Alona kiijtoua: “Kema nijkaki nopa sirenas, tlauel nimomajmatia uan nimantsi nia nimomanauia. Maske nimomanauijtok nojua nimajmaui. Tlaj amo niitstoskia nochaj, tlauel amo kuali eliskia pampa amo onka kampa nimomanauis. Se tonali kema ninejnemiyaya ojtipa kakistik chikauak nopa sirenas. Pejki nimochokilia uan amo ueliyaya nitlaijiyotilana. Kema panok se keski horas uelki nimoyoltlalik. Uan teipa sampa chikauak kakistik”.

Sekij nojkia majmauij maske amo itstokej kampa onka uejueyi tlauilankayotl. Uelis tlauel techtekipachoskia tlaj se tlen tochampoyouaj o se touampo kipiaskia se tlauel amo kuali kokolistli. Sekij kintekipachoua tlen ueliskia panos teipa, yeka uelis motlajtlaniaj: “¿Kenijkatsa itstosej tokoneuaj uan toixuiuaj? ¿Itstosej kampa onkas uejueyi tlauilankayotl, kampa tlasokiyo o kampa onkas kokolistli?”. Uan, ¿tlake ueliskia techpaleuis tlaj nojkia techtekipachoua nopa?

Biblia kiijtoua: “Tlen tlalnamiki nimantsi momaka cuenta intla imelak uala tlen mauilili uan momanauia” (Prov. 27:12). Ni tlauel techpaleuia. Yeka, kej tijmokuitlauiaj totlakayo, nojkia kiampa tijchiuaj ika totlalnamikilis uan toyolo. Tlaj timoyolpakiltisej ika kualantli uan tlen kinextia tlen tlauel amo kuali kichiuas tlauel ma timotekipachokaj.  Uajka, tojuantij amo tijtlachiliaj nopa pampa tijnekij timomanauisej. Kema toTeotsij kichijki totlalnamikilis, amo kinekiyaya ma timoyoliljuikaj tlen amo kuali, ya kineki ma timoyoliljuikaj tlen melauak, xitlauak uan tlen kuali (Filip. 4:8). Kiampa “toTeko tlen techmaka tlaseuilistli” techpaleuis ma timoyoltlalikaj (Rom. 15:33).

Tlaj titlaneltokasej ipan toTeotsij techpaleuis ayokmo tlauel timotekipachosej. Biblia kiijtoua kema tijpiasej tlaouijkayotl moneki nochipa timomaijtosej (1 Ped. 4:7).Uelis tikiljuisej ma techpaleui, ma techmaka tlalnamikilistli, ma tijchiuakaj san tlen kinamiki uan ma timotemachikaj ya kikaki “nochi tlen tijtlajtlaniaj” (1 Juan 5:15).

Biblia kiijtoua Satanás “tlanauatia ipan ni Tlaltipaktli” uan amo toTeotsij (Juan 12:31; 1 Juan 5:19). Jesús kinextik Diablo uelis techchiuilis tlen amo kuali, yeka kinmachtik itokilijkauaj ma tlajtlanikaj: “Xitechmanaui tlen yajaya tlen axkuali” (Mat. 6:13). Tlaj timomaijtosej techpaleuis timoyoltlalisej. Alona kiijtoua: “Kema nijkaki nopa sirenas, nikiljuia toTeotsij ma nechpaleui nimoyoltlalis. Uan noueue nechnojnotsa ipan teléfono uan sansejko timomaijtouaj. Nopa nechyoltlalia”. Yeka Biblia kiijtoua: “ToTeko itstok ininnechka nochi tlen kinotsaj” uan kiiljuiaj ika nochi ininyolo ma kinpaleui (Sal. 145:18).

Kema Jesús kinmachtik itokilijkauaj ma momaijtokaj, kiniljuik ma tlajtlanikaj: “Xiuala, xitlanauatiki” (Mat. 6:10). ToTeotsij iTlanauatijkayo kitlamiltis nochi tlen tlauel techtekipachoua. Jesucristo, nopa “Tlanauatijketl tlen temaka Tlaseuilistli” katli toTeotsij kitlapejpenijtok, “kiketsa[s] nochi tlateuijkayotl hasta kampa ontlantok nochi Tlaltipaktli” (Is. 9:6; Sal. 46:9). ToTeotsij “tetlajtolsenkauas kema onka[s] kualantli tlatlajko miak tlamantli tlakamej kampa ueli [...]. Niyon se tlali ayok motlalanas para kiteuis seyok tlali, niyon ayok aka momachtis kejatsa tlateuis”. Uan “ayok aka kintemajmatis” (Miq. 4:3, 4). “Kema se tlakatl kichijchiuas ichaj, yajaya itstos ipan ichaj [...]. Nojkia notlakauaj kitokasej xokomekamili, uan yajuantij kikuasej itlajka.” (Is. 65:21.) Uan “ayok kiijtosej para mokokouaj” (Is. 33:24).

Maske nochipa timomokuitlauisej ueliskia techpanos tlen amo kuali (Ecl. 9:11). Uelis tiitstosej kampa amo kinamiki o kema panos tlen amo kuali, kej kema kuali maseualmej mikij pampa onka uejueyi tlauilankayotl, kualantli uan kokolistli. Nelia amo kinamiki ma kinpano nopa.

Teipa tlauel miakej moyolkuisej, uan san toTeotsij kimati keskij moyolkuisej. Nama kejuak kochtokej uan Jehová kinilnamiktok. Se tonali kinyolkuis “nochi [...] tlen kintlalpachojtokej” (Juan 5:28, 29). Yeka Biblia kiijtoua: “Tijmatij temachtli toTeko [kichiuas] keja techtenkauilijtok” (Heb. 6:19). Kema toTeotsij kiyolkuik Jesucristo ‘kinextik nelia’ kinyolkuis nochi (Hech. 17:31).

Ipan ni tonali, katli kitekipanouaj toTeotsij nojkia tlauel motekipachouaj. Nopa toikniuaj Paul, Janet uan Alona kinpaleuik ayokmo tlauel motekipachosej kema kichijkej tlen kinamikiyaya, kiiljuijkej toTeotsij ma kinpaleui uan motemachijkej ipan tlen toTeotsij kiijtoua kichiuas teipa. Ni nojkia uelis techpaleuis pampa Biblia kiijtoua: “ToTeko Dios ipan tlen timochiaj, inmechmakas ueyi pakilistli, uan ueyi tlaseuilistli” (Rom. 15:13).