Alona waan: “Kɛ n ti sirɛni’n i tɛlɛ’n, min awlɛn kpɛ min klun. N wanndi n kunndɛ fiawlɛ. Sanngɛ, min wla’n guaman ase mlɔnmlɔn. I li sɛ n wo gua su naan fiawlɛ nunman lɛ’n, yɛ min klun titi min dan ɔn. Cɛn kun mɔ ń nánti akpɔ nuan’n, n tɔli sunlɛ wun. N kwlá loman wunmiɛn kpa. Dɔ kpanngban sinnin naan min wla w’a gua ase. Kɛ ɔ́ cɛ́ kan’n, sirɛni’n boli i tɛlɛ’n i bo ekun.”

Alɛ kunlɛ’n ti, sran’m be wla kwla tɔ blo. Sanngɛ, nɛ́n i ngba ɔ. Kɛ sran kun ti i kɛ i osufuɛ annzɛ i sran kpa wie w’a tɔ tukpacɛ’n, i wla bo i wun. Sran wie’m be liɛ’n, sa nga be bu i kɛ be kwla ju cɛn wie’n ti’n, be koko. Be koko be se kɛ: ‘?E mma nin e anunman’m be blɛ su’n, wafa sɛ yɛ mɛn’n yó ɔ? ?Alɛ kunlɛ’n, nin sran’m be wiengu i like yaya yolɛ’n, ɔ nin tukpacɛ tɛtɛ mɔ bé trú’n, nin asiɛ nin nzue’n be sacilɛ’n mɔ lika’n bɔn kaiin, i nun yɛ e mma nin e anunman’m bé ɲín ɔn?’ ?Ngue yɛ é yó naan e wla w’a gua ase ɔ?

“Kɛ ngwlɛlɛfuɛ’n wun ndɛ bɔ w’a wla trɔ b’ɔ́ bá’n, ɔ cuɛn i wun” naan sa tɛ w’a ɲɛnmɛn i. (Nyanndra Mun 27:12) I wafa kunngba’n, ɔ fata kɛ e fa ajalɛ wie mun naan e akunndan’n w’a sannganman annzɛ y’a kokoman dan. Sran’m be wiengu i like yaya yolɛ be su flimu’n, nin mɛn’n nun nganniɛn tɛtɛ mɔ be yi be nglo’n, be kwla bo e nin e mma’m be wla. Kannzɛ e si kɛ i sɔ sa’m b’a tru mɛn’n nun’n, sanngɛ ɔ fataman kɛ e nian be naan e akunndan’n tran be su. Afin Ɲanmiɛn w’a yiman e kɛ e akunndan’n tran sa  tɛ’n su. Sanngɛ, ɔ yili e naan e akunndan’n tran “ndɛ nanwlɛ’n, [...] nin like ng’ɔ ti i nuan su’n, nin sa ng’ɔ ti-man tɛ mlɔnmlɔn’n, nin like ng’ɔ ti klanman’n” be su. Sɛ e yo sɔ’n, “Nyanmiɛn b’ɔ maan e wun jɔ ye’n,” ɔ nin é trán.​—Filipfuɛ Mun 4:8, 9.

Sran ng’ɔ lafi Ɲanmiɛn su sakpa’n, ɔ kokoman dan. Ɲanmiɛn Ndɛ’n se kɛ e nian e wun su naan y’a “kwla koko yalɛ a kle Nyanmiɛn.” (1 Piɛr 4:7) Kɛ sa kun ju e su’n, e kwla srɛ Ɲanmiɛn kɛ ɔ man e ngwlɛlɛ, ɔ suan e bo, yɛ ɔ wla e yakpa naan e fa ajalɛ ng’ɔ ti kpa’n. Like kwlaa nga e srɛ Ɲanmiɛn’n, “sɛ ɔ ti sɛ ɔ ti sɛ o, e si kɛ y’a nyɛn i.”​—1 Zan 5:15.

Ɲanmiɛn Ndɛ’n kle kɛ “sran ng’ɔ sie mɛn nga’n” yɛle Satan. Nán Ɲanmiɛn ɔn. Ɔ kle ekun kɛ: “Klunwifuɛ’n sie mɛn wunmuan’n.” (Zan 12:31; 1 Zan 5:19) I sɔ’n ti, Zezi seli kɛ sɛ é srɛ́ Zoova’n, e se kɛ: “Nán yaci e lɛ maan Lakafuɛ’n laka e.” (Matie 6:13) I lɛ’n nun’n, Zezi kleli kɛ Satan o lɛ sakpa, naan sanngɛ Zoova kwla de e Satan i sa nun. Alona waan: “Kɛ sirɛni’n ko tɛ cɛ’n, n srɛ Zoova kɛ nán maan n usu. Asa ekun’n, min wun’n flɛ min telefɔnu nun. Kpɛkun, ɔ nin min srɛ Ɲanmiɛn. Ɲanmiɛn srɛlɛ’n yo min ye dan.” Ɲanmiɛn Ndɛ’n se kɛ: “Be kwlaa nga be kpan flɛ Anannganman’n, ɔ mantan be. Sɛ be kpan flɛ i bɔ gblɛ nunman nun’n, ɔ mantan be.”​—Jue Mun 145:18.

Kɛ Zezi kán Ɲanmiɛn ndɛ’n oka’n su’n, ɔ seli i sɔnnzɔnfuɛ mun kɛ sɛ bé srɛ́ Ɲanmiɛn’n, be se kɛ: “Maan ɔ sielɛ blɛ’n ju.” (Matie 6:10) Ɲanmiɛn sielɛ’n ti’n, ninnge kwlaa nga be ti yɛ e koko’n, be su tranman lɛ kun. Ɲanmiɛn fanngan nun’n, “kɛ ɔ fɛ i lele b’ɔ́ fá jú mɛn’n i awieliɛ lɔ’n,” Zezi m’ɔ ti ‘aunjuɛ wlengbi’n,’ wá yó maan ‘alɛ kunlɛ’n ɔ́ wíe.’ (Ezai 9:5; Jue Mun 46:10) Ɲanmiɛn “wá yó sran kpanngban be jɔlɛ difuɛ. [...] Nvle kun su fa-man alɛ wlɛ-mɛn i nvle uflɛ sin kun, be su sɔnnzɔn-man alɛ kunlɛ kun. [...] Sran fi su wla-man be nyin nglo-nglo kun.” (Mise 4:3, 4) Awlobo’m bé trán aklunjuɛ. Bé “kplán sua’n, bé trán be nun, sɛ be ta vinyi’n, bé dí i su mma.” (Ezai 65:21) Be nun “wie fi su seman kɛ: ‘N kpinndinman.’”​—Ezai 33:24.

Andɛ mɛn nga nun’n, e yo like kwlaa nga e kwla yo naan sa w’a ɲanman e’n. Sanngɛ wie liɛ’n, e lemɛn i yowlɛ. Kɛ “blɛ’n fa ti bɔ sa’m be fa ju’n,” i su like ɲan e. (Akunndanfuɛ’n 9:11) Kɛ ɔ fɛ i lalafuɛ nun lele m’ɔ́ fá jú andɛ’n, sran’m be kun alɛ, be yo be wiengu’m be like yaya. Yɛ tukpacɛ’n te kun sran mun. ?Sran kwlaa sɔ mɔ be wuli’n be liɛ w’a wie mlɔnmlɔn?

Sran sɔ mɔ e siman be nuan’n, Ɲanmiɛn si be nuan. Yɛ i wla fiman be su. Ɲanmiɛn ɲrun’n, be su lafi dɔ nga su. Yɛ “cɛn wie lele be kwlaa nga be o ndia nun’n [...] bé fín ndia’n nun fíte.” (Zan 5:28, 29) Ɲanmiɛn cɛ́n be nga be wuli’n. Ɔ maan, Ɲanmiɛn Ndɛ’n se kɛ: “Like nga e wla o su sɔ’n ti kɛ mmeli i blalɛ’n bɔ be fa jrɛn i’n sa, ɔ tra ye ase. Ɔ tra kpa tankaan, e lafi i su.” (Ebre Mun 6:19) Ɔ se ekun kɛ: “Kɛ Nyanmiɛn cɛnnin [Zezi’n], ɔ ti nzɔliɛ b’ɔ kle sran’m be kwlaa kɛ ɔ sieli” blɛ m’ɔ́ cɛ́n sran mun ɔn.​—Sa Nga Be Yoli’n 17:31.

Dɔ nga su’n, Ɲanmiɛn i sufuɛ’m be wla bo be wun wie cɛn kunngun. I wie yɛle Pɔlu nin Zanɛti nin Alona be liɛ’n. Sanngɛ, be yoli ngwlɛlɛfuɛ, be srɛli Ɲanmiɛn be fali be wun mɛntɛnnin i. Yɛ be fali be wla guali like nga Ɲanmiɛn seli kɛ ɔ́ yó mɔ Biblu’n kɛn i ndɛ’n su. Ɔ maan, b’a kokoman dan kun. Kɛ be sa’n, “maan Nyanmiɛn bɔ e nyin o i sin’n ɔ maan amun klun jɔ, yɛ an di alaje i su bɔ an lafi’n ti.”​—Rɔmfuɛ Mun 15:13.