“I muri poto ake te takake anga toku papa, kua akakite mai taku tane kiaku e te aere kapiti nei raua ko tetai vaine,” i karanga ai a Janet. “I muri mai, ma te kore e akamatakite anga e te aere ra aia, kua rave aia i tana au apinga e tona kakau e kua akaruke iaku e ta maua nga tamariki.” Kua rauka ia Janet tetai angaanga, inara kare e rava ana te moni i te tutaki i to ratou are. Pera katoa kua aro atu aia i te au manamanata ke mai. “Te taitaia maata no te au apainga ou taku ka anoanoia kia akono ko au anake ua, kua riro ei mea teiaa roa,” i akamaara ai aia. “Kua manako tataraapa au no te mea kare e rauka iaku i te akono meitaki i taku nga tamariki mei tetai au metua rai. I teianei, te manamanata ra au no runga i to tetai ke manako iaku e taku nga tamariki. Te manako ra ainei ratou e kua rave au i taku i rauka i te paruru i toku akaipoipo?”

Te tauturu ra te pure ia Janet kia akatere i tona uaorai au manako e kia paruru i tona pirianga oa ki te Atua. “Ko te po te taime ngata roa atu kare e maniania, e kare e rauka iaku i te akakore i te manako taitaia. Ka riro te pure e te tatau anga Pipiria ei tauturu iaku kia moe. Tetai irava taku i reka roa atu ko Philipi 4:6, 7: ‘Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako.’ Kua pure ua ana au i te au po e kua kite mai au i te au o Iehova te akapumaana anga mai iaku.”

Ko te tuatua akamaroiroi a Iesu no te pure i roto i tana ako anga i te maunga, te tau ra te reira ki te au tu taitaia katoa: “Kua kite ana to kotou Metua i te au mea e tau ia kotou, ou kotou i pati atu ei.” (Mataio 6:8) Ae, ka anoanoia rai tatou kia pati atu kiaia. Ko te pure te mataara maata e rauka ai ia tatou i te  “akavaitata atu ki te Atua.” Me akapera tatou, eaa te ka tupu mai? “Nana e akavaitata mai kia kotou na.”​—Iakobo 4:8.

Ae, ka tauturu te pure ia tatou kia manako meitaki no te mea kua akakite tatou i to tatou au taitaia. Pera katoa ko Iehova “tei akarongo i te pure,” ka tauturu aia i te aronga pouroa tei kimi iaia ma te akarongo. (Salamo 65:2) Ko te tumu teia i apii ei a Iesu i tana au pipi “kia tamou marie ratou i te pure, auraka e maromaroa.” (Luka 18:1) Ka anoanoia tatou kia pati ua rai ki te Atua no tana arataki anga e tana tauturu, ma te irinaki e ka akameitaki mai aia ia tatou no to tatou akarongo. Auraka tatou e ekoko e kare aia e inangaro i te tauturu ia tatou. Me “pure putuputu” tatou na roto i teia mataara, te akaari ra te reira e e akarongo mou tikai to tatou.​—1 Tesalonia 5:17.

Eaa tikai te akarongo? Ko te akarongo koia oki, “kia kite” tatou i te Atua e tona au tu. (Ioane 17:3) Ka rave tatou i teia na te apii anga i to te Atua manako i roto i te Pipiria. Ka kite mai tatou e te akara maira aia ia tatou tataki tai e ka inangaro aia i te tauturu mai ia tatou. Noatu ra, ko te akarongo mou, kare ko te kite ua anga i tetai mea no runga i te Atua. Mari ra ka anoanoia kia rauka tetai pirianga oa e te ngateitei kiaia. Mei tetai pirianga oa rai ki tetai taeake, kare teia pirianga e tupu ua i te po okotai. Ka “akamaataia” to tatou akarongo i te tuatau ka aereia e me apii maata atu tatou no runga iaia, ia tatou e rave ra “i te mea e mareka mai ei aia,” e ia tatou e kite ra i tana tauturu. (2 Korinetia 10:15; Ioane 8:29) Ko teia te tu akarongo tei tauturu ia Janet kia autu i te tu taitaia.

“Te mea tei tauturu tikai iaku i te akatupu i toku akarongo, ko te kite anga i to Iehova rima te tauturu anga iaku i te au rā katoa,” i karanga ai a Janet. “E maata te taime kua aro atu matou i te au turanga tau kore tei ngata i te akakoromaki. Inara ma te pure putuputu, kua akaari mai a Iehova i te mataara kia akakoromaki i te reira e kare rava au i kite ana i mua ana. Me akameitaki au iaia, ka akamaara au i te au mea pouroa tana i rave noku. E tauturu ua ana aia ia matou i te taime tau tikai. E kua oronga mai aia i te au oa mou, e au tane e te au vaine Kerititiano ngakau tae. Te vaitata ua ra ratou kiaku e e akaraanga meitaki ratou no taku nga tamariki.” *

“Kua kite au i te tumu i karanga ai a Iehova ia Malaki 2:16 e e ‘mea riri oki naku te kopae.’ Ki te tokorua tiamā, e pikikaa kino tikai te reira. Kua pou tetai au mataiti te akaruke anga taku tane iaku, inara i tetai taime e manako puapinga kore ana au iaku uaorai. Me manako akapera au, ka tauta au i te tauturu atu i tetai tangata ke, e ka riro ua rai teia ei tauturu mai iaku.” Na te akono anga i te kaveinga Pipiria kia kore e akatakake iaia uaorai mei te tangata, kua iti mai to Janet tu taitaia. *​—Maseli 18:1.

Karanga a Janet e, “Ko te mea pumaana roa atu kiaku, te kite anga e ko te Atua ‘te Metua o te au matiroeroe, e te Akava o te au vaine takaua.’ Kare rava aia e akaruke ia matou mei taku tane rai.” (Salamo 68:5) Kua kite a Janet e kare te Atua e timata ia tatou “i te kino.” Mari ra, ‘ka oronga ua mai aia i te pakari ki te tangata ravarai’ e te “mana maata meitaki” ei tauturu ia tatou kia akono i te tu taitaia.​—Iakobo 1:5, 13; 2 Korinetia 4:7.

Akapeea ra me te manako taitaia ra tatou no te mea tei roto to tatou oraanga i te kino?