Yɛde mekɛ mɔɔ “anwongyelelɛ dɔɔnwo bara” la anu. (2 Temɔte 3:1) Menli dɔɔnwo ɛlɛyia ezukoa nee abusua nu ngyegyelɛ, konle, ewulenzane nee esiane ngakyile. Yɛdayɛ noko yɛlɛ yɛ adwenleadwenle ɛdeɛ dɔɔnwo: ‘Asoo deɛ ɛhye mɔɔ ɛlɛfifi me nwo la bayɛ kansa ɔ?’ ‘Kɛzi me nlɔnra ne mɔ asetɛnla nu bayɛ ɛ?’

Tɛ adwenleadwenle kɔsɔɔti a ɛnle kpalɛ a. Saa yɛbayɛ sɔnea, gyimalilɛ bie, anzɛɛ bɛbabizebiza yɛ gyima nwo edwɛkɛ bie a ɔyɛ a yɛdwenledwenle nwolɛ. Ɛzulolɛ kpalɛ maa yɛkoati esiane. Noko adwenleadwenle dɔɔnwo le esiane. Mgbanyinli mɔɔ bɛbo 68,000 la anwo debie mɔɔ bɛzukoale ye kenlensa ye la maa ɔda ali kɛ adwenleadwenle ngyikyi maa awie wu ndɛ. Ndelebɛbo kpalɛ bie ati a Gyisɛse bizale kɛ: “Bɛ nuhua boni yɛɛ kɛhola kɛlua ye adwenleadwenle zo kɛva mekɛ ekyi kɛboka ye mekɛ nwo a?” Nɔhalɛ nu, adwenleadwenle ɛmmaa awie biala ngoane mekɛ ɛnwa. Ɛhye ati, Gyisɛse dule folɛ kɛ: “Bɛmmadwenle.” (Mateyu 6:25, 27) Noko kɛ ɔkɛyɛ na ɛhye ayɛ boɛ ɛ?

Ye sɔbelɛ a le kɛ yɛbava nrɛlɛbɛ yɛali gyima, yɛanyia Nyamenle anu diedi nee kenle bie anwo anyelazo kpalɛ. Saa yɛndwenledwenle ɛnɛ bɔbɔ a, bie a kenle bie ɔbara ye zɔ. Yemɔti bɛmaa yɛnlea kɛzi ndenle ɛhye mɔ mɔɔ Paul, Janet, nee Alona ɛlua zo la ɛboa ɛmaa bɛgyinla adwenleadwenle nloa la.