Ua taʻua e Ianeta: “E leʻi leva ona maliu loʻu tamā, ae talanoa mai laʻu tane e iai se isi fafine o loo la feoaʻi. E leʻi umi ae tapena lana ato ma tuua aʻu ma le ma fanau e toʻalua, e aunoa ma se isi tala pe faatofā mai.” Sa maua se galuega a Ianeta, ae e leʻi lava lona totogi e totogi ai lo latou fale. E lē gata sa popole i le tulaga tau tupe, ae sa iai foʻi isi ona popolega. Ua ia taʻua: “Sa lofitūina aʻu i le popole tele i tiute tauave fou uma ia o le a ou faia toʻatasi. Sa lē lelei oʻu faalogona ona sa lē mafai ona ou faia le tele o mea mo laʻu fanau, e pei ona faia e isi mātua. E oo mai lava i le taimi nei, ou te popole i le vaaiga a isi iā te aʻu ma laʻu fanau. Po o latou taumānatu pe sa ou faia mea uma na tatau ona ou faia, ina ia faatumau ai la maʻua faaipoipoga?”

O le tatalo ua fesoasoani iā Ianeta e pulea ai ona faalogona ma faatumauina ai le la faauōga ma le Atua. Ua taʻua e Ianeta: “O taimi e sili ona faigatā, o le pō, pe a filemu mea uma ma ua lē mafai ona taofi loʻu popole. O le tatalo ma le faitauina o le Tusi Paia na fesoasoani ina ia ou moe ai. O le mau e sili ona ou fiafia i ai o le Filipi 4:6, 7: ʻAua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai.’ Ou te tatalo i le tele o pō, ma ua faamāfanafanaina ai aʻu i le filemu mai iā Ieova.”

O fetalaiga a Iesu e faatatau i le tatalo i lana Lauga i le Mauga, e fesoasoani i so o se popolega lava. “Ua silafia e le Atua, o lo outou Tamā o i le lagi mea o loo outou manaʻomia, ae tou te leʻi talosaga atu.” (Mataio 6:8) E ao ona tatou ōle atu iā te ia. O le tatalo o le auala sili lea e tatou te ʻmafuta vavalalata atu ai i le Atua, ona mafuta vavalalata mai lea o ia’ iā i tatou.​—Iakopo 4:8.

O le tatalo e lē o se faiga e tau ina ia lelei ai o tatou faalogona ona ua faailoa atu o tatou popolega.  O Ieova o le “Faafofoga tatalo,” ma e fesoasoani mai o ia i ē uma e saʻili atu ma le faatuatua iā te ia. (Salamo 65:2) O le pogai lenā na aʻoaʻo ai e Iesu ona soo ia “tatalo e lē aunoa, ma ia aua le faavaivai.” (Luka 18:1) Ia ōle atu i taimi uma i le Atua mo lana fesoasoani ma le taʻitaʻiga, ma ia mautinoa o le a ia tauia lo tatou faatuatua. Ia tatou mautinoa e naunau o ia e fesoasoani mai ma e mafai ona ia faia faapea. O le “tatalo e lē aunoa,” o le a iloa ai lo tatou faatuatua moni.​—1 Tesalonia 5:17.

O le faatuatua, e aofia ai le “iloa” lelei o le Atua. (Ioane 17:3) E tatou te faia faapea e ala i le iloaina o manatu o le Atua o loo i le Tusi Paia. Ua tatou iloa o loo ia silafia mai i tatou taʻitoʻatasi, ma e finagalo e fesoasoani mai. Peitaʻi, o le faatuatua moni e tele atu isi mea e aofia ai, i lo o le tau ina iloa o se mea e faatatau i le Atua. O le faatuatua moni e uiga atu foʻi i le iai o se faauōga māfana ma le Atua. O so o se faauōga faaletagata lava e umi se taimi e manaʻomia ina ia atiaʻe ai. O lea, o le a “tupu pea” lo tatou faatuatua mai i lea taimi i lea taimi, a o tatou aʻoaʻoina le tele o mea e faatatau i le Atua, tofo i lana fesoasoani, ma “faia pea mea e fiafia i ai lona finagalo.” (2 Korinito 10:15; Ioane 8:29) O le ituaiga faatuatua lenā ua fesoasoani iā Ianeta e feagai ai ma popolega.

Ua faapea mai Ianeta: “O le mea sa fesoasoani moni e atiaʻe ai loʻu faatuatua, o le mātauina lea o le fesoasoani a Ieova i so o se taimi. E tele taimi na matou feagai ai ma faiga lē tonu na foliga mai e lē mafai ona fesagaʻia. Ae o le tatalo e lē aunoa, ua saunia mai ai e Ieova i taimi uma se auala e leʻi faatalitalia e matou te sao ai. Pe a ou faafetai atu iā te ia, e faamanatu mai ai le tele o mea ua ia faia mo aʻu. E fesoasoani mai pea o ia iā i matou i le taimi tonu e manaʻomia ai. Ua ia aumaia foʻi iā te aʻu ni uō moni, o ni tane ma fafine Kerisiano moni e fesoasoani mai i taimi uma, ma ua avea ma faaaʻoaʻoga lelei i laʻu fanau.” *

“Ua ou iloa le māfuaaga na fetalai ai Ieova i le Malaki 2:16: ʻOu te ʻinoʻino i le teteʻa.’ O se matuā lē faamaoni lenei faiga i se paaga o loo faamaoni. Ua tele tausaga talu ona alu ese laʻu tane, ae e iai lava taimi ou te lagona ai le tuua toʻatasi ma le lē aogā. Pe a iā te aʻu nei lagona, ou te taumafai e fai se mea e fesoasoani ai i se isi, ma o taimi uma e aogā ai foʻi iā te aʻu lenei faiga.” O le faatatauina o le mataupu silisili a le Tusi Paia ia ʻalofia le faaesea o ia lava, ua fesoasoani iā Ianeta e faaitiitia ai ona popolega. *​—Faataoto 18:1.

Ua faapea mai Ianeta: “Ua matuā faamāfanafanaina aʻu i le iloa, o le Atua o le ʻtamā o tamaiti e leai ni tamā, ma o le faamasino foʻi o fafine ua oti a latou tane.’ E lē taitai ona tuulafoaʻia i matou e le Atua e pei ona faia e laʻu tane.” (Salamo 68:5) Ua iloa e Ianeta, e lē tofotofoina e le Atua i tatou “i mea leaga.” Nai lo o lea, e na te “foaʻi tele mai” le atamai ma aumaia “le mana lea e sili atu i le malosi o tagata,” ina ia fesoasoani iā i tatou e feagai ai ma popolega.​—Iakopo 1:5, 13; 2 Korinito 4:7.

Ae faapefea pe a faapopoleina i tatou ona o tulaga e lamatia ai le ola?