«Süchikijeechon nünaajaain chi tashikai, ‹kawalaʼatasü pia tatuma›, müshi chi taʼwayuusekai tamüin. Shiasaʼa soʼu wanee kaʼi, nuʼluwataaka. Shia neʼe nülüʼüjaka nüsheʼin». Sünüiki Janet tia. Mayaapejeʼe süntüin sünain wanee aʼyatawaa, palit maʼin sükanain. Choʼujaasü wainma nneerü sümüin. Anuujeseʼe sünüiki Janet: «Shapaasü maʼin taaʼin saaʼu tayain aʼyataainjatüin napüleerua na tachonniikana. Jee mojusü maʼin taaʼin saaʼu nnojoluin taapüin namüin süpüshuaʼa tü choʼujaakat namüin. ‹¿Jamüsüche sünüiki wayuu wachiki? ¿Tayache kasitka saaʼin namüin süpüla müinjatüin wakuwaʼipa?›, maʼwaisü taya. Shapaasü taaʼin sutuma tiayaa».

Anasü saaʼin Janet sutuma suʼuraajawalin, arütkaasü shia nünainmüin Maleiwa. Anuu sünüiki Janet: «Mojuwaisü maʼin taaʼin aipaʼa. Jee antajaasü neʼe kasa mojusü tekiiruʼumüin. Shiasaʼa süpüla tatunkuinjatüin, oʼuraajüsü taya jee taashajeʼerüin tü Wiwüliakat. Kamalainsü maʼin tamüin tü pütchi suluʼukat Filipos 4:6, 7, tü makat mayaa: ‹Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin. Otta nnojo motüin jaaʼin aapaa analuʼut nümüin saaʼu tü anasü naaʼinrakat jümüin. Müleka masütaajule jia sünain achuntaa nümüin Maleiwa, aapüneerü wane anaa jümüin nütüma. [...] Jutateena waya suulia shapawaa aaʼin je suulia jülüjaa aaʼin kasa mojusü wanaa sümaa anain waya nütüma›, müsün. Eesü siraale aikat taaʼu sünain oʼuraajaa otta anasü taaʼin nutuma Jeʼwaa».

Wanaa sümaa nikirajüin Jesuu watta naalii wayuu saaʼu wanee uuchi, nikirajüin naya sünain oʼuraajaa. Jee müsia nütütüleʼerüin naaʼin naya wayuukana sükajee nümüin namüin: «Süpülapünaa jüchuntüin, nütüjaa aaʼut chi Jüshikai Maleiwa süpüshua tü cheʼojaakat jümüin» (Mateo 6:8). Ayatüinjanapajaʼa waya oʼuraajüin nümüin Maleiwa süpüla wachuntüin tü choʼujaakat wamüin. Arütkaajeena maʼin waya nünainmüin Maleiwa woʼuraajüle  nümüin. Anuu sünüiki tü Wiwüliakat: «Müleka jürütkaale nünainmüin Maleiwa, arütkaajeechi nia jünainmüin» (Santiago 4:8).

Anasü naaʼin wanee wayuu nuʼuraajüle nümüin Jeʼwaa. Akaʼaya nia, aaʼinmajüneechi nutuma Jeʼwaa sutuma niʼitaain naaʼin nünain. Naainjain tia Jeʼwaa saaʼu niain «chi Aapajakai sünüiki wayuu suʼuraajapa» (Salmo 65:2, TNM). Müshijeseʼe nikirajüin Jesuu na nikirajüinkana süpüla «nachecherüinjatüin naaʼin sünain achuntaa nümüin Maleiwa waneepia» (Lucas 18:1). Ayata wachuntüin nümüin Maleiwa süpüla nuʼunirüinjatüin wakuwaʼipa jee nükaaliinjain waya. Shiimain maʼin naapeerüin wanüiki sümaa nükaaliinjeenain waya. Woʼuraajüle waneepia nümüin Maleiwa, weeʼiyateerü nümüin sünain weʼitaain waaʼin nünain (1 Tesalónica 5:17).

Süpüla kanoulainjachin wanee wayuu, niʼraajüinjachi Maleiwa (Juan 17:3, TNM). Jamüshiijaʼa wekirajaale sünain tü Wiwüliakat, watüjaajeerü aaʼu tü nukuwaʼipakat Maleiwa jee tü jülüjakat naaʼin. Jee müsia watüjaajeerü aaʼu jülüjüin waya naaʼin Maleiwa waneʼewai wakua. Weʼraajüinjachi maʼin Maleiwa maʼaka naaʼin wanee waʼaleewain. Nnojoishi aʼaleewajaain wanee wayuu nümaa wanee yalejee sümaa nnojoluin niʼraajüin maʼin nia. Akaajaa neʼe tü wanoulakat nünain Maleiwa, akooʼomüinraasü shiʼipaʼaya weʼraajüin nia, waaʼinrüle tü keeʼireekat naaʼin otta weʼrüle nükaaliinjain waya (2 Corinto 10:15; Juan 8:29). Eejiraasü Janet sümaa tü shapawaakat aaʼin sutuma kanoulain shia.

Anuu sünüiki Janet: «Tü kooʼomüinkalü atuma tanoula shia sutuma teʼrüin tü naainjakat Jeʼwaa wapüleerua soʼujee tü alatakat wamüin. Nnojoluinjatia anain wakuwaʼipa taaʼinruʼu, wainmaleʼe maʼin tü kasa mojusü alatakat wamüin. Nükaaliinjapajaʼa waya Jeʼwaa waneepia woʼuraajüle maʼin nümüin. Taapüinjatpa analuʼut nümüin Jeʼwaa, sotojoosü taaʼin süpüshuaʼa tü naaʼinrüitpakat tapüleerua. Nükaaliinjain taya wanaa sümaa choʼujaain shia tamüin. Anasü maʼin takuwaʼipa saaʼu kaʼaleewain taya nutuma Jeʼwaa. Anamia maʼin naya, akaaliinjülii naya jee anasü tü nakuwaʼipakat süpüla nashatüin shia na tachonniikana. *

»Tatüjaaitpa maʼin saaʼu jamüin niyouktashaataka Jeʼwaa nooʼulaajiraain na wayuu kasaatkana (Malaquías 2:16). Aisü maʼin nümüin wanee wayuu kawalaʼatale nia sutuma nuʼwayuuse jee shiale tü jietkat kawalaʼatain nutuma suʼwayuuse. Mayaapejeʼe kojuyairüin juya alataka süchikijee nuuʼulaain taya chi taʼwayuusekai, eesü mojuwaire maʼin taaʼin. Shiasaʼa süpüla sujutajaain toulia tia, tachajaain sukuwaʼipa süpüla takaaliinjain wayuu sünain wanee kasayaakejeʼe». Nnojotsü akaaʼinraain Janet noulia na saʼaleewainkana (Proverbios 18:1). *

Anuu sooʼomüin sünüiki Janet: «Amülialaasü taaʼin sutuma tatüjaain saaʼu niain Maleiwa nashin ‹na mooʼutshiikana otta naaʼinmajüin na jieyuu ouktakana aʼwayuuse›. Nnojoleechi nia oʼunajaain woulia maʼaka naaʼin chi taʼwayuusekai» (Salmo 68:5, TNM). Sütüjaa aaʼu Janet nnojoluin nuuʼulaküin waaʼin Maleiwa sükajee kasa mojusü. Nia aapakaʼaya Maleiwa wamüin kekiiwaa jee müsia yalayalasü waaʼin nutuma süpüla eejiraain waya sümaa tü shapaakalü atuma waaʼin (Santiago 1:5, 13; 2 Corinto 4:7).

¿Jama shapaale waaʼin sutuma sülatalaʼa sümüle wanee kasa mojusü wamüin? ¿Kasa waaʼinrajatka?