Tukutama mu “ndaŵi jakusawusya” jele kulaga nganisyo kuli palipose. (2 Timoteo 3:1) Ŵandu ŵajinji akulaga nganisyo ligongo lyakusoŵa mbiya, kumala kwa maulombela, ngondo, yilwele yakogoya, soni ngosi. Konjecesya pa yeleyi, ŵane akusadandawula kuti: ‘Ana cakuyimba cacikopwece pa cilu canguci, ngaŵa khansa jeleji?’ ‘Ana yisukulu yangu payicikulaga, cilamboci ciciŵa catuli?’

Mwacipagwa, ŵanduwe tukusalaga nganisyo. Mwambone, mpaka tulaje nganisyo patukusaka kulemba mayeso, kutenda yindu yine pekuga, soni patukwawula kukuwucisya masengo. Yili yisyene kuti kogopa yindu yakogoya kukusatukamucisya kuti tukawulala. Nambope, kulaga nganisyo mwakupundanganya kuli kwakogoya. Pacangakaŵapa, acakulungwa ŵakupunda 68,000 ŵatesile majiganyo gagalosisye kuti kulaga nganisyo, atamose panandipe, kukusatendekasya ŵandu kuwa mwacitema. Yeleyi yikamulana ni yaŵawusisye Yesu kuti: “Ana ŵani mwa jemanja ŵampaka alewuye umi wakwe panandipe ligongo lyakulaga nganisyo?” Kusala yisyene, kulaga nganisyo kwangalewuya umi wa mundu. Ni ligongo lyakwe Yesu ŵasasilesoni kuti: “Mlece kulaga nganisyo” (Matayo 6:25, 27) Nambo ana mpaka tukombole catuli yeleyi?

Kuti tulece kulaga nganisyo tukusosekwa kamulicisya masengo lunda lwa m’Baibulo, kwendelecela kola cikulupi mwa Mlungu, soni kusya cembeceyo cetu camsogolo. Komboleka kuti apano ngatukusimana ni yakusawusya yekulungwa, nambo mwine mpaka tusimane nayo msogolo. Ana kuya yindu yeleyi kwakamucisye catuli Paul, Janet, soni Alona? Kwende tulole.