TSHIENA-BUALU TSHINENE | MUA KUPITA NE TUNYINGANYINGA
Tunyinganyinga tudi miaba yonso!
Paul wa mu Zimababwe udi wamba ne: “Mvua muya mu tshisalu bua kusumba biakudia, kadi ngakasangana anu biskwi, bine abi mushinga mukole wa dikema! Dituku diakalonda, mu makazen kamutshivua tshiakudia nansha tshimue to.”
Janet wa mu États-Unis udi wamba ne: “Bayanyi wakansombesha panshi ungambila ne: uvua musue kutushiya meme ne bana. Uvua mungele mâyi ku makasa; mmunyi mumvua mua kupita ne lutatu elu? Ntshinyi tshivua mua kufikila bana banyi?”
Alona wa mu ditunga dia Israel udi wamba pende ne: “Patu mpungi ituadija kudila, ntu nya lubilu bua kusokoma, ndala panshi padi bingoma bidila. Mêba a bungi pashishe, bianza bianyi bitu anu bishala bizakala.”
Tudi mu bikondo bia tunyinganyinga, “bikondo bibi bidi bikole mua kupita nabi.” (2 Timote 3:1) Bantu ba bungi badi batata bua dipangila dia makuta, difua dia mêku, mvita, masama a lufu ne bikumina. Kudi kabidi malu adi bantu badiebeja bu mudi: ‘Tshiuja tshidi tshimpatuke pambidi apa ntshifuane kunkebela disama dia kansere anyi?’ Bankana banyi nebakolele munkatshi mua bantu ba mushindu kayi?
Tumue tunyinganyinga tukadi bibidilangana natu. Tutu tumvua kabuôwa patudi kumpala kua mateta ne basua kumanya tshitudi bakumbane bua kuenza anyi padibu batuela nkonko bua kupeta mudimu. Kumvua buôwa bua njiwu kudi kutuambuluisha bua kuepuka ntatu idi ifuminaku. Kadi, kanyinganyinga kakole kadi kashala matuku a bungi ku muoyo katu kabi menemene. Makebulula avuabu benze matuku mashale aa pa bantu bakole 68000 adi aleja ne: nansha kanyinganyinga kakese tshianana ku muoyo kadi kavudija njiwu ya difua ne buana buonso. Ke bualu kayi Yezu wakebeja ne: “Mmuntu kayi wa munkatshi muenu udi mua kusakidila nkubita umue ku bule bua muoyo wende padiye uditatshisha?” Bushuwa, kuditatshisha kakuena kulepesha matuku a muoyo wa muntu nansha. Nunku Yezu wakadimuija ne: “Lekelayi kuditatshisha.” (Matayi 6:25, 27) Kadi, mmunyi mudibi mua kuenzeka nanku?
Bidi bikengela kuleja meji mu tshienzedi, kuikala ne ditabuja dikole kudi Nzambi ne kukolesha ditekemena dietu bua matuku atshilualua. Nansha tuetu katuyi ne tunyinganyinga lelu, tudi mua kutupeta mu matuku atshidi alua. Nunku tumonayi muvua malu atudi batele aa mambuluishe Paul, Janet ne Alona bua kupita bimpe ne tunyinganyinga.
Mona bikuabu:
TABULUKAYI!
Udi ne tunyinganyinga anyi?
Kudi malu a bungi audi mua kuenza bua tunyinganyinga katukupitshi makanda.
