Nabasa mo ba hin maopay an bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:

Sadang ba mag-ampo an mga Kristiano kan Jesu-Kristo?

Diri. Gintutdoan kita mismo ni Jesus nga kan Jehova kita mag-ampo, ngan nagpakita hiya hin susbaranan pinaagi ha pag-ampo ha iya Amay. (Mat. 6:6-9; Juan 11:41; 16:23) Salit, an mga sumurunod ni Jesus han siyahan nga siglo nag-ampo ha Dios, diri ha iya. (Buh. 4:24, 30; Col. 1:3)—1/1-E, pahina 14.

Paonan-o kita mahimo mangandam para ha tinuig nga paghinumdom han kamatayon ni Jesus?

Usa nga paagi amo an pagsunod han nakaeskedyol nga pagbasa ha Biblia para ha Memoryal. Mahimo liwat kita mangalimbasog ha pagpahaluag han aton ministeryo hito nga panahon. Ngan mahimo naton ig-ampo ngan pamalandungon an paglaom nga iginhatag ha aton han Dios.—1/15, pahina 15-16.

Ano an nahitabo ha duha nga Ehiptohanon nga priso nga nagsumat kan Jose han ira nakakagupong nga inop?

Ginsidngan ni Jose an paratagay han Paraon nga ibabalik hiya ha iya pwesto. May kalabotan ha parahimo hin tinapay, nagsiring hi Jose nga an iya inop nangangahulogan nga ipapapatay hiya han Paraon ngan bibitayon ha kahoy. Natuman gud ito nga mga pagsaysay. (Gen. 40:1-22)—4-6, pahina 8-11.

Ano nga diri ginlalaoman nga regalo an nakarawat han kabugtoan ha Japan?

Nakakarawat hira hin bokleta nga nagsusulod han libro han Mateo nga ginkuha ha Bag-o nga Kalibotan nga Hubad. Igintatanyag ito ha ministeryo, ngan ginkakarawat ito han damu nga tawo nga diri pamilyar ha Biblia.—2/15, pahina 3.

Ano nga mga kahimtang ha siyahan nga siglo an nakabulig ha pagsarang han maopay nga sumat?

Tungod han Pax Romana, gutiay la an araway. An mga disipulo han siyahan nga siglo nakakagbiyahe ha mag-opay nga kalsada nga nagkukonektar han haros ngatanan nga probinsya. An Griego nga yinaknan komon nga ginagamit, salit nagin mas masayon an pagsangyaw, bisan ha mga Judio nga naukoy ha bug-os nga imperyo. Ngan nagagamit han mga disipulo an balaud han Roma ha pagdepensa han maopay nga sumat.—2/15, pahina 20-23.

Kay ano nga diri nagsiselebrar han Pasko han Pagkabanhaw (Easter) an tinuod nga mga Kristiano?

Ginsugo ni Jesus an iya mga sumurunod nga hinumdoman an iya kamatayon, diri an iya pagkabanhaw. (Luc. 22:19, 20)—3/1-E, pahina 8.

Hinin bag-o la nga mga tuig, kay ano nga talagsa na la hisgotan an mga tipiko ngan antitipiko ha aton mga publikasyon?

An Biblia nasiring nga an pipira nga indibiduwal mga tipiko nga may ginpapadagawan. Mababasa naton an ehemplo hini ha Galacia 4:21-31. Pero kon waray ginsisiring an Biblia, maopay nga diri kita maghimo-himo o magpinamiling hin simboliko nga kahulogan han usa nga asoy. Kondi may mahibabaroan kita nga mga leksyon tikang ha mga indibiduwal ngan panhitabo ha Biblia. (Roma 15:4)—3/15, pahina 17-18.

Kay ano nga sadang kita magin interesado ha usa nga papiro nga nabilngan ha usa nga kadaan nga basurahan ha Ehipto?

Han naglabay nga siglo, usa nga papiro an nabilngan nga nagsusulod han mga bahin han Ebanghelyo ni Juan. Bangin iginsurat ito pipira ka dekada katapos isurat ni Juan an iya libro. Ginpapamatud-an han mga nakasurat dida hito nga husto gud ngan masasarigan an mababasa ha aton mga Biblia yana.—4/1-E, pahina 10-11.

Kay ano nga mahigugmaon an pagpaiwas ha nakasala nga diri mabinasulon?

Iginsasaysay han Biblia kon kay ano nga ginpapaiwas an usa ha kongregasyon, nga mahimo magkaada mag-opay nga resulta. (1 Cor. 5:11-13) Nagpapasidungog ito ha ngaran han Dios, nagpapanalipod han limpyo nga kongregasyon, ngan mahimo mag-aghat ha nakasala nga mamurubuot.—4/15, pahina 29-31.