LARTIK KOUVERTIR | KOUMA POU FER FAS AR TRAKA?
Partou Ena Traka!
“Mo ti al aste manze me ti ena zis biskwi—10,000 fwa pli ser ki pri normal! Landemin, pa ti ena manze ditou dan bann laboutik.”—Paul, Zimbabwe.
“Mo misie inn dir mwa asize ek li’nn dir mwa li pe kit nou. Kouma mo ti pou siport sa trayizon-la? Ki ti pou ariv mo bann zanfan?”—Janet, États-Unis.
“Kan mo tann lasirenn, mo degaze al kasiet pou protez mwa ek mo alonz anba letan bann misil pe eklate. Plizir lertan apre mo lame ankor pe tranble.”—Alona, Israël.
Nou pe viv enn lepok ranpli ar traka, “bann lepok kritik, difisil pou siporte.” (2 Timote 3:1, NW.) Boukou dimounn strese akoz kriz finansie, problem familial, lager, bann lepidemi mortel, ek bann katastrof natirel ouswa bann katastrof ki arive akoz bann dimounn. Anplis ena bann traka personel. Par exanp, sertin demann zot: ‘Eski sa groser ki mo ena la li enn kanser?’ ‘Dan ki kalite lemond mo bann ti-zanfan pou grandi?’
Pa tou traka ki move. Li normal ki nou inpe strese avan enn lexame, enn prezantasion, ouswa enn interview pou enn travay. Ek ena sertin laper ki enn proteksion pou nou parski sa ed nou pou evit bann problem. Me bann gran traka ouswa bann traka ki dire kapav fini nou net. Plizir letid ki’nn fek fer avek plis ki 68,000 adilt finn montre ki mem bann ti traka ogmant bann risk pou mor avan ler. Alor, Zezi ti ena rezon pou demande: “Kisannla, kan li trakase, kapav azout enn sel koude ar so lavi?” Vremem, bann traka pa kapav prolonz nou lavi. Ala kifer Zezi ti donn sa konsey-la: “Aret trakase.” (Matie 6:25, 27, NW.) Me kouma nou kapav fer sa?
Se kan nou ena sazes pratik, kan nou ranforsi nou lafwa an Bondie, ek ena enn vre lesperans pou lavenir. Mem si azordi nou pa pe fer fas ar bann gran difikilte, kitfwa demin nou pou bizin fer fas. Alor, anou gete kouma sa trwa konsey-la finn ed Paul, Janet, ek Alona pou fer fas ar zot bann traka.
