¿Ta xokaj wa u tsʼook revistailoʼob U Pʼíich Tulumil Kanan? Wa beyoʼ, ilawil wa jeʼel a núukik le kʼáatchiʼobaʼ:

Le máaxoʼob meyajtik Diosoʼ, ¿unaj wa u oraroʼob tiʼ Jesús?

Maʼ. Jesuseʼ maʼ chéen tu yaʼalaj unaj k-orar tiʼ Diosiʼ, baʼaxeʼ tu beetaj xan utiaʼal k-ilik (Mat. 6:6-9; Juan 11:41; 16:23). Yoʼolal lelaʼ le yáax cristianoʼoboʼ orarnajoʼob tiʼ Dios, maʼ tiʼ Jesusiʼ (Bax. 4:24, 30; Col. 1:3) (1/1, táan juʼun 14).

¿Bix jeʼel k-líiʼsikba utiaʼal u Kʼaʼajsajil u kíimil Jesuseʼ?

Junpʼéel baʼax jeʼel k-beetkeʼ letiʼe k-xokik teʼ Biblia le baʼaxoʼob úuch tu tsʼook u kʼiiniloʼob u kuxtal Jesusoʼ. Jeʼel u páajtal xan k-maas jóokʼol kʼaʼaytaj tu kʼiiniloʼob le Kʼaʼajsajiloʼ. Yéetel jeʼel u páajtal k-orar yéetel k-tuukul tiʼ le esperanza u tsʼaamaj Dios tiʼ cada juntúul tiʼ toʼonoʼ (15/1, táan juʼun 14 tak 16).

¿Baʼax úuch tiʼ le kaʼatúul egipcioʼob kʼalaʼanoʼob kaʼach cárcel yéetel Joseoʼ?

Joseeʼ tu yaʼalaj tiʼ le máax pichik u yoʼoch vino le reyoʼ yaan u kaʼa suʼutul tu meyaj. Pero tiʼ le máax beetik le waajoʼ tu yaʼaleʼ yaan u yaʼalaʼal ka kíimsaʼak tumen Faraón. Le baʼax tu yaʼalaj José tiʼ le kaʼatúul máakoʼobaʼ béeychaji (Gén. 40:1-22) (1/2, táan juʼun 12 tak 14).

¿Baʼax regaloil tu kʼamaj le sukuʼunoʼob yanoʼob Japonoʼ?

Tu kʼamoʼob u Evangelioil Mateo chʼaʼabaʼan tiʼ U Suttʼaanil Túumben Luʼum. Lelaʼ tsʼoʼok u meyaj utiaʼal u kʼaʼaytaj le sukuʼunoʼoboʼ, tsʼoʼoleʼ maas tsʼoʼok u kʼaʼamal tumen le máaxoʼob maʼatech u xokikoʼob le Bibliaoʼ (15/2, táan juʼun 3).

¿Baʼaxten béeychaj u kʼaʼaytaj le sukuʼunoʼob teʼ yáax siglooʼ?

Tumen teʼ kʼiinoʼoboʼ tu luʼumil Romaeʼ yaan kaʼach jeetsʼelil yéetel maʼ sajbeʼentsil u viajar máakiʼ. Yaʼab máakoʼob xan tʼanik griego, leloʼ jach áantajnaj utiaʼal u yúuchul kʼaʼaytaj tiʼ le judíoʼob kajaʼanoʼob jejeláas tuʼuxoʼ. Le disipuloʼob xanoʼ ku meyajtiʼob u ley le romanoʼob utiaʼal u béeytal u kʼaʼaytajoʼoboʼ (15/2, táan juʼun 20 tak 23).

¿Baʼaxten maʼ unaj u kʼiinbesaʼal le Domingo de Pascuaoʼ?

Jesuseʼ maʼ tu yaʼalaj tiʼ u apostoloʼob ka u kʼiinbesoʼob le ka kuxkíintaʼaboʼ, baʼaxeʼ tu yaʼalaj ka u kʼaʼajsoʼob le ka kíimoʼ (Luc. 22:19, 20) (1/3, táan juʼun 8).

¿Baʼaxten bejlaʼeʼ le publicacionoʼoboʼ maʼatech u tsolkoʼob wa yaan baʼax ku chíikbesik cada junpʼéel baʼal ku yaʼalik le Bibliaoʼ?

Teʼ Bibliaoʼ jujuntúul máaxoʼob ku chʼaʼchiʼitaʼaleʼ yaan uláakʼ máax ku chíikbeskoʼob. Jeʼex le koʼoleloʼob ku chʼaʼchiʼitaʼal tiʼ Galaciailoʼob 4:21 tak 31, yaan máax ‹ku chíikbeskoʼob›. Le oʼolaleʼ ken k-xok junpʼéel tsikbalil teʼ Bibliaoʼ maas maʼalob ka k-tukult baʼax jeʼel u páajtal k-kanik tiʼ le máaxoʼob wa le baʼaxoʼob ku chʼaʼchiʼitaʼaloʼ (Rom. 15:4) (15/3, táan juʼun 17 yéetel 18).

¿Baʼaxten jach kʼaʼanaʼan le junxóotʼ papiro kaxtaʼab tiʼ junpʼéel basurero yaan Egiptooʼ?

Tu tsʼoʼokbal le siglo 19, kaxtaʼab junxóotʼ papiro tuʼux ku chíikpajal u Evangelioil Juan. Le papiroaʼ tsʼíibtaʼab le maʼ sen úuch u tsʼoʼoks u tsʼíibtik Juan u Evangeliooʼ. Tsʼoʼoleʼ ku yeʼesikeʼ le baʼax ku yaʼalik le Bibliaoʼ jach jaaj (1/4, táan juʼun 10 yéetel 11).

¿Baʼaxten le expulsionoʼ ku yeʼesik yaabiltaʼan máak?

Le Bibliaoʼ ku yaʼalikeʼ le expulsionoʼ jeʼel u taasik utsiloʼobeʼ (1 Cor. 5:11-13). Ku yáantaj utiaʼal maʼ u yúuchul tʼaan kʼaas tiʼ Jéeoba, ku kanáantik le sukuʼunoʼob yaan teʼ múuchʼuliloʼ yéetel ku kʼaʼajsik yiikʼ le máax kʼebanchajoʼ (15/4, táan juʼun 29 yéetel 30).