KATAK KO KÕN TAITÕL̦IN BOK IN | WÃWEEN BWE EN DIKL̦O̦K AM̦ INEPATA

INEPATA KÕN APAÑ KO REJ WAL̦O̦K ILOWAAN BAAM̦LE

Janet ej ba: “Ãlikin wõt an kar mej jema, l̦eo ippa ear ba ñan ña ke ej loe bar juon kõrã. Ejjabto tokãlik, ear jab kõnnaanek eõ m̦oktal̦o̦k, ak ear bũki aolep nuknuk ko an im etal jãn ña im ajri rã ruo nejũm̦ro.” Janet ear lo juon an jerbal, bõtab ear dik on̦ãn ñan kõl̦l̦ãik on̦ãn m̦weo im̦weer. Ebar lõñ apañ ko ear iiooni ijello̦kun an apañ kõn jããn. Ej ba: “Ear l̦ap aõ inepata kõn eddo ko rekããl iar aikuj make kate eõ ñan kõm̦m̦ani. Ear nana aõ mour kõnke iar jab maroñ kabwe aolep aikuj ko an ajri rã nejũ ãinwõt rũtto ro jet. Kiiõ, ij bar inepata kõn wãween an ro jet watõk ña im ajri rã nejũ. Ijaje ñe rej l̦õmn̦ak bwe iar jab kate ña ñan kõm̦m̦an bwe en em̦m̦an wõt kar pãd eo am̦ro.”

Men eo ear jipañ Janet ñan kijenmej wõt ej ilo an jar im kate bwe en epaakel̦o̦k wõt Anij. Ej ba: “El̦aptata an pen in boñ ñe ejjel̦o̦k keroro im ejjab bõjrak aõ l̦õmn̦aki men ko ij inepata kaki. Men ko rekõn jipañ eõ bwe in kiki ej ñe ij jar im riit Baibõl̦. Juon iaan eoon ko rem̦m̦antata ippa ej Pilippai 4:6, 7 me ej ba: ‘Kom̦win jab inepata kõn jabdewõt, a ilo men otemjej kõn jar im akwel̦ap kab kam̦m̦oolol, kajjitõk ko ami ren wal̦o̦k ñan Anij. Im aenõm̦m̦an jãn Anij, eo ej el̦l̦ã jãn jel̦ã otemjej, enaaj kõjparok bũruomi im l̦õmn̦ak ko ami.’ Elõñ boñ ij jar ñan Jeova im loe an kaenõm̦m̦an eõ.”

Naan ko an Jijej ilo Katak eo an ioon Tol̦ eo kõn wãween jar remaroñ jipañ kõj kõn aolep inepata ko ad. Ear ba: “Jememwõj ejel̦ã men ko kom̦ij aikuj m̦okta jãn ami kajjitõk ippãn.” (Matu 6:8) Jej aikuj kajjitõk jipañ ippãn Anij. Jar ej wãween eo el̦aptata an maroñ jipañ kõj bwe jen “ruwaakl̦o̦k ñan Anij.” Ñe jej kõm̦m̦ane men in, Anij ‘enaaj ruwaaktok ñan kõj.’​—Jemes 4:8.

Jar ejjab baj jipañ wõt kõj bwe en em̦m̦anl̦o̦k ad mour kõn ad kwal̦o̦k inepata ko ad. Jeova eo ej “roñjake jar,” im ej jipañ aolep ro rej kwal̦o̦k aer tõmak  ilo e. (Sam 65:2) Eñin unin Jijej ear katakin rũkal̦oor ro an bwe ren “jar iien otemjej im jab ebbeer.” (Luk 18:1, UBS) Jej aikuj kajjitõk wõt ippãn Anij bwe en tõl im jipañ kõj, im lõke bwe enaaj jipañ kõj kõn ad tõmak ilo e. Jen jab pere maroñ ak kõn̦aan eo an ñan jipañ kõj. Ñe jej “jar iien otemjej” im kajjitõk jipañ, jej kaalikkar bwe elukkuun m̦ool ad tõmak.​—1 Tessalonika 5:17, UBS.

TA MEL̦EL̦EIN ÑE EJ WÕR TÕMAK IPPÃD?

Ta in tõmak? Tõmak ekitibuj ad lukkuun “jel̦ã” kajjien Anij. (Jon 17:3) Jej kõm̦m̦ane men in ilo ad m̦oktata katak kõn l̦õmn̦ak ko an Anij me repãd ilo Baibõl̦. Jej katak im jel̦ã bwe ej lo kõj kajjojo im ekõn̦aan jipañ kõj. Bõtab, tõmak eo em̦ool ejjab itok jãn ad jel̦ã wõt kõn Anij. Tõmak eo em̦ool ej itok jãn ad epaake Anij im ad kautieje. Jeban kajju epaake Anij ãinwõt ad ban kajju epaake juon armej ilo juon wõt raan. El̦ak tol̦o̦k ad katak kõn Anij, ej “eddekl̦o̦k” ak l̦apl̦o̦k wõt tõmak eo ad. Ej bareinwõt l̦apl̦o̦k tõmak eo ad ñe jej “kõm̦m̦an men ko rej kabuñbũruon,” im ñe jej lo an jipañ kõj. (2 Korint 10:15; Jon 8:29) Tõmak rot in ear jipañ Janet bwe en dikl̦o̦k an inepata.

Janet ej ba: “Men eo ear l̦ap an jipañ eõ bwe en l̦apl̦o̦k aõ tõmak ej ñe ij lo an Jeova jipañ eõ. Elõñ iien kõmij iioon wãween ko rejjab jim̦we jãn ro jet me epen ammim kõm̦adm̦õdi. Ak il̦ak jar wõt ñan Jeova, aolep iien ej jipañ kõm ilo wãween ko me iban kar maroñ l̦õmn̦ak kaki. Ñe ij kam̦m̦oolol e, men in ej kakeememej eõ kõn joñan an l̦ap an jipañ eõ. Aolep iien ej jipañ kõm ilo iien ko rekkar, im enañin aolep iien ilo iien ko kõm lukkuun aikuj jipañ. Im ear letok ñan eõ jet m̦õtta ro rem̦ool. Rein rej rũttõmak ro m̦õtta. Aolep iien repojak in jipañ ña im joñak ko aer rem̦m̦an ñan ajri rã nejũ.” *​—Lale kõmel̦el̦e eo itulal̦.

“Ijel̦ã unin an Jeova ba bwe ‘edike jepel’ ilo bokin Malakai 2:16. El̦ap an metak bũruõ kõnke meñe ejjel̦o̦k ruõ, ak l̦eo ippa ear jab m̦ool im tiljek ñan ña. Meñe emootl̦o̦k de elõñ iiõ jãn ke ear etal jãn ña, ak jet iien ij bũrom̦õj im l̦õmn̦ak bwe ejjel̦o̦k tokja. Ñe ij bõk eñjake kein, ij kajjioñ kõm̦m̦ane juon men ñan jipañ ro jet. Men in ear bar l̦ap an jipañ ña.” Ilo an kar Janet l̦oore naanin kakapilõk eo ilo Baibõl̦ me ej ba bwe jen jab kamakel̦o̦k iaad jãn ro jet, men in ear jipañe bwe en dikl̦o̦k an inepata.​—Jabõn Kõnnaan 18:1.

Janet ej ba: “Men eo ear l̦aptata an kaenõm̦m̦an eõ ej ilo aõ jel̦ã bwe Anij ej ‘Jemãn ro ejjel̦o̦k jemãer’ im ‘Riekajet an ro ejjel̦o̦k l̦eo pãleer.’ Eban ilo̦k jãn kõm ãinwõt kar l̦eo ippa.” (Sam 68:5) Janet ejel̦ã bwe Anij ejjab kõm̦m̦an bwe jen iiooni men ko renana. Ejel̦ã bwe Anij ej letok mãlõtlõt ñan “armej otemjej” im “maroñ eo ekanooj l̦ap” ñan jipañ kõj bwe en dikl̦o̦k ad inepata.​—Jemes 1:5, 13; 2 Korint 4:7.

Ak ta el̦aññe jej inepata kõnke mour ko ad repãd ilo kauwõtata?

[Kõmel̦el̦e eo itulal̦]

[Naan ko ilo peij 7]

Anij ej “Jemãn ro ejjel̦o̦k jemãer, Riekajet an ro ejjel̦o̦k l̦eo pãleer.”​—Sam 68:5