“Waray pag-iha han mamatay hi Tatay, ginsumatan ako han akon bana nga may-ada hiya iba nga babaye,” siring ni Janet. “Katapos, waray sarit-sarit nga ginkuha niya an ngatanan niya nga gamit ngan ginbayaan ako pati an amon duha nga anak.” Nakatrabaho hi Janet, kondi kulang an iya sweldo panbayad ha bangko para han ira balay. Ngan diri la kwarta an iya problema. “Nababaraka gud ako nga ako na la yana an magpapas-an han ngatanan nga mabug-at nga responsabilidad,” siring niya. “Nakukonsensya ako nga diri ko naihahatag ha akon mga anak an sugad han naitatagana han iba nga kag-anak. Ngan tubtob yana, nababaraka pa gihapon ako kon ano an impresyon han iba nga tawo ha akon ngan ha akon mga anak. Ginruruhaduhaan daw la nira kon ginbuhat ko an ngatanan basi maisalbar an amon pag-asawa?”

An pag-ampo nakabulig kan Janet nga makontrol an iya emosyon ngan magin duok ha Dios. “Nakukurian gud ako labi na kon gab-i kay mamingaw hinduro an palibot ngan diri ko mapugngan nga maghinunahuna. Pero nakabulig ha akon an pag-ampo ngan pagbasa ha Biblia basi ako mahingaturog. Usa han akon paborito nga teksto an Filipos 4:6, 7: ‘Ayaw kamo kabaraka ha bisan ano, kondi ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo; ngan an kamurayawan han Dios nga labaw ha ngatanan nga pagsabot magbabantay han iyo kasingkasing ngan han iyo panhunahuna.’ Damu ka gab-i nga duro an akon pag-inampo ngan inabat ko nga an kamurayawan ni Jehova nakaliaw ha akon.”

An nagpapasarig nga mga pulong ni Jesus mahitungod ha pag-ampo nga iya ginsiring ha Sermon ha Bukid nabulig ha aton nga maatubang an ngatanan nga klase han kabaraka: “An Dios nga iyo Amay maaram han iyo panginahanglan antes pa kamo mangaro ha iya.” (Mateo 6:8) Ngan kinahanglan gud mangaro kita hin bulig ha iya. An pag-ampo an nangunguna nga paagi basi ‘magin duok kita ha Dios.’ Ano an resulta kon bubuhaton naton ini? ‘Magigin duok hiya ha aton.’—Santiago 4:8.

Oo, kon kita nag-aampo, diri la kay nag-oopay an aton pag-abat kay naipahayag naton an aton mga kabaraka. Hi Jehova, an Parapamati han pag-ampo, nagios  liwat basi buligan adton nahirani ha iya nga may pagtoo. (Salmo 65:2) Salit gintutdoan ni Jesus an iya mga sumurunod nga “mag-ampo pirme . . . ngan diri umundang.” (Lucas 18:1) Kinahanglan padayon kita nga maghangyo ha Dios para hin giya ngan bulig, nga nasarig nga iya babalosan an aton pagtoo. Diri gud naton sadang pagruhaduhaan an iya hingyap o abilidad ha pagbulig. Kon ‘padayon kita nga mag-aampo’ ha sugad hini nga paagi, iginpapakita naton nga may tinuod kita nga pagtoo.—1 Tesalonica 5:17.

Ano gud ba an pagtoo? An pagtoo nag-uupod ha “pagkilala” ha Dios sugad nga persona. (Juan 17:3) Mabubuhat naton ito siyahan pinaagi ha paghibaro ha panhunahuna han Dios gamit an Biblia. Nahibaroan naton nga nakikita niya an tagsa ha aton ngan karuyag niya nga buligan kita. Kondi an tinuod nga pagtoo diri la kay basta pagkilala ha Dios. Nangangahulogan liwat ito hin pagkaada duok nga relasyon ha iya ngan pagtahod ha iya. Pariho ha pakigsangkay ha usa nga tawo, diri ito nakukultibar ha usa la ka gab-i. An aton pagtoo padayon nga “nagtutubo” paglabay han panahon samtang mas nakikilala naton an Dios, ‘ginbubuhat naton pirme an nakakalipay ha iya,’ ngan naieksperyensyahan naton an iya bulig. (2 Corinto 10:15; Juan 8:29) Ini nga klase hin pagtoo an nakabulig kan Janet nga malamposan an mga kabaraka.

“Nakita ko kon paonan-o ako ginbuligan ni Jehova ha ngatanan ko nga problema, ngan ito gud an nakabulig ha akon nga magin marig-on an akon pagtoo,” siring ni Janet. “Damu ka beses nga nakaeksperyensya kami hin kawaray-hustisya nga baga hin imposible malamposan. Pinaagi han duro nga pag-inampo, pirme hi Jehova naghihimo hin paagi basi maatubang namon an mga problema nga diri ko gud mahuhunahuna kon ha akon la kalugaringon. Kon ginpapasalamatan ko hiya, nahinunumdoman ko an iya damu hinduro nga bulig ha akon. An iya bulig pirme namon nakakarawat ha husto gud nga panahon. Ngan gintagan liwat niya ako hin tinuod nga kasangkayan nga tinuod nga mga Kristiano. Aada hira pirme para ha akon, ngan mag-opay hira nga ehemplo para ha akon mga anak.” *

“Nasasabtan ko kon kay ano nga nagsiring hi Jehova ha Malakias 2:16: ‘Ako nangangalas han pagbulag.’ Para ha inosente nga padis, ini an pinakamasakit nga klase hin pagin diri maunungon. Damu ka tuig na an naglabay tikang han ginbayaan ako han akon bana, pero usahay naabat la gihapon ako hin kasubo ngan kawaray-pulos. Kon ito an akon inaabat, nangangalimbasog ako ha pagbulig ha iba, ngan nakakabulig gud liwat ito ha akon.” Salit pinaagi ha pag-aplikar ni Janet han prinsipyo ha Biblia nga diri mag-inusahan, nabuligan hiya nga maibanan an iya kabaraka. *—Proberbios 18:1.

“Nakakaliaw gud ha akon,” siring ni Janet, “an paghibaro nga an Dios ‘an amay han waray mga amay ngan an hukom han mga balo nga babaye.’ Diri gud niya kami babayaan, diri sugad han ginbuhat han akon bana.” (Salmo 68:5) Maaram hi Janet nga diri kita ginsasarihan han Dios hin “maraot nga mga butang.” Lugod, “hura nga nahatag hiya ha ngatanan” hin kinaadman ngan hin “diri-ordinaryo nga gahum” basi buligan kita nga malamposan an aton mga kabaraka.—Santiago 1:5, 13; 2 Corinto 4:7.

Kondi kumusta man kon nababaraka kita tungod kay namimeligro an aton kinabuhi?