ఆందోళనలతో నిండిన “అపాయకరమైన” కాలంలో మనం జీవిస్తున్నాం. (2 తిమోతి 3:1) ఆర్థిక సమస్యలు, కుటుంబంలో గొడవలు, యుద్ధాలు, ప్రాణాంతక రోగాలు, ప్రకృతి విపత్తులు, మనుషుల తప్పుల వల్ల కలిగే ప్రమాదాలతో చాలామంది తల్లడిల్లిపోతున్నారు. వీటికితోడు ‘నా ఒంటిమీద వచ్చిన ఈ కణితి క్యాన్సర్‌లా మారుతుందా?’ ‘నా మనవళ్ల సమయానికి ఈ లోకం ఏమైపోతుంది? వాళ్లెలా బ్రతుకుతారు?’ వంటి జీవన చింతలు కూడా ఉంటాయి.

కొన్ని విషయాల్లో ఆందోళన పడడం తప్పేం కాదు. పరీక్షలప్పుడు, పదిమంది ముందు ఏదైనా చేయాల్సినప్పుడు, ఇంటర్వ్యూకు వెళ్లేప్పుడు సహజంగానే మనం ఒత్తిడికి లోనవుతాం. ప్రమాదాలు జరగుతాయనే భయం ఉంటే జాగ్రత్తగా ఉంటాం. అయితే తీవ్రంగా లేదా అస్తమానం ఉండే ఆందోళనలు, భయాలు అస్సలు మంచివి కావు. ప్రతీదానికి ఆందోళన పడడం వల్ల చిన్నవయసులోనే చనిపోయే ప్రమాదం ఉందని 68,000 మంది మీద చేసిన తాజా పరిశోధనల్లో తెలిసింది. “చింతించి తన జీవితకాలాన్ని ఒక్క ఘడియ పొడిగించగలవాడు మీలో ఎవరైనా ఉన్నారా?” అని యేసు సరిగ్గానే అడిగాడు. అవును, చింతలు జీవితకాలాన్ని పొడిగించవు. అందుకే యేసు “చింతించకండి” అని చెప్పాడు. (మత్తయి 6:25, 27, పరిశుద్ధ బైబల్‌: తెలుగు ఈజీ-టు-రీడ్‌ వర్షన్‌) అయితే చింతించకుండా ఎలా ఉండగలం?

మనకు కష్టాలు లేకపోయినా, భవిష్యత్తులో ఏ సమస్యా రాదని చెప్పలేం. చింతించకుండా ఉండడానికి సరైన జ్ఞానంతో జీవించాలి, దేవునిపై బలమైన నమ్మకం పెంచుకోవాలి, భవిష్యత్తు బాగుంటుందని దేవుడు చెప్తున్న మాటపై నమ్మకం చూపిస్తూ ఉండాలి. పాల్‌, జానెట్‌, అలోనాలకు ఈ మూడు విషయాలు ఎలా సహాయం చేశాయో తెలుసుకుందాం. (w15-E 07/01)