wuli ntchiwemi kusezga wakwananga?

Baibolo likuti ntchakuzirwa chomene kusezga wakwananga wambura kulapa. Chifukwa wuli? (1 Kor. 5:11-13) Vikovwira kuti zina la Chiuta lichindikike, mpingo ulutilire kuŵa wakutowa, kweniso vikovwira kuti wakwananga wajinyumwe na kuleka nkharo yake.—4/15, peji 29-30.