Janet a konta: “Djis despues ku mi tata a fayesé, mi esposo a bisa mi ku e tin un otro hende muhé. I riba un dia, sin bisa niun pia di palabra, el a kue su pañanan i a bandoná ami ku nos dos yunan.” Janet a haña un trabou, pero e no tabata gana sufisiente pa paga e hipotek di nan kas. Pero, no ta preokupashon finansiero so e tabatin. Janet a sigui bisa: “Tur e responsabilidatnan ku mi so tabatin ku karga awor tabata di mas pa mi, anto esei a preokupá mi mashá. Mi a sinti mi malu pasobra mi no por a duna mi yunan tur loke otro mayornan ta duna nan yunan. Te awe mi tin ripara di kon otro hende ta mira ami ku mi yunan; nan lo ta puntra nan mes si mi a hasi tur loke mi tabata por pa skapa mi matrimonio.”

Orashon ta yuda Janet dominá su emoshonnan i hala mas serka Dios. El a bisa: “E momentonan di mas difísil ta anochi ora ku ta reina un silensio i mi preokupashonnan ta invadí mi. Pa mi pega soño mi ta lesa Beibel i hasi orashon. Un di mi tekstonan faborito di Beibel ta Filipensenan 4:6 i 7 ku ta bisa: ‘No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason i boso mente.’ Mi a pasa anochinan largu ta hasi orashon, i mi a sinti kon e pas di Yehova ta konsolá mi.”

Den e Sermon Riba Seru Hesus a bisa algun palabra konsolador ku por yuda nos ku tur sorto di ansiedat: ‘Boso Tata sa kiko boso tin mester asta promé ku boso pidié.’ (Mateo 6:8) Pero nos tin ku pidié sí, pasobra esei ta e manera prinsipal pa “hala serka Dios.” I komo resultado, ‘e lo hala serka nos.’—Santiago 4:8.

 Sí, orashon ta laga nos sinti nos mes bon pasobra nos ta ekspresá nos preokupashonnan. Pero e ta bai mas aleu ku esei. Yehova, esun “ku ta skucha orashon,” lo yuda tambe tur esnan ku ta pone fe den dje. (Salmo 65:2) P’esei Hesus a siña su siguidónan ku “semper nan mester hasi orashon sin entregá.” (Lukas 18:1) Semper nos mester pidi Dios pa e guia nos i yuda nos, ku e konfiansa ku e lo kontestá nos orashonnan. Nos no tin nodi di duda mes ku Dios ke i por yuda nos. Ora nos “hasi orashon konstantemente” den e manera akí, nos ta demostrá ku nos tin un fe fuerte.—1 Tesalonisensenan 5:17.

Pa nos por tin fe, nos “tin ku siña konosé” Dios komo persona. (Huan 17:3) Na promé lugá, nos tin ku analisá Beibel pa nos siña kon Dios ta pensa. Por ehèmpel, nos ta siña ku e ta interesá den nos i ke yuda nos. Sinembargo, un fe fuerte ta enserá mas ku djis sa algu tokante Dios. Nos mester tin un amistat será kuné tambe. Meskos ku ora nos ta amigu di un hende, nos sa ku e amistat ei no ta krese di un dia pa otro. Pues nos fe “ta sigui krese” segun ku nos ta siña mas tokante Dios, ora nos “ta hasi loke ta agrad’é” i segun ku nos ta mira kon Dios ta yuda nos. (2 Korintionan 10:15; Huan 8:29) Ta e sorto di fe akí ta yuda Janet trata ku su ansiedat.

Janet a bisa: “Loke ègt a duna mi mas fe ta ora mi a mira kon Yehova a yuda mi. Hopi biaha nos a enfrentá inhustisia ku a parse imposibel pa trata kuné. Despues di a hasi hopi orashon, semper Yehova a bini ku un solushon ku nunka mi mes por a kai ariba. Ora mi gradisí Yehova, mi ta kòrda kuantu kos el a hasi pa mi. Semper el a yuda nos ora ku mas nos tabatin mester di dje, i hopi biaha e yudansa ei a bini nèt na tempu. Tambe el a duna mi bon amigu, berdadero kristiannan ku semper t’ei pa mi i ku ta un bon ehèmpel pa mi yunan.” *

Janet a konta: “Awor mi sa dikon Yehova ta bisa na Malakias 2:16 ku e ‘ta odia divorsio.’ Pa e kasá inosente esaki ta e akto di traishon di mas pió. Maske hopi aña a pasa for di dia ku mi esposo a bai laga nos, ainda mi sa sinti un bashí di paden. Na momentonan asina, mi ta purba di hasi algu pa un otro hende, i esei semper ta pone mi sinti mas mihó.” Pues Janet a logra sinti ménos ansiedat debí ku el a sigui e prinsipio di Beibel di evitá di isolá su mes. *—Proverbionan 18:1.

Janet a bisa: “Mi konsuelo di mas grandi ta ku mi sa ku Dios ta ‘un tata di huérfano i un hues pa biuda.’ Nunka lo e bandoná nos manera mi esposo a hasi.” (Salmo 68:5) Janet sa ku Dios “no ta pone ningun hende na prueba ku kos malu.” Al kontrario, e ta duna sabiduria na “tur hende generosamente” i ta duna nos “e poder ku ta surpasá esun di hende” pa yuda nos trata ku ansiedat.—Santiago 1:5, 13; 2 Korintionan 4:7.

Pero, awor kiko si nos ta preokupá pasobra nos bida ta na peliger?