E taku Alona: “Ngke I ongo tangin te buu ibukin te kangaanga, e a bon tata naba buroou ao I biri nakon te tabo ni kamanomano ibukin te boom. E ngae ngke I mena ikanne, ma I bon namakina naba te raraoma. E na rangi ni korakora riki ngke I mena i tinaniku bwa akea te tabo ae N na karabaai iai. I moana tangiu ngkekei naba ao ni bono ikeu ngke I nakonako i nanon te kawai. I kataia ni kaokaoka nanou i nanon te tai ae maan. Ma e a manga moana riki tangina te buu anne.”

Te buaka bon teuana mai buakon aani kabuanibwai aika bati. N te katoto, ko kona n namakinna bwa kaanga ko bwakaraki n te boom imwin ataakin ae e a reke iroum ke temanna ae tangiraki n te aoraki ae e na ruanikai iai maiuna. A kona naba tabeman n raraoma ibukin iangoan taai aika a na roko. A tabeaianga n aron aei: ‘E koaua bwa a na maeka natira ke natiia natira n te aonnaba ae iai te buaka iai, te iowawa, e baareka, bibitakini kanoani boong ao te aoraki ae ewewe mani kamamate?’ Tera arora ae ti na kona n tokanikai i aon te raraoma anne?

Ibukin ataakin rikini baika bubuaka, “e ata rokon te kabuanibai te aomata ae e wanawana ao e katanna mai iai.” (Taeka N Rabakau 27:12, BK) Ao ai arora naba ni kawakina marurungira, ni kakairi ni mwaneka ibukini kamanoan ara iango ao nanora. E karikirakea riki raraomara ao raraomaia natira te kaakibotu ae iai te tiritiri iai ao rongorongo naba ake a kaotaki iai taamnei aika rangi ni kakamaaku.  Ma e aki nanonaki n te tannako man taian taamnei aika buakaka bwa ti na katinanikua te bwai ae koaua. E bon aki karika ara iango te Atua bwa ti na iaiangoa te bwai ae buakaka. N oneani mwin anne, ti riai ni kaon ara iango ni “bwaai ni kabane aika koaua, . . . aika eti, . . . aika itiaki, . . . aika kauekea te tangira.” Ngkana ti karaoa anne, ane e na karekea nakoira te raunnano ao te iangoraoi “te Atua are e reke mairouna te rau.”—I-Biribi 4:8, 9.

E buokira te onimaki ni koaua bwa ti na tokanikai i aon te raraoma. E kaumakira te Baibara bwa ti na ‘kamarurungira n tatataro.’ (1 Betero 4:7) Ti kona ni butiia te Atua ana ibuobuoki ao te wanawana ma te korakora, bwa ti na karaoa ara kabanea n tamaroa ibukin te baere ti rinanona ao ni kakoauaa bwa “e ongo iroura ni kaineti ma baike ti butiia.”—1 Ioane 5:15.

E kabwarabwaraaki n te Baibara bwa “te tia tautaeka i aoia kaain te aonnaba aei” bon Tatan ao tiaki te Atua, ngaia anne ae “a bane kaain te aonnaba ni mena i aani mwaakan teuare buakaka.” (Ioane 12:31; 1 Ioane 5:19) Mangaia are e aki taekini baikanne Iesu bwa kaikonaki ngke e reireinira bwa ti na tataro ni kangai: “Kamaiuira mairoun teuare buakaka.” (Mataio 6:13) E taku Alona: “N te tai are e tang iai te buu ao I a boni bubutiia naba Iehova bwa e na buokai ni karaua nanou. E tarebooniai buu ao ti a kaai naba n tataro. E bon rangi n ibuobuoki te tataro. Bon anne ae e taekinaki naba n te Baibara ni kangai: “E a kaan Iehova nakoia akana weteia ni kabaneia, nakoia akana weteia n te koaua ni kabaneia.”—Taian Areru 145:18, BG.

N ana Kabwarabwara Iesu i aon te Maunga ao e reireinia taan rimwina bwa a na tataro ni kangai: “E bia roko am tautaeka n uea.” (Mataio 6:10) E na taeki ni kabane wakaan iango n raraoma aika karuanikai, Ana Tautaeka n Uea te Atua. E na “katoki buaka [te Atua], ao tokina tabon aonaba” rinanon Iesu are “Te Uea n Raoi.” (Itaia 9:6, BG; Taian Areru 46:9, BG) “Ane E na kaeti-taeka i buakoia botanaomata aika bati. . . . A na aki tabeka te kabaang te botanaomata teuana n eka nako te botanaomata teuana, ao a na aki manga reireiia te buaka. . . . Ao akea ae na kamakuia.” (Mika 4:3, 4, BG) Ane a nang “katei auti [utu aika kukukurei], ao a na maeka i nanoia; ao a na uniki kurebe, ao a na kang uaaia.” (Itaia 65:21, BG) “Ao ane maeka iai e na aki kangai, I aoraki.”—Itaia 33:24, BG.

Akea uaani kamanoam n taai nako ni “baika aki kantaningaaki” ni boong aikai ke ko na tarataraa raoi am tabo ae ko mena iai, e ngae ngke a bati kauring. (Te Minita 9:11, NW) A teimatoa ni mate aomata aika raoiroi n te buaka, te tiritiri ao te aoraki i nanon tienture aika bati. Iai te kantaninga ibukia aomata aika mate akanne?

A na manga uti aomata aika mirion ma mirion mwaitiia ae te ware are E tii ataia te Atua. A boni matu moa ngkai ao a mena n ana ururing ae kororaoi te Atua ni karokoa te bong “are a na bane . . . aomata ake a mena i nanon taian ruanimate . . . [n] otinako.” (Ioane 5:28, 29) A karauaki nanora n te Baibara ibukin te mangauti ni kangai: “Te kantaninga ae iroura aei, kaanga ai aron atinroni maiura ae koaua ao e nene ni matoa.” (Ebera 6:19) Ao e a tia te Atua ni “kaota kakoauaana nakoia aomata nako ngke e [kauta Iesu] mai buakoia maate.”—Mwakuri 17:31.

A kaaitara moa ngkai ma taian raraoma te koraki ake a kataia ni kakukureia te Atua. A tokanikai i aon raraoma nako ake a kaaitara ma ngaai Paul, Janet ao Alona ibukina bwa a kakairi ni mwaneka aika manena, a kaania riki te Atua n te tataro ao a karikirakea aia onimaki ni kantaninga man te Baibara ibukin taai aika a na roko. N aron are e a tia ni buokiia te Atua n te baere a rinanona, “ke e kaoningkami n te kimwareirei ma te rau ni kabane, te Atua are e anganga te kantaninga.”—I-Rom 15:13.