“No mangngegko ti uni ti wangwang, agkibbayo ti barukongko ket tumarayak iti lugar a paglemmengan no adda bumtak a bomba,” kuna ni Alona. “Ngem uray addaak sadiay, madanaganak latta. Nakarkaro manen no naguni dayta nga addaak iti ruar ta awan paglemmengak. Naminsan a magmagnaak iti kalsada, nagsangitak nga uray la diak makaanges. Adu nga oras ti limmabas saak kimmalma. Idi kuan, naguni manen ti wangwang.”

Maysa laeng ti gubat iti adu a mamagpeggad iti biag. Kas pagarigan, no maammuam nga adda makapapatay a sakitmo wenno ti maysa nga ipatpategmo, mariknam a kasla nagtupak ti langit kenka. Madanagan met ti dadduma ta mabutengda iti masanguanan. Pampanunotenda, ‘Anianto ngata ti situasion ti lubong a pagbiagan dagiti annakmi? Nakaronto ngata ti gubat, krimen, polusion, panagbalbaliw ti klima, ken saksakit?’ Kasanotayo a sanguen dagiti kasta a pakadanagan?

Ammo ti masirib a tao a mapasamak ti dakes a bambanag isu a no “nakakita iti didigra [wenno peggad] aglemmeng.” (Proverbio 27:12) No kasano a protprotektarantayo ti pisikal a bagitayo, maprotektarantayo met ti panunot ken emosiontayo. No agbuyatayo iti nararanggas a pelikula ken nakabutbuteng a damdamag, lallalo a madanagantayo ken dagiti annaktayo. Ngem dina met kayat a sawen a lemlemmengantayo ti realidad no liklikantayo dagita. Saan a dinisenio ti Dios ti isiptayo tapno agpanunot iti dakes.  Imbes ketdi, masapul a punnuentayo dayta iti “aniaman a bambanag a napudno, . . . nalinteg, . . . nadalus, . . . maay-ayat.” No kasta ti aramidentayo, tulongannatayo “ti Dios ti talna” a maaddaan iti natalna a panunot ken natalged a rikna.—Filipos 4:8, 9.

Tulongannatayo ti pudpudno a pammati a mangsango iti pakadanagantayo. Inyunay-unay ti Biblia: “Agridamkayo no maipapan kadagiti kararag.” (1 Pedro 4:7) Mabalintayo ti agpatulong iti Dios ken dumawat iti sirib ken tured tapno maaramidtayo ti kasayaatan iti agdama a situasiontayo, a kombinsidotayo a “denggennatayo maipapan iti aniaman a dawdawatentayo.”—1 Juan 5:15.

Ibaga ti Biblia a ni Satanas, saan a ti Dios, ti “agturay iti daytoy a lubong” ken “ti intero a lubong adda iti pannakabalin daydiay nadangkes.” (Juan 12:31; 1 Juan 5:19) Idi insuro ni Jesus nga ikararagtayo nga ‘ispalennatayo iti daydiay nadangkes,’ impakitana a pudpudno ni Satanas ken ti panangisalakan ti Dios. (Mateo 6:13) “No aguni ti wangwang, dawatek ken Apo Jehova a tulongannak a kumalma,” kuna ni Alona. “Kasta met a tawagannak ni lakayko ket agkararagkami a dua. Talaga a makatulong ti kararag!” Dayta ket kas iti ibaga ti Biblia: “Ni Jehova asideg kadagidiay amin nga umaw-awag kenkuana, kadagidiay amin nga umawag kenkuana iti kinapudno.”—Salmo 145:18.

Iti Sermonna iti Bantay, insuro ni Jesus dagiti adalanna nga ikararagda: “Umay koma ti pagariam.” (Mateo 6:10) Ikkatento ti Pagarian ti Dios ti amin a makadangran a pakadanagantayo iti agnanayon. Babaen iti “Prinsipe ti Kappia” a ni Jesus, “pagsardengen [ti Dios] dagiti gubat agingga iti ungto ti daga.” (Isaias 9:6; Salmo 46:9) “Mangukomto [ti Dios] iti tengnga ti adu nga ili . . . Saandanto a mangitag-ay iti kampilan, nasion maibusor iti nasion, saandanto met a sursuruenen ti pannakigubat . . . . Awanto ti asinoman a mamagpigerger kadakuada.” (Mikias 4:3, 4) Dagiti naragsak a pamilia “mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada.” (Isaias 65:21) “Ket awanto ti agtataeng nga agkuna: ‘Masakitak.’”—Isaias 33:24.

Uray kasano ti panagan-annadtayo ita, saantay a kanayon a malisian dagiti “di mapakpakadaan a pasamak” wenno maliklikan nga addatayo iti di umiso a lugar iti di umiso a tiempo. (Eclesiastes 9:11) Kas iti napalabas a ginasut a tawen, matmatay dagiti nasingpet a tattao gapu iti gubat, kinaranggas, ken saksakit. Ania ti namnama dagita nga inosente a biktima?

Agbiagto manen ti minilion a tattao, a ti Dios laeng ti makaammo iti bilangda. Ita, arigna matmaturogda pay laeng iti perpekto a lagip ti Dios agingga nga “amin dagidiay adda kadagiti pakalaglagipan a tanem . . . rummuarda.” (Juan 5:28, 29) Maipapan iti panagungar, ipasigurado ti Biblia: “Daytoy a namnama adda kadatayo kas maysa a sinipete [wenno angkla] maipaay iti kararua, agpadpada a sigurado ken natibker.” (Hebreo 6:19) Ken “nangipaay [ti Dios] iti pammatalged kadagiti amin a tattao iti panangpagungarna [ken Jesus] manipud kadagiti natay.”—Aramid 17:31.

Iti agdama, adda latta pakadanagan uray dagidiay mangikagkagumaan a mangparagsak iti Dios. Ngem napagballigian da Paul, Janet, ken Alona dagiti pakadanaganda ta nangaramidda kadagiti praktikal a pamay-an tapno masolusionan dagita. Nagpatulongda met iti Dios babaen ti kararag, ken pinatibkerda ti pammatida iti namnama iti masanguanan nga ibagbaga ti Biblia. Kas iti napadasanda, ‘ti Dios a mangipaay iti namnama punnuennakay koma iti rag-o ken talna babaen iti panamatiyo.’—Roma 15:13.