Mi Chanɛt dimi aa, “Mɛɛ finya nuu vi, o viu bɛɛ le mi pɔnɔ nuu dimulla aa o nɔ yeemɛi o wana lanɔ cheleŋ niŋ. Okoŋ kɔɔli, o choŋguŋ bɛɛ ya le, mbo soli nyɛla ndɔlaŋ chiɛiniŋ. Mbo mɛi ya a chuauwaa ŋiɔɔŋaa naŋ velu wa.” Mi Chanɛt sɔla baalaa, kɛ kanii baalaa ve i bɔɔ le bahawɛila ndalaŋ solioo le. Nduyɛ, o ve ko bahawɛi ikanioo le wa buulaŋ ndɔɔ le. Mi Chanɛt dimi vɛlɛ aa, “Buulaŋndo wa ya puɛɛ le kalaŋ sɛnɛi ya luɛi hoo lebɛŋgu wo. Mi bii yapila tɔɔyaŋ le mɛɛ ya ve chuauwaa niaa kioo nyɛ nda yeema wo mɛɛ kalaŋ chuauwaa cheleŋnda wa tosaa yɛ le. Suŋ suŋ bɛɛ, buulaŋndo cho ya le nyɛ acheleŋnda a chuauwaa niaa cho dimi wo. Baa a cho pa yiyaŋndo maa I tosa nyɛ o nyɛ le nɔ nuu mandaa le?”

Yɛɛ ndoo mala yɛ Chanɛt le chaŋyɛi cho ndu tɛɛŋ nda Mɛlɛka ve mandaa? Piɛileŋ. Mbo dimi aa, “Ichɔl yaa buulaŋ tau ni te nyɔɔ mei pɛ doŋ doŋ. Kɛ piɛileŋ a Baabuiyo nuaa ndoo mala ya ni mi lɔl. Nduyɛ, bolle Baabui ya kaala tau leŋ le cho Filipiaŋnda 4:6, 7 ni. Le dimi aa, “La nɔ buulaŋ o isɔɔ o isɔɔ niŋ te. Nduyɛ, isɔɔ o isɔɔ nya va Mɛlɛka piɛiyo le ndi pɛ, la chɔm ndu nyɛ nya hau ba le ndu wo. Nduyɛ, pɛŋgu o pɛŋgu nya va ndu nyunaa le nyɛ o nyɛ pɛ, la mel ndu balikaa. O koŋ kɔɔli, kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo nɔla mbo manda kɔlta nyalaŋ, a yiyaŋnda nyalaŋ.” I wa piɛileŋ ichɔl o ichɔl. Nduyɛ, kɔl nyulu Chɛhowa ke wana wo dɛɛniaa ya kɔllo ni.”

Diomnda Chiisu dimi o piɛile o pɛɛku buɛiyaa nduaa o pembei choo leŋ la nɔla mila mala naa o buulaŋ o buulaŋ niŋ. Mbo dimi aa, “Mɛlɛka Finya nya ndu sina nyɛ o nyɛ nya hau ba le ndu lɔɔpa bɛɛ nya nyuna ndu.” (Maatiu 6:8) Nduyɛ, ŋ nɔ kuee miŋ nyuna ndu. Piɛileŋ le cho nyɛ tasoo ni le ‘sɔɔŋguu wo Mɛlɛka ikɛi.’ Yɛɛ cho yɛ wa fulamakɔɔlioo? Mɛlɛka “bɛɛ o cho nya sɔɔŋguu ikɛi.”—Chemisi 4:8.

O cho ko kɔl nyuloo o buulaŋ naa niŋ te piɛileŋ le ke naa le. Kɛ Chɛhowa, “wana muli piɛileŋ ndo” nɔla mbo mala wanaa cho ndu piɛiyo a tiindaŋndo  wa. (Chondei 65:2, NW) Le saboo hoo Chiisu pɛɛku buɛiyaa nduaa ni maa, “a nɔ le Mɛlɛka piɛiyo lɔɔ lɔɔ, maa a wu ŋdial te.” (Luku 18:1) Ŋ nɔ miŋ hiou lachi a Mɛlɛka nyunaa lɔɔlɔɔ le naa nɛi chɔmaa ndɔɔ kioo a naa malaa. Nduyɛ, miŋ nɔ laalaŋndo maa o cho naa salaa dɔuwɔɔ le tiindaŋ naŋ dɔu o ndu niŋndo. Ŋ nɔ miŋ kiisaŋ a kpaaya o nɔ le naa malaa wo le. O yeema naa malaa. Mɛlɛka “piɛiyo teleŋ o teleŋ” chɔm maa ŋ nɔ tiindaŋ kpeekpeiyo o ndu niŋ.—Tɛsaloniaŋ Tasoo 5:17.

Yɛɛ kpeekpei tiindaŋndo sim yɛ? Tiindaŋndo cho ni, “sinaa” wana suu Mɛlɛka cho wo. (Chɔŋ 17:3) Ŋ kandu hei tosaa te o yɔŋ pɛ miŋ sina yiyaŋ Mɛlɛkaa o Baabuiyo niŋ. Ŋ pɛɛku maa Mɛlɛka cho naa chɔɔ kpou, nduyɛ maa, o yeema mbo mala naa mɛɛ naŋ cho kpou. Tiindaŋ kpeekpeiyo nɔɔ cho ko sinaa a Mɛlɛka okɔɔ le. Kɛ, chaŋyɛi kpeekpeiye nɔɔ a ndu okoŋ, miŋ ke ndu bɛɛleŋ. Teleŋndo yeemaŋ le chaŋyɛi tosaa a chaaŋ num wana chioo. Ŋ tosa chaŋyɛi a Mɛlɛka o lɔma lediiŋ bɛŋgu le. Tiindaŋ naa ‘hiau lachi’ o Mɛlɛka niŋ te o yɔŋ pɛ miŋ sina mala o cho naa kioo lɔɔlɔɔ wo. (Kɔliŋtiaŋ Diiŋ Ndɔɔ 10:15; Chɔŋ 8:29) Tiindaŋ suu waa naa mala Chanɛt ni mbo pɛŋgi buulaŋndo.

Mi Chanɛt dimi aa, “Nyɛ mala ya mi chɔɔlu tiindaŋndo nɔ wo cho ni, lɔɔlɔɔ I wa chɔɔ mala Chɛhowaa o nyɛ o nyɛ niŋ. Teleŋndaŋ lapum, miŋ che kafalaŋ puɛɛ. Nduyɛ, miŋ yiyaŋ maa ŋ tiuba le laŋ biunɔŋndo le. Ŋ wa piɛiyo teleŋ o teleŋ o Chɛhowa lo. Hoo tosa ni miŋ tiuba le kafalaŋ biunɔŋndo. Ndoo lo pɛ o naapila niŋ, yaa sina niŋ mɛɛ naŋ yɔŋ yɛ le. Te I mel pɛ Chɛhowa balikaa, koŋ loonuŋ ya a nyɛ o nyɛ o tosalla. Teleŋ kpeekpei naŋ yeema mala ndɔɔ wo o mala naa ni. * O ke ya chaŋyaŋ kɛndɔŋ o kunda leKilisiɔŋndo niŋ. Chaŋyaŋ muŋ cho ya lɔɔlɔɔ malaa. Nduyɛ, tamasi kɛndɔɔ pila ŋ cho le chuauwaa niaa ni.”

“I sina le nyɛ Chɛhowa dimi o Malakai 2:16, (NW) niŋ aa, ‘I tul kɛyaŋndo leyɛ’ wo. Te wana chal o nɔɔ niŋndo kɛɛ pɛ chaaŋndɔ a siɛlɛi fuu, koŋ cho machuaa mɛɛ ŋ pisi naa waŋndo chi yɛ. Wɔsiŋ bɔɔbɔɔ hiou niŋ teleŋ pɔnɔ nuu kɛɛ ya wo. Kɛ teleŋ ndaŋ lapum, mi wana pilɛyɛi biiya. Mi yiyaŋ maa I cho wana sɔwɛ le. Te hei hiŋ ya pɛ o kɔl, I kindiŋ le waŋndo wallo malaa. Hei mala ya vɛlɛ ni.” Chanɛt wa lɔɔlɔɔ waŋnda holnɔŋndo, a mɛɛ Baabuiyo sila yɛ. Hei mala ndu ni mbo dɔɔniaa buulaŋndo o tiŋ.—Talelaŋ 18:1, NW. *

Mi Chanɛt dimi aa, “nyɛ dɛɛniaa ya kɔllo wo cho sinaa ni maa ‘Mɛlɛka ndu cho finyaa le wanaa nɔ ŋfinya le wa ni. Ndu manda wanaa nɔ ŋpiaandu le wa ni.’ Fɛɛŋ fɛɛŋ bɛɛ Mɛlɛka ndu kɛɛ ya mɛɛ pɔnɔ nuu ndu kɛɛ ya yɛ le.” (Chondei 68:5, NW) Chanɛt sina maa Mɛlɛka dɛɛniaa naa le yɔŋ wɔɔŋndo tosaa le. Mɛlɛka ndu ndu, “wana ikɛndɔɔ” o cho ni. Ndu ke wana o wana fee taasioo ni. Nduyɛ, ndu ke naa “kpaaya bɛndu” ndɔɔ le naa malaa miŋ pɛŋgi buulaŋndo ni.—Chemisi 1:5, 13; Kɔliŋtiaŋ Diiŋ Ndɔɔ 4:7.

Kɛ te o wa yɛ miŋ luɛi o buulaŋndo niŋ le mɛɛ yoomu naa cho o kpundɔɔ niŋ yɛ?