MAKANI AAYEEME AMUTWE UULI ACIVWUMBYO | MBOTUKONZYA KULWANA PENZI LYAKULIBILIKA
Bantu Boonse Balalibilika!
“Ndakaunka kuyakuula cakulya, pele ndakajana buyo mabbisiketi—alo aakadulide citaambiki! Nobwakaca, zintoolo zyakanyina cakulya cili coonse.”—Ba Paul, baku Zimbabwe.
“Balumi bangu bakandikkazika ansi akundaambila kuti bakali kuyanda kutusiya. Ndakamvwa moyo wacisa. Ino bana bangu ndakali kuyoobalanganya buti?”—Ba Janet, baku United States.
“Ciindi tusayilini notulila, ndilatija kuyooyuba akubbandama aansi ciindi mabbomba naabbotoka. Nokuba kuti kwainda ciindi, maanza aangu inga acikankama.”—Ba Alona, baku Israel.
Tupona muziindi zyakulibilika, “ziindi zikatazya ncobeni.” (2 Timoteyo 3:1) Bantu banji balikopene kapati akaambo kapenzi lyamali, kwaandaana mumikwasyi, nkondo, kubbuka kwamalwazi aajaya, ntenda zilicitikila, alimwi azyeezyo zicitwa abantu. Kuyungizya waawo, kuli kulibilika kwiindene-indene muntu umwi aumwi nkwakonzya kuba ankuko, mbuli kwakuti: ‘Sena cikoto icakajanwa mumubili wangu ciyoosanduka kuba bulwazi bwakkansa?’ ‘Ino bazyukulu bangu bayookomenena munyika iili buti?’
Eeci tacaambi kuti kulibilika kuli koonse nkubi. Ncilengwa buya kulibilika ciindi muntu nayanda kulemba musunko, nayanda kucita cintu cimwi kumbele lyabantu banji, naa kubuzyigwa-buzyigwa natananjila mulimo. Ikuyoowa ntenda kulatugwasya kutantamuka zintu zikonzya kutucisa. Pele kuciindizya kulibilika naa kulibilika ciindi coonse kulakonzya kutunyonganya. Kuvwuntauzya kumwi ikwakacitwa caino-ino kwabantu bainda ku 68,000 kwakatondezya kuti, nokuba kulibilika asyoonto kulakonzya kupa kuti muntu afwambaane kufwa. Nkakaambo kaako Jesu wakabuzya kuti: “Nguni akati kanu kwiinda mukulibilika uukonzya kuyungizya buumi bwakwe naaceya?” Masimpe, kulibilika takuyungizyi buumi bwamuntu. Aboobo Jesu wakakulwaizya kuti: “Amuleke kulibilika.” (Matayo 6:25, 27) Pele ino eeco inga cakonzyeka buti?
Bwiinguzi buyeeme akutobela busongo bugwasya, kuba alusyomo luyumu muli Leza, alimwi akuba abulangizi bwini-bwini bwakumbele. Nokuba kuti aciindi ecino tatujisi mapenzi aakatazya kapati, pesi kumbele alakonzya kuboola. Aboobo atubone kutobela ntaamu eezyi mbokwakabagwasya ba Paul, ba Janet, alimwi aba Alona kulwana penzi lyakulibilika.
Andiza Inga Mwaakkomanina Ayaaya
TWAAMBO TUMWI
Nzyobalibilika Bamaalumi—Bbaibbele Mbolikonzya Kubagwasya
Kulibilika ndipenzi liyaabukomena muziindi ezino zikatazya. Ikuti mulalibilika, sena Bbaibbele lilakonzya kumugwasya?
