“Hlauhawm a lo thleng dâwn tih hriattîrna thâwm a rîk vung vung chuan, ka lungphû a rangin, bomb laka himna tûr bihrûkna hmun lam panin ka tlân nghâl a. Mahse, chutah pawh chuan ka hlauh a reh chuang lo. Pâwn lama ka awm lah hian, bihrûkna tûr hmun a awm loh avângin ka hlau lehzual a. Ṭumkhat phei chu, kal kawnga ka kal laiin, ka ṭap chhuak phawng mai a, thâwk lâk harsa ka ti hle a. Dârkâr engemaw zât hnua ngai ka awh leh ta tihah thâwm chu a rawn ri leh ta vung vung a ni,” tiin Alona-i chuan a sawi a.

Indona hi thil hlauhawm tam tak zînga pakhat mai a ni a. Entîr nân, nangmah emaw, i hmangaih tak emawin nunna atâna hlauhawm natna khirh tak in nei tih hriat chu bomb-a den ang mai niin i inhre ngei ang. Mi dangte tân chuan, nakin hun tûr hlauhna chuan lungkhamna a thlen thei a ni. ‘Kan fate, a nih loh leh kan tute chu indona, dân bawhchhiatna, tui leh boruak bawlhhlawhna, sik leh sa inthlâk danglamna, leh hri lêng hlauhawm tak kârah an nung ang em?’ tih an ngaihtuah a. Engtin nge hêng lungkhamnate hi kan hmachhawn theih ang?

Thil ṭha lote a lo thleng ṭhîn tih hriain, “mi fing chuan thil ṭha lo a hmu a, a biru ṭhîn.” (Thufingte 27:12) Tîsa lama invên kan tum ang bawkin, rilru lam leh ngaihtuahna lama invêng tûrin hma kan la thei a ni. Tharum thawhnaa khat film leh chanchin tharte chuan keimahni leh kan fate lungkhamna a belhchhah a. Hêng thilte kan en loh hian thil awm dân dik tak kan haider tihna a ni lo. Pathian chuan kan ngaihtuahna hi sual lam ngaihtuah reng nân a  siam lo va. Chu ai mah chuan, “a dik apiangte . . . a fel apiang te, a thianghlim apiang te, a duhawm apiang te,” chu kan ngaihtuah zâwk tûr a ni. Chutianga kan tih chuan, “thlamuanna Pathian” chuan kan thinlungte leh ngaihtuahnate chu a thlamuan ang.—Philippi 4:8, 9.

Rinna dik tak chuan lungkhamna hmachhawn tûrin min ṭanpui a. Bible chuan ‘ṭawngṭai theih nâna rilru fel tak pu’ tûrin min fuih a. (1 Petera 4:7) Pathian chuan “kan dîl apiang min ngaihthlâksak” tih ring tlat chungin a ṭanpuina kan dîl thei a, kan dinhmun a ṭha thei ang bera hmang tûrin finna leh huaisenna kan dîl thei a ni.—1 Johana 5:15.

Bible chuan “he khawvêl lal” hi Pathian ni lovin, Setana a ni tih leh ‘khawvêl pumhlûm hi a thu thuin a awm’ tih a sawi. (Johana 12:31; 1 Johana 5:19) Chuvângin, Isua chuan: “Mi sual lakah chuan min chhandam zâwk ang che,” tia ṭawngṭai dân tûr min zirtîr hian entîr nei ṭawngkam a hmang mai a ni lo. (Matthaia 6:13) “Hlauhawm a lo thleng dâwn tih hriattîrna thâwm a rîk apiangin, ka rilru thunun thei tûrin Pathian Jehova ṭanpuina ka dîl a. Kan pa pawhin min rawn phone-in, min ṭawngṭaisak bawk a. Ṭawngṭaina chuan min ṭanpui tak zet a ni,” tiin Alona-i chuan a sawi a. Chu chu Bible-in: “LALPA chuan a kotu zawng zawngte chu a hnaih ṭhîn a. Tih tak zeta amah kotu zawng zawngte chu,” tia a sawi ang hi a ni.—Sâm 145:18.

Tlâng Chunga Thusawiah Isua chuan: “I ram lo thleng rawh se,” tia ṭawngṭai tûrin a hnungzuite chu a zirtîr a. (Matthaia 6:10) Pathian Ram chuan min tichhe thei lungkhamna zawng zawngte a nuaibo tawh ang a. Pathian chuan “Remna Lal,” Isua hmangin “indona chu kâwlkil thlengin a tireh” ang. (Isaia 9:6; Sâm 46:9) “[Pathian] chuan chi tam tak kârah ro a rêl ang a, . . . hnam dangin hnam dang chungah khandaih a lek tawh lo vang a, indo dân pawh an zir tawh hek lo vang. . . . Tuman an tihlau lo vang.” (Mika 4:3, 4) Chhûngkaw hlim takte chuan “inte an sa ang a, chûngah chuan an awm reng bawk ang, grêp huante an siam ang a, a rah an ei bawk ang.” (Isaia 65:21) “Chu mi khuaa awm chuan ‘ka dam lo ve,’ a ti lo vang.”—Isaia 33:24.

Tûn laiah, eng ang pawhin invêng lâwk mah ila, “beisei loh thilthlengte,” a nih loh leh a hun lo leh hmun lova awm palh avânga lo thleng tawrhna laka invên reng chu thil theih a ni ṭhîn lo. (Thuhriltu 9:11, New World Translation) Kum tam tak chhûng a lo tih tawh angin, indo te, tharum thawhna te, leh natnate chuan mi ṭhate nun a la reng a ni. A nih leh, chutiang mite chuan eng beiseina nge an neih?

Pathian Jehova chauhvin a hriat mitthi chhiar sên lohte chu an nung leh ang. Tûnah hrih chuan anni chu Pathian hriatrengnaah an muhîl a, ‘thlâna awm zawng zawngte an chhuah vek nî’ tûr an nghâk a ni. (Johana 5:28, 29) Thawhlehna chungchângah Bible chuan heti hian min tiam a ni: “Chu beiseina chu nunna thîrchakaiah kan nei a, rinawm leh nghet tak a ni,” tiin. (Hebrai 6:19) Pathianin Isua chu “mitthi zîng ata kai thovin; mi zawng zawng hnênah” chu beiseina chu a tiam a ni.—Tirhkohte 17:31.

Tûnah hrih chuan, Pathian tihlâwm tumtute pawhin lungkhamna chu an nei ang. Fing taka tih tûr dik tak tihna te, ṭawngṭaia Pathian hnaihna, leh Bible-a nakin hun beiseina a pêkte ringin, Paul-a te, Janet-i te, leh Alona-i te chuan an lungkhamna chu ṭha takin an hmachhawn thei a. An chunga a lo tih tawh ang bawkin, “beiseina Pathian chuan in rin avângin, lâwmna leh remna tinrêngin tikhat che u rawh se.”—Rom 15:13. (wp15-E 07/01)