E yeke na mbeni ngoi so gingo bê ahon ndo ni, ngoi “ti akpale so ayeke ngangu na zo ti kanga bê na yâ ni”. (2 Timothée 3:1). Azo mingi ayeke gi bê ndali ti kpale ti nginza, yâ ti asewa ayeke kangbi, abira, asioni kobela ayeke fâ gbâ ti azo, sese ayeke yengi nga ngu ayeke suku amû ndo. Na ndo ni, e yeke nga na agingo bê ti e wani. Na tapande, e yeke hunda tere ti e: ‘Kobela so a wara na yâ ti tere ti mbi so ayeke gue ti ga cancer la ape?’ ‘Dunia ti atarä ti mbi ayeke duti ande tongana nyen?’

Agingo bê kue la ayeke sioni ape. Na tapande, kozo ti sara mbeni examen, wala même tongana a iri e ti sara lisoro na e kozo ti tene a mû e na kua, e yeke gi bê ti e. Nga, mbeto la ayeke sara si e yeke kpe asioni ye. Me, ti gi bê ahon ndo ni wala ti gi bê lakue la ayeke sioni. Ade ti ninga ape, a gi ye na ndo ti azo ahon 68000, na a bâ so tongana zo agi bê ti lo mingi, lo lingbi ti kui hio. Ndani la si Jésus atene: “Zo wa na popo ti ala, tongana lo ngbâ ti gi bê ti lo, lo lingbi ti zia mbeni kete lango na ndo ti fini ti lo?” Biani, gingo bê ahon ndo ni alingbi pëpe ti sara si fini ti zo aninga. Ni la, Jésus amû wango so, lo tene: “Ala zia ti gi bê ti ala.” (Matthieu 6:25, 27). Me e yeke sara ni tongana nyen?

A hunda ti tene e sara ye na ndara, e duti na tâ mabe na Nzapa nga e duti na tâ beku ti kekereke. Même si laso e tingbi na ambeni ngangu kpale ape, e lingbi ti tingbi na ni mbeni lâ. Ni la, zia e bâ tongana nyen la sarango aye ota so amû maboko na Paul, Janet nga na Alona ti hon ndo ti gingo bê ti ala.