OSAPI YO KONDYE | OITYI UNA OKULINGA TYINA UNA OTYIHO
Mouye Auho Ovanthu Vakala Notyiho!
“Ankho naya okukalanda okulia, mahi andyivasi-ko vala onondose, mbulanda onombongo ononyingi unene! Monthiki onkhuavo anahavasi vali natyike.”—Paul, ko Zimbabwe.
“Omulume wange wandyihana, amphopila okuti matundu meumbo. Oñgeni ankho mandyikoleleya elaviso olio? Oñgeni matyikalesa ovana vange?”—Janet, ko Estados Unidos.
“Etyi onongendyo mbokutulondola mbahimbika okuhika, andyihateka opo ndyikaholame, andyilangala pohi putyina omauta atutana. Etyi palamba onoola, olutu luange nkhele ankho luteteketa vala.”—Alona, ko Israel.
Onthue tukahi momuvo usukalalesa, “omuvo wepuiya.” (2 Timóteo 3:1) Ovanyingi vena otyiho tyituka kokuhena onombongo, no nombunga mbeliyapauka, novita, nomikihi, novinimawe ine oviponga vietwa novanthu. Tupu, munthu na munthu una omasukalalo ae: ‘Okuti ouvela wamoneka molutu luange, maundyipaa?’ ‘Ovatekula vange mavekekulila mouye ukahi ñgeni?’
Pamwe katyapengele okukala notyiho. Pamwe tukala notyiho pokulinga otyilinga tuapewa, ine tyina tupulwa tyimwe pokuovola ovilinga. Okukala nowoma, pamwe tyituyakulila kovivi vipondola okutulinga omapita. Mahi, okukala apeho notyiho, tyinyona. Omaovololo alingwa pahetyino movakulu valamba po 68.000, alekesa okuti alo umwe okukala vala katutu notyiho, tyitepulula kononthiki mbomuenyo womunthu. Otyo Jesus apulila okuti: “Olie puonwe, mokonda yokusukalala unene, upondola okuyawisa vali ononthiki komuenyo wae?” Tyotyili, otyiho katyiyawisa komuenyo womunthu. Jesus walondola okuti: “Yekeipo okukala notyiho.” (Mateus 6:25, 27) Mahi, oñgeni omunthu metyivili?
Opo etyivile, wesukisa okuendela muetyi Ondaka ya Huku ilongesa, nokupameka ekolelo mu Huku, nokukala nekevelelo. Namphila hamwe pahe tutupu ovitateka viepuiya, mahi nthiki imwe vipondola okutumonekela. Tutalei oñgeni Paul na Janet, na Alona, vakuatesilueko okufinda otyiho.
Hamwe Noove Uhanda
PAHUKEI!
