Janet wati: “Etyi tate anyima pakala vala katutu, omulume wange amphopila okuti kanthyande vali, uhanda omukai omukuavo. Pakala vala katutu, atyindi ovipuka viae, aende tyihandekelele, anthyi-po novana vetu vevali.” Janet avasi ovilinga, mahi onombongo afetwa ankho kambutuuka okufetela ondyuo omu vakala. Ankho otyiho ena hatyo-nombongo vala. Janet wati: “Ankho nasukalala novipuka ovinyingi, mahi otyipuka ankho tyindingisa vali unene otyiho, okutekula ovana andyike. Ankho ndyilivela onombei, mokonda hityivili okuavela ovana vange atyiho vesukisa, ngetyi tyilinga vakuetu. Na hono, ndyina otyiho tyo ñgeni vakuetu vasoka konthele yange, novana vange. Okuti vasoka okuti ame halingile ononkhono opo otyinepo tyetu tyitualeko?”

Tyakuatesako Janet okufinda otyiho ankho ena, nokupameka oupanga wae na Huku, omalikuambelo. Wati: “Omuvo wepuiya vali kuame, okounthiki, putyina ovanthu aveho velele, iya ame ndyitualako nokusoka. Tyinkhuatesako okumona olumphoki, okulikuambela, nokutanga Ombimbiliya. Otestu ndyihole vali, o Filipenses 4:6, 7 yati: ‘Muhakalei notyiho notyipuka natyike, mahi, muaviho, itei unene ku Huku nomalikuambelo kumwe nokupandula. Iya ombembwa ya Huku, ipona onondunge nomalusoke aeho, maiyungu omitima vienyi nomalusoke enyi.’ Ame ndyikala ovinthiki ovinyingi nokulikuambela, moluotyo ndyihole okulitehela okuti ombembwa ya Jeova inthulisa omutima.”

Onondaka Jesus apopile Melongomona liae alingilile Komphunda konthele yelikuambelo, mbupondola okutukuatesako muatyiho tyitulingisa otyiho, wati: “Tate yenyi, wii ovipuka patyi onwe muesukisa, tyina nkhele muhenemuite.” (Mateus 6:8) Iya, onthue tuesukisa okumuita. Elikuambelo oyo ondyila yotete tuna, opo “tufuene ku Huku.” Inkha tulinga ngotyo, oityi matyitundilila-ko? “Nae mafuene kuonthue.”—Tiago 4:8.

 Tyotyili, elikuambelo ha pala vala okutukuatesako okulitehelela nawa mokonda tuapopila Huku atyiho tyitusukalalesa. Mahi, Jeova “Omuteheleli womalikuambelo,” nae ukuatesako aveho vemuovola nekolelo. (Salmo 65:2) Otyo Jesus alongesila ovalanduli vae ‘vatualeko okulikuambela tyihatalama.’ (Lucas 18:1) Onthue tuna okutualako okuita ehongolelo lia Huku, nombatelo yae. Tupu, tuna okukala nonthumbi yokuti meketuyamba. Katupondola okuhuhana, okusoka okuti Huku kametukuatesako. “Okulikuambela apeho,” oyo onkhalelo tupondola okulekesa okuti tuna ekolelo liotyotyili.—1 Tessalonicenses 5:17.

Mahi tyili-tyili ekolelo oityi? Okukala nekolelo tyakutikinya “okunoñgonoka” okuti Huku omunthu. (João 17:3) Matukala nenoñgonoko olio, mokulilongesa omalusoke a Huku mo Mbimbiliya. Okulinga ngotyo, matunoñgonoka okuti Huku weete kese umwe puonthue, iya uhanda okutukuatesako. Mahi, okukala nekolelo liotyotyili, ha-kunoñgonoka vala ovipuka vimwe konthele ya Huku. Tupu, tyesukisa okukala nonthilo nae, noupanga nae. Ngetyi tulinga oupanga novanthu vakuetu, oupanga na Huku kaulingwa vali monthiki ike. Ekolelo lietu “litualako okuliyawisa” mokueenda kuomuvo, putyina tutualako okulilongesa konthele yae, “nokulinga ovipuka vimuhambukiswa,” na tyina tuimbuka onkhalelo etukuatesako. (2 Coríntios 10:15; João 8:29) Ekolelo ngolio, olio liakuatesako Janet okulwisa otyiho ankho ena.

Janet wati: “Etyi tyankhuatesako tyili-tyili okukala nekolelo, okuimbuka okuti Jeova unkhuatesako mononkhalelo ambuho. Ovikando ovinyingi, tualambelele mononkhumbi mbumwe, tyina tutala ngoti ankho kamatutyivili okumbufinda. Mahi, nomalikuambelo Jeova wetukuatesako monkhalelo imwe ame ñgeno nehevilile. Tyina ndyimupandula, ndyihinangela oñgeni Jeova ankhuatesako unene. Apeho utukuatesako momuvo waviuka, momuvo watamo. Tupu Jeova wampha omapanga otyotyili, ovalume novakai Ovakristau ovakuatyili. Omapanga oo apeho ankhuatesako iya aavela ovana vange onongeleka onongwa.” *

“Mu Malaquias 2:16 Jeova wati: ‘Okulihenga ame ndyityiyele.’ Ame nanoñgonoka oityi Jeova apopila ngotyo. Mokonda tyiihama unene ku una walavisua. Pahe palamba omanima, tunde etyi omulume wange etusapo, mahi pamwe nkhele ndyilitehelela ngoti mokati kange mutupu natyike, ngoti muesala vala ombundi. Tyina ndyilitehelela ngotyo, ndyiovola okukuatesako vakuetu, iya otyo apeho tyinkhuatesako.” Mokuendela monondonga mbo Mbimbiliya konthele yokulityilika okukala aike, Janet watepulula otyiho ankho ena. *—Provérbios 18:1.

Janet wati: “Tyamphameka unene, okunoñgonoka okuti Huku ‘o he yovana vehena he, tupu omukoyesi wo vahepe.’ Kametuyeke-po ngetyi tyalinga omulume wange.” (Salmo 68:5) Janet utyii okuti Huku ketulolo “novipuka ovivi.” Mahi, “wavela aveho otyali” ounongo, tupu utuavela “ononkhono mbavilapo” opo tutyivile okulwisa otyiho.—Tiago 1:5, 13; 2 Coríntios 4:7.

Mahi inkha tuna otyiho mokonda yomuenyo wetu ukahi motyiponga?