TUMU MANAKO I TE KAPI MUA | AKAPEEA ME AUTU I TE TAITAIA
Tei te Ngai Katoa te Taitaia!
“Kua aere au i te oko kai, inara e varaoa pakapaka ua taku i kite mai—e e āka moni tikai te reira! Tera mai rā, kare e kai i toe mai i roto i te au toa.”—Paul, Zimbabwe.
“Kua akanoo taku tane iaku ki raro e kua karanga mai e ka akaruke aia ia matou. Akapeea au i te akakoromaki anga i teia tu pikikaa? Eaa te ka tupu ki taku nga tamariki?”—Janet, Marike.
“Me tangi te pu akamatakite anga, ka oro au ka kimi i te ngai akapuanga e ka takoto ki raro me aruru te au roketi. I te au ora i muri mai, e ruketekete ana toku nga rima.”—Alona, Iseraela.
Te noo nei tatou i te tuatau taitaia, “ka tupu te kino maata.” (2 Timoteo 3:1) E manganui tei manako taitaia no te moni, te akatakake anga o te ngutuare tangata, te tamaki, te maki kino e totoa ra, te au tumatetenga na te tangata i akatupu e te au tumatetenga natura. Kapiti mai ki teia to tatou uaorai manako apiapi: ‘Ka riro ainei teia puku i toku kopapa ei maki cancer?’ ‘Mei teaa rai teianei ao me mamaata mai taku au mokopuna?’
E mea meitaki rai tetai tuanga o te manako taitaia. E manako apiapi ana tatou i mua ake ka rave ei i tetai tarere, angaanga, me kore uiuianga no te angaanga. E ka riro katoa te mataku anga i te kino ei tauturu ia tatou kia kopae i te kino. Inara ka riro te taitaia maata putuputu ei mea kino tikai. Kua akaari mai tetai kimikimi anga te o maira e 68,000 tangata e e mate vave ana te tangata no te tu taitaia. No reira, e tumu anga meitaki to Iesu te karanga anga e: “Koai oki to kotou, e tika kia akaroa atu i tona tu [me kore tona oraanga], kia apiapi aia, e okotai ake kubiti?” E tika, kare te tu apiapi e akaroa atu i te oraanga o tetai ke. No reira a Iesu i tuatua ai e: “Auraka e apiapi.” (Mataio 6:25, 27) Inara akapeea e rauka ai te reira?
Te pau anga i teia uianga, ko te taangaanga i te pakari meitaki, te akamatutu anga i te akarongo mou ki roto i te Atua, e te akatupu anga i te manakonako anga mou no te tuatau ki mua. Noatu e kare tatou e na roto nei i te au turanga ngata, penei ka aro atu tatou i te reira a te tuatau ki mua. No reira ka akara ana tatou e akapeea teia au takainga i te tauturu anga ia Paul, Janet, e Alona kia autu i te tu taitaia.
Ka Reka Katoa Koe i Teia
MAATA TE TUMU MANAKO
Te Tu Apiapi o te au Tane—Akapeea te Pipiria me Tauturu
Te kino atura te tu apiapi i teia tuatau “kino maata. Me te akakoromaki nei koe i te tu apiapi, ka rauka ainei i te Pipiria i te tauturu ia koe?
