Tu kasi ko tembo ya sakalalo haiyo “otembo yohali.” (2 Timoteo 3:1) Valua va kasi oku tala ohali omo liekambo liolombongo, ovitangi vepata, uyaki, ovovei a koka olofa, kuenda ovilunga vi kokiwa lomanu. Eci ci vokiya kasakalalo akuavo ndeci: ‘Anga hẽ apongoloko nda limbuka vetimba liange a ka ndi nenela uvei wo kanser?’ ‘Olonekulu viange vi ka kulila vekalo li pi lioluali?’

Oku kuata esakalalo pamue kacivĩko. Vosi yetu tua siata oku yeva esakalalo eci handi ka tua lingile o seteko yimue, ocindekaise cimue ale ceci tu pulisiwa poku sanda upange woku sanda eteku. Oku kuatela usumba esakalo liaco, ci tu kuatisa oku yuvula ovitangi. Pole, oku tiamisila enene utima kasakalalo aco ci koka ovitangi. Ekonomuiso limue lia lingiwa ndopo, okuti mua kongela ci pitahãla 68.000 kakulu, lia situlula okuti ndaño muẽle oku kuata esakalalo litito ci koka olofa. Eli olio esunga lieci Yesu a pulila hati: “Helie pokati kene, okuti omo lioku sakalala, o tẽla oku vokiya ukeya umosi kotembo yomuenyo waye?” Esakalalo ka li kuatisa omunu oku amamako lomuenyo. Omo liaco Yesu wa lungula hati: “Ko ka kali lohele.” (Mateo 6:25, 27) Eci hẽ ci tẽliwa ndati?

Vetambululo liaco mua kongela oku kapako ukũlĩhĩso wa suapo, wa tiamẽla kekolelo liocili ku Suku kuenda oku pamisa elavoko lietu liokovaso yoloneke. Ndaño okuti cilo ka tu kasi oku liyaka lovitangi ka via lelukile, citava okuti kovaso yoloneke tu ka liyaka lovitangi viaco. Omo liaco, tu kũlĩhĩsi ndomo atosi a tukuiwa a kuatisa Paul, Janet kuenda Alona oku liyaka lesakalalo.