OMUTWE OGURI AHA MUNAARA | OKWEMERA OKWERARIKIRIRA
Okwerarikirira Kuri Buri Hamwe!
“Nkaza kugura eby’okurya kwonka naashangayo obugaati bwonka, burikugura esente ezirikubazamu emirundi 10,000 aha beeyi eya butoosha! Eizooba eryakuratsireho, omu maduuka hakaba hatakirimu by’okurya.”—Paul, kuruga Zimbabwe.
“Ibanyi akanyeta yaangira ngu ariyo naaza kututsigaho. Eki nkaba ninza kukigumira nta? Niki ekyabaire nikiza kuhika aha baana bangye?”—Janet, kuruga United States.
“Engombe ezirikumanyisa ngu hariho akabi ku zirikutandika kugamba, niinyiruka kweshereka kandi ndambira ahansi obwo enyonyi endwani zirikurekyera bomu. Bwanyima, engaro zangye niziba nizikitetema.”—Alona, kuruga Israel.
Turi omu bunaku bw’okwerarikirira, “ebiro by’akabi kaingi” ebigumire kwemera. (2 Timoseo 3:1) Baingi nibeerarikirira ahaby’entaasya, okusiisikara kw’amaka, entaro, endwara z’akabi, n’ebihikiirizi. Kandi hariho n’ebindi bintu bingi ebirikwerarikiriza abantu nk’ebi: ‘Akantu akashangirwe omu mubiri gwangye nikaija kurugamu ekookoro?’ ‘Baijukuru bangye nibaija kukurira omu nsi erikushusha ki?’
Okwerarikirira kwona ti kubi. Obumwe nitugira amaganya twaba nituza kukora ebigyezo, kuzaana omuzaano nari kugarukamu ebibuuzo by’okutunga omurimo. Okutiina akabi nikituhwera kwetantara oburemeezi. Kwonka okwerarikirira ekirenga, n’eky’akabi. Okucondooza okwakozirwe aha bantu bakuru abarikurenga 68,000 kukooreka ngu nangwa n’okwerarikirira okukye nikubaasa kurugiraho omuntu kufa kare. Yesu akabuza ati: “N’oha omuriimwe orikubaasa kwongyera ekiro na kimwe aha rugyero rw’emyaka y’obukuru bwe ahabw’okwemereza omutima?” Buzima, okwemereza omutima tihaine eki kurikubaasa kwongyera aha magara g’omuntu. N’ahabw’ekyo,Yesu akatwehanangiriza ati: “Mutaryemereza emitima yaanyu.” (Matayo 6:25, 27) Mbwenu shi ekyo nikibaasika kita?
Nikibaasika twagyendera aha bwengye, twikiririza kimwe omuri Ruhanga, kandi tukagira amatsiko agaabuzima aha biro by’omumaisho. N’obu twakuba tutakahikirweho mbeera mbi hati, nizibaasa kutuhikaho omu biro by’omumaisho. Hati ka tureebe oku okugyendera aha buhabuzi obu kihwereire Paul, Janet, na Alona kwemera okwerarikirira.
