Atun Te Maekatin | Arom n Tokanikai i Aon te Raraoma
E a Taabangaki te Raraoma!
“I nako bwa N na kabooa te amwarake ma e tii reke te bitiketi ae e a bon titiku naba ni boona! N te bong are imwina, ai bon akea raoi amwarake n taian titooa.”—Paul, Zimbabwe.
“E katekatekaai buu ao e tuangai bwa e nang kitanira. Tera arou ni kaitaraa te mwakuri n ribuaka aei? Tera ae e na riki ngkanne nakoia natiu?”—Janet, United States.
“Ngke e a tang te buu ibukin te kangaanga ao I a birinako naba ni kamanoai ma ni wene i aontano ngkana a rebwetaua taian rokete. Tabeua te aoa imwina, a teimatoa naba n ruru baiu.”—Alona, Iteraera.
Ti a maeka ngkai i nanon taai aika kararaoma aika “taai aika okoro aika karuanikai.” (2 Timoteo 3:1) A a mwaiti aika tabeaianga ibukini kangaangan te karekemwane, te kangaanga i nanon te utu, te buaka, butinakon aoraki aika kamamate ao ai kabuanibwai aika karina ke mairouia aomata. Irarikin akanne, bon iai naba raraomaia aomata aika kakaokoro n aron aikai: ‘E na riki bwa te kaentia te bwai ae riki aei n rabwatau?’ ‘Tera aron te aonnaba ae a na ikawairake iai tibuu?’
Akea buren namakinan te raraoma. Ti namakina te raraoma imwaini karaoan ara ukeuke, ara kamataku ke ni karaoan te maroro ibukini karekean ara mwakuri. Ao e buokira maakakin te bwai ae karuanikai bwa ti na kararoaa te kangaanga. Ma e karuanikai namakinan te raraoma ae korakora ke n teimatoa. E noraki n taiani kakaae n taai aika tibwa nako bwa e raka i aon 68,000 mwaitiia aomata aika ikawai ake a taekinna bwa e kona naba ni karekea te moantaai ni mate te raraoma teutana. Iai bukina ae riai ngke e titiraki ngkanne Iesu ni kangai: “Antai iroumi ae kona ni kaananaua riki maiuna teutana ngkana e raraomaeakinna?” Ni koauana, e kona te raraoma ni kauarerekea maiun temanna. Mangaia are e reirei ni kangai Iesu: ‘Katoka te raraoma.’ (Mataio 6:25, 27) Ma e na kangaa n reke anne?
E irekereke kaekaan anne ma bwainan te wanawana, karikirakean ara onimaki ni koaua ibukin te Atua ao kateimatoaan ara kantaninga ae koaua ibukin taai aika a na roko. E ngae ngke ti aki kaaitara ngkai ma kangaanga aika kakaiaki ma ti na bae ni kaaitara ma ngaai rimwi riki. Ngaia are ti na noria bwa a kangaa mwaneka aikai ni buoka Paul, Janet ao Alona n tokanikai i aon te raraoma.
Ko Bae Naba n Tangira
TARATARA!
Ko Tabeaianga??
A bati baika ko kona ni karaoi bwa e aonga n aki taonikonako te tabeaianga.
