MUTWE WA MWANDA WA PA KIBALU | MWA KULWILA NA KUZUMBIJA MUTYIMA
Kuzumbija Mutyima Kudi Konso!
“Naendele kukapota byakudya, ino yō natana’nka bisukwityi
—bikande bei misunsa 10 000 na mobipotelwanga nyeke! Abo bukya lubanga, mu mangajini byakudya byapwa pwē.” —Paul, Zimbabwe.
“Wami mulume washinkatyije ne kunombola amba usa kwitushiya. Le nadi wa kulwa namani na kuno kulubilwa? Lelo byadi bya kwikadila namani bami bana?”
—Janet, États-Unis.
“Ñunga pa kudila, nanyema kukafyama ne kulāla panshi, papo marokete avuma. Papityile mansá mangi makasa ami atetema’nka kutetema.”—Alona, Isalela.
Tudi mu bitatyi bya kuzumbija mutyima, “bitatyi bya makambakano bikomo ne mwa kulongela.” (2 Temote 3:1) Bavule balwanga na makambakano a misokwe, kutyumuka kwa bisaka, mavita, misongo mikomo, ne na bimpengele bya kipangila nansha bya bantu. Kudi kadi ne makambakano a muntu ne muntu: ‘Lelo ami watamine biyampe nkekala kadi nkembela misongo ya dyaya?’ ‘Le bami bankana bakatamina mu ntanda ya muswelo’ka?’
Kuzumbija kwa mutyima konso ke kubipo. Mungya kibutwila tuselanga mutyima kūlu kumeso kwa kulonga ekizame, kutompibwa nansha kwipangulwa pa kwitabijibwa ku kaji. Kadi kwakamwa kyaka pangala pa bukomo bwetu bwa ngitu kwitukwashanga twepuke kwisanshija. Inoko kuzumbija mutyima bipitepite nansha kyaba kyonso i kwiipaya. Bwifundi bwa panopano bwalombwele bantu batame 68 000 ne kupita bazumbija mutyima, bwalombwele amba enka ne kuzumbija’tu mutyima bityetye kubwejanga’ko kyaka kya kufwa mubishimubishi. Yesu wādi na bubinga bwa kwipangwila amba: “I ani le pomudi’po ukokeja kubweja bula bwa kuboko kumo ku būmi bwandi pa mwanda wa kukambakanya mutyima?” Na bubine, kuzumbija mutyima kekulepejangapo būmi. O mwanda Yesu wādingile amba: “Lekai kukambakanya mityima.” (Mateo 6:25, 27) Ino le tukaleka kuzumbija mutyima namani?
I na kwingidija tunangu twa bine, kutamija lwitabijo lwa binebine mudi Leza, ne kutamija lukulupilo lwa bine mu mafuku a kumeso. Shi nansha ketulungapo na makambakano pano, ino tubwanya kukatanwa nao mu mafuku a kumeso. Nanshi tutalei bino bintu mobyakwashishe ba Paul, Janet, ne Alona balwe na kuzumbija mutyima.
Tala'po Bidi ne Bino:
MYANDA MIKWABO
Bukwashi bwa mu Bible ku Bana-Balume Bazumbija Mityima
Kuzumbija mutyima kubaikala bu makambakano enda avudila’ko mu bino bitatyi bikomo. Shi wikondanga na kuzumbija mutyima, le Bible ubwanya kukukwasha?
LANGUKAI!
Lelo Wi Muvutakanibwe Ñeni?
Kudi bintu bivule byobwanya kulonga kutyina wa kalēmenenwa na kuvutakanibwa ñeni.
