Alona wavova vo: “Vava yawá e ngung’a lulukisu lwa tinina e vita, o ntim’ame wazakama, yazaula muna tininu dia bomba. Kana nkutu vava yakala muna tininu, yakwamanana tokana kwayingi. Kansi, ntokani zame ziwokelanga vava iwanukanga mu balabala, mwakondwa e fulu kia swekamena. Lumbu kimosi, vava yakala mu balabala yawá e ngung’a lulukisu, yayantika dila wau vo kiakala y’ova nswamina ko, kialendanga diaka fulumuna ko. Kolo kiayingi kiavioka muna vuvama. I bosi, e ngunga yasikwa diaka.”

E vita i dimosi muna mambu mayingi metwasanga e vonza. Muna bonga e nona, avo ngeye yovo yitu kiaku osolokele ye kimbevo kiangolo, dilenda kala nze bomba ibukidi. Akaka, o wonga wa mambu ma kusentu malenda kubatwasila ntelamw’a moyo. Bekukiyuvulanga: ‘Nga wana eto yovo atekolo eto bekwamanana zingila mu nza yazala ye vita, umpumbulu, safuka kwa kalu, nsobani za nsungi ye vuku?’ Aweyi tulenda zizidila e ntokani zazi?

Vava mambu mambi mevangamanga, ‘o nlungaladi . . . oswekamanga.’ (Ngana 27:12) Nze una tutaninanga o vimpi wa nitu, tufwete mpe taninanga o vimpi wa ngindu zeto. E nsaka za nsoki yo mambu mangemi mesongwanga muna televizau ye internete, mewokesanga e ntokani zeto ye za wan’eto. O venga mambu mama ke disongele ko vo ke  mevangama diaka ko. Nzambi katuvanga ko kimana twazadisanga e ngindu zeto ye mambu mambi. Kansi, ozolele vo twazadisa e ngindu zeto ye “konso oma men’eludi, . . . mansongi, . . . mavelela, . . . mabiza.” Avo tuvangidi wo, “o Nzambi a luvuvamu” ovuvika ngindu yo ntima eto.—Filipi 4:8, 9.

O lukwikilu lwasikila lukutusadisa mu sunda o ntelamw’a moyo. Bibila kikutuwondelelanga vo ‘twalungalala yamu sambu.’ (1 Petelo 4:7) Tulenda lomba kwa Nzambi katuvana lusadisu, ngangu ye kikesa kimana twazizidila e ntokani ye ziku kia sia vo “wa kekutuwá konso una tulomba.”—1 Yoane 5:15.

Nkand’a Nzambi uvovanga vo Satana i ‘nyadi a nza yayi,’ ‘e nza yawonso mu wisa kia Satana ina.’ (Yoane 12:31; 1 Yoane 5:19) E kiaki i kuma o Yesu kasadila mvovo mia ziku vava katulonga twasambanga vo: ‘Utuvuluza muna ndiona wambi.’ (Matai 6:13) Alona wavova vo: “Konso ntangwa isikwanga e ngung’a lulukisu, ilombanga kwa Yave kansadisa yavuvika e ngindu zame. Nkanz’ame mpe okumbokelanga kimana twasamba. E sambu sadisa kikilu kisadisanga.” Nkand’a Nzambi uvovanga vo: “O Yave ofinamene awonso bekumbokela, ana bekumbokelela kuna ziku.”—Nkunga 145:18.

Muna Longi diandi vana Mongo, Yesu walonga alandi andi basambanga vo: ‘Yambula Kintinu kiaku kiza.’ (Matai 6:10) E Kintinu kia Nzambi kisukisa emvimba mawonso metokanesanga wantu. Nzambi osadila Yesu wa “Nkuluntu a Luvuvamu” muna “sima vita yakuna nsuk’a nza.” (Yesaya 9:6; Nkunga 46:9) “[Nzambi] fundisa kefundisa muna mbidi a nkangu, . . . e zula ke kizangwila nsosolo muna zula ko, ke belongwa diak’o nwana vita ko. . . . ke vekal’on’okubazakamesa ko.” (Mika 4:3, 4) Wantu bekala ye kiese, “betunga nzo yo kala mo; bekuna mpatu za vinyo, yo dia bundu yau.” (Yesaya 65:21) “O ntungi kevova ko vo, yela nyela.”—Yesaya 33:24.

O unu, kana nkutu tuvangidi mawonso muna kuyitanina, ka tulendi venga mambu ma ‘kinsalukisa’ ko mevangamanga muna konso fulu ye konso ola. (Kimpovi 9:11) Nze una wavangamanga kuna nz’ankulu, e vita, umpumbulu ye yimbevo yakinu vonda wantu ambote. Nkia vuvu bena kiau awana befwanga kondwa kuma?

Ndonga bevutuka diaka zinga, Nzambi kaka ozeye lutangu lwau. Owau, awonso baleka bena, bena muna nyindu alunga wa Nzambi yavana kilwaka e lumbu kina “awonso bena muna nkala . . . bevaika.” (Yoane 5:28, 29) Nkand’a Nzambi uvovanga mu kuma kia lufuluku vo: ‘Tuna ye vuvu kiaki nze mbw’a nzaz’a mwanda, e vuvu kiasìkila, kiasiama.’ (Ayibere 6:19) Nzambi ‘wasikidisa dio kwa wantu awonso, wau kamfula [Yesu] muna mafwa.’—Mavangu 17:31.

O unu, kana nkutu awana bevavanga yangidika Nzambi, bebwilwanga mambu mekubafilanga mu telemwa o moyo. Paul, Janet yo Alona bezizidilanga ntelamw’a moyo muna finama Nzambi muna sambu yo kumika lukwikilu lwau muna vuvu kia Nkand’a Nzambi mu kuma kia kusentu. Nze una kabasadisila, “mbula [Nzambi] kanuzadisa ye kiese yo luvuvamu muna kwikila.”—Roma 15:13.