Janet u ri: “Endzhakunyana ka ku fa ka tata wa mina, nuna wa mina u ndzi byele leswaku u rhandzana ni wansati un’wana. Endzhakunyana ka sweswo, u longe swiambalo swakwe hinkwaswo kutani a famba a ndzi siya ni vana va hina vambirhi a nga hi lelanga.” Janet u kume ntirho kambe muholo wakwe a wu nga swi koti ku va khathalela. U langutane ni swilo swo tala ku tlula swiphiqo swa timali. Loko a tsundzuka u ri: “A ndzi vilerisiwa ngopfu hi vutihlamuleri lebyi a ndzi ta va na byona hikuva a byi ta ndzi tikela ku byi hetisisa ndzi ri ndzexe. Ndzi titwe nandzu hi ku ka ndzi nga koti ku khathalela vana va mina hi ndlela leyi vatswari van’wana va endlaka ha yona. Ni sweswi ndza ha karhateka hi leswaku vanhu va ri yini hi mina ni vana va mina. Xana va tivutisa loko ndzi tikarhatile ku hlayisa vukati bya mina?”

Xikhongelo xi pfune Janet leswaku a hlula ku vilela ni ku tiyisa vuxaka bya yena ni Xikwembu. U ri: “Nivusiku a swi ndzi tikela swinene hikuva hi wona nkarhi lowu a ndzi anakanya ngopfu hi swilo leswi ndzi vilerisaka. Ku khongela ni ku hlaya Bibele swi ndzi pfunile leswaku ndzi kota ku etlela. Tsalwa leri ndzi ri rhandzaka swinene i Vafilipiya 4:6, 7 leyi nge: ‘Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo.’ Ndzi hete masiku yo tala ndzi khongela nivusiku naswona ku rhula ka Xikwembu ku ndzi chavelerile.”

Marito ya Yesu lama khutazaka lama vulavulaka hi xikhongelo eka Dyondzo yakwe ya le Ntshaveni, ma hi pfuna eka swilo hinkwaswo leswi hi vilerisaka, ma ri: ‘Tata wa n’wina wa swi tiva swilo leswi mi swi lavaka mi nga si swi kombela eka yena.’ (Matewu 6:8) Hikokwalaho hi fanele hi kombela eka yena. Xilo xo sungula lexi hi nga xi endlaka leswaku hi ‘tshinela eka Xikwembu’ i ku khongela. Loko hi endla tano, ‘xi ta tshinela eka hina.’—Yakobo 4:8.

Loko hi phofule ku karhateka ka hina hi ku khongela hi titwa hi antswa kambe xikhongelo xi tlhela xi hi pfuna  hi tindlela tin’wana. Yehovha loyi a nga “Mutwi wa xikhongelo,” u tlhela a pfuna hinkwavo lava n’wi lavaka hi ripfumelo. (Pisalema 65:2) Hikwalaho, Yesu u dyondzise valandzeri vakwe leswaku va “khongela nkarhi hinkwawo, va nga tshiki.” (Luka 18:1) Hi fanele hi ya emahlweni hi khongela Xikwembu leswaku xi hi kongomisa ni ku hi pfuna, hi ri ni ntshembo wa leswaku xi ta hakela ripfumelo ra hina. A hi fanelanga hi kanakana leswaku xi ta hi pfuna. Loko hi ‘Khongela minkarhi hinkwayo’ hi kombisa leswaku hi ni ripfumelo leri tiyeke.—1 Vatesalonika 5:17.

Kahlekahle ripfumelo i yini? Ripfumelo ri katsa ‘ku tiva’ Xikwembu tanihi munhu wa xiviri. (Yohane 17:3) Hi kota ku tiva Xikwembu hi ku hlaya Bibele. Hi dyondza leswaku xi vona un’wana ni un’wana wa hina naswona xi lava ku hi pfuna. Hambiswiritano, ripfumelo ra ntiyiso ri vula swo tlula ku tiva swo karhi hi Xikwembu. Ri tlhela ri vula ku va ni vuxaka lebyinene ni Xikwembu. Tanihi leswi hi nga endliki vunghana ni munhu hi siku rin’we ni Xikwembu hi nge vi vanghana va xona hi vusiku byin’we. Ripfumelo ra hina ‘ra kula’ loko hi ri karhi hi dyondza leswi engetelekeke hi Xikwembu, loko hi ‘endla swilo leswi xi tsakisaka.’ (2 Vakorinto 10:15; Yohane 8:29) Ripfumelo ro tano hi rona leri pfuneke Janet leswaku a hlula ku vilela.

Janet u ri: “Lexi ndzi pfuneke leswaku ndzi tiyisa ripfumelo ra mina, i ku vona ndlela leyi Yehovha a ndzi pfunaka ha yona minkarhi hinkwayo. Minkarhi yo tala hi langutana ni ku pfumaleka ka vululami loku vonakaka onge hi nge swi koti ku ku hlula. Loko hi khongela minkarhi hinkwayo Yehovha a a hi pfuna hi ndlela leyi a hi nga ta swi kota ku hlula swiphiqo sweswo ha yona. Loko ndzi n’wi khensa ndzi tsundzuka swilo swo tala leswi a ndzi endleleke swona. Minkarhi hinkwayo u hi pfuna hi nkarhi lowu faneleke. U ndzi nyike vanghana va ntiyiso, vavanuna ni vavasati lava nga Vakreste va ntiyiso. Nkarhi ni nkarhi va ndzi pfuna naswona va vekela vana va mina xikombiso lexinene.” *

“Ndza swi twisisa leswaku ha yini Yehovha eka Malakiya 2:16 a vula leswaku, ‘ndzi venga ku dlaya vukati.’ Eka munghana wa vukati loyi a nga riki na nandzu i vukanganyisi lebyikulu. Sweswi ku hundze malembe yo hlaya nuna wa mina a fambile kambe minkarhi yin’wana ndza ha titwa ndzi nga ri nchumu. Loko ndzi titwa hi ndlela yoleyo ndzi ringeta ku endla xilo xo karhi ku pfuna munhu un’wana naswona sweswo swa ndzi pfuna swinene.” Janet u hunguta ku vilela kakwe hi ku tirhisa nawu wa Bibele wa ku va a nga tihambanisi ni van’wana. *—Swivuriso 18:1.

Janet u ri: “Leswi ndzi chavelelaka swinene i ku tiva leswaku Xikwembu i “tata wa vana lava nga riki na tatana ni muavanyisi wa tinoni.” A xi nge hi tshiki ku fana ni nuna wa mina.” (Pisalema 68:5) Janet wa swi tiva leswaku Xikwembu a xi hi ringi “hi swilo swo biha.” Kambe xi nyika vutlhari eka “hinkwavo hi mbilu yo basa” naswona xi hi nyika “matimba lama tlulaka lama tolovelekeke” leswaku xi hi pfuna hi langutana ni ku vilela.—Yakobo 1:5, 13; 2 Vakorinto 4:7.

Ku vuriwa yini loko hi vilerisiwa hi ku va vutomi bya hina byi ri ekhombyeni?