TEMA STIʼ PORTADA | XI GÚNINU TI CADI CHUʼNU XIZAA
Guiráʼ binni riuu xizaa
«Yesieeʼ guendaró, peru puru galleta si bidxelaʼ ¡guizáʼ caru nuu cani! Sti dxi que maʼ gastiʼ nuu.» (Paul, Zimbabue)
«Gudxi xheelaʼ naa chigusaana laadu. Bilúxeca guidxilayú para naa. Xi guizaaca né ca xiiñeʼ yaʼ.» (Janet, Estados Unidos)
«Ora xhidxi sirena ruxooñeʼ lugar ra zanda guilaʼyaʼ ne riaba layú laga cayaba bomba. Qué rusaana de gacaditeʼ neca maʼ gudiʼdiʼ hora de bizaaca ni.» (Alona, Israel)
Ca dxi nabáninu riʼ nabé nuu stale guendanagana. Zeʼ dxi «jma nagana» modo nabani binni guidxilayú (2 Timoteo 3:1). Stale binni riuu xizaa pur bueltu, pur guerra, pur epidemia ne ca desastre natural ni raca o ni runi binni. Ne laaca nuuruʼ xcaadxi cosa ni riguu xizaa binni. Nuu tu ridxibi gabi doctor laa napa cáncer. Xcaadxi riuucaʼ xizaa xi guizaaca xiiñicaʼ ne xhiágacaʼ.
Gastiʼ naca chuʼ binni xizaa. Nuu tu riuu nervioso ora chiguni ti examen, chiguiníʼ nezalú stale binni o chiyubi dxiiñaʼ. Ne ora riuu binni xizaa racané ni laa cadi gacaná. Peru pa chuʼ xhaatapeʼ binni xizaa la? zanda guni huará ni laa. Caadxi estudiu bíʼnicabe 68,000 binni huaniisi bisihuinni ni ora chuʼ xhaataʼ binni xizaa jma nagueenda rati. Ngue runi, guníʼ Jesucristu: «Neca ñuu tu xizaa ne nuyubi tu modo nibani tu xcaadxi, ñee ñanda nibani tu jma que biaʼ dxi nexhe ibani tu la?». Dxandíʼ, neca chuʼ binni xizaa qué zanda guibani jma. Nga runi, bidii Jesús conseju riʼ: «Cadi cuʼ xa ique tu ximodo ibani tu» (Mateo 6:25, 27). Yanna, xi zanda guni binni ti cadi chuʼ xhaatapeʼ xizaa yaʼ.
Para cadi chuʼ xhaatapenu xizaa caquiiñeʼ gácanu binni nuu xpiaaniʼ, guinábanu Dios gacané laanu ne guni crenu zúnibe cani maʼ guniʼbe. Guidúʼyanu ximodo gucané cani bizéʼtenu riʼ Paul, Janet ne Alona ti cadi chuʼ xhaatapecaʼ xizaa. Zándaca nagasi cadi nuu xhaatanu xizaa, peru qué gánnanu xi zazaacanu despué.
Laaca zándaca ziuuláʼdxiluʼ ca ndiʼ
¡GUTANÁ!
¿Ñee nápaluʼ estrés la?
Nuu stale cosa ni zanda gucueeza estrés nápaluʼ ne cadi tan guninani lii.
