Alona o re: “Ge ke ekwa lešata la alamo, pelo ya ka e thoma go betha ka lebelo gomme ke kitimela lefelong leo le šireletšegilego. Eupša gaešita le ge ke le moo, ke a tshwenyega. Ga ke sa bolela ge ke le ka ntle, moo go se nago lefelo leo motho a ka ikutago go lona. Nakong e nngwe ge ke be ke sepela setarateng, ke ile ka thoma go lla ka palelwa ke go hema. Go ntšere diiri pele nka theoša maswafo. Ke moka lešata la alamo le ile thoma gape.”

Ntwa e fo ba se sengwe sa dilo tše dintši tšeo di beago batho kotsing. Ka mohlala, go tseba gore wena goba motho yo o mo ratago o swerwe ke bolwetši bjo šoro, go ka dira gore o ikwe eka o bethilwe ke pomo. Le gona go ba bangwe, go boifa bokamoso go ka baka dipelaelo. Ba bangwe ba tshwenyega ka gore: ‘Na bana ba rena goba ditlogolo tša rena ba tla phela lefaseng leo le nago le ntwa, bosenyi, tšhilafalo, go fetoga ga maemo a leratadima le mauba a malwetši?’ Re ka lebeletšana bjang le dipelaelo tše bjalo?

Ka ge a tseba gore dilo tše mpe di a direga, motho “yo bohlale o itše go bona kotsi a ikuta.” (Diema 27:12) Le gona, go etša ge re leka go itšhireletša, re ka gata le megato ya go šireletša menagano ya rena le maikwelo a rena. Boithabišo bjo bo tletšego bošoro gaešita le dipego tša ditaba tšeo di tletšego ka diswantšho tše di tšhošago di tlaleletša dipelaelong tša rena le tša bana ba rena. Go phema go bona diswantšho tšeo tše šoro ga go bolele gore re hlokomologa therešo. Modimo ga se a  hlamela menagano ya rena go dula e nagana ka dilo tše mpe. Go e na le moo, re swanetše go e tlatša ka “dilo le ge e le dife tša therešo, . . . tše di lokilego, . . . tše di sekilego, . . . tše di rategago.” Ge e ba re dira bjalo, “Modimo wa khutšo” o tla re nea khutšo ya monagano le ya pelo.—Bafilipi 4:8, 9.

Tumelo ya kgonthe e re thuša go lebeletšana le dipelaelo. Beibele e re kgothaletša gore re “phakgame ge e le mabapi le dithapelo.” (1 Petro 4:7) Re ka kgopela Modimo gore a re thuše le go re nea bohlale gotee le sebete gore re lebeletšane le maemo a rena gakaone, re kgodišegile gore “o a re kwa mabapi le se sengwe le se sengwe seo re se kgopelago.”—1 Johane 5:15.

Beibele e hlalosa gore “mmuši wa lefase le” ke Sathane, e sego Modimo, le gore “lefase ka moka le rapaletše matleng a yo kgopo.” (Johane 12:31; 1 Johane 5:19) Ka gona, Jesu o be a sa fo diriša seka sa polelo ge a be a re ruta go rapela, ge a re: “O re hlakodiše go yo kgopo.” (Mateo 6:13) Alona o re: “Nako le nako ge lešata la alamo le thoma, ke kgopela Jehofa gore a nthuše go laola maikwelo a ka. Go oketša moo, monna wa ka o a mpitša gomme a rapela le nna. Ruri go rapela go a thuša.” Go bjalo ka ge Beibele e bolela gore: “Jehofa o kgauswi le bohle bao ba mmitšago, gotee le bohle bao ba mmitšago ka go rereša.”—Psalme 145:18.

Thutong ya gagwe ya Thabeng, Jesu o rutile balatedi ba gagwe gore ba rapele, ba re: “Mmušo wa gago a o tle.” (Mateo 6:10) Mmušo wa Modimo o tla tumola ka medu dipelaelo ka moka tše kotsi. A diriša Jesu, e lego “Kgošana ya Khutšo,” Modimo o tla “fediša dintwa go fihla pheletšong ya lefase.” (Jesaya 9:6; Psalme 46:9) Beibele e re: “[Modimo] o tla ahlolela meraforafo . . . Setšhaba se ka se emišetše se sengwe tšhoša, e bile di ka se sa hlwa di ithuta ntwa. . . . Go ka se be le yo a ba tšhošago.” (Mika 4:3, 4) Malapa a thabilego a ‘tla aga dintlo a dula go tšona; a tla bjala dirapa tša merara a ja dienywa tša tšona.’ (Jesaya 65:21) Beibele gape e re: “Ga go na modudi yo a tla rego: ‘Ke a babja.’”—Jesaya 33:24.

Lehono, go sa šetšwe megato ka moka ya tšhireletšo, ga se ka mehla go kgonegago go thibela “ditiragalo tšeo di sa letelwago” goba go phema go ba lefelong le fošagetšego ge dilo tše di direga. (Mmoledi 9:11) Ntwa, bošoro le malwetši di sa tšwela pele go bolaya batho ba lokilego go etša nywageng e makgolo e fetilego. Batho bao ba se nago molato ba bolailwego ke dilo tše ba na le kholofelo efe?

Batho ba dimilione, bao palo ya bona e tsebjago ke Modimo feela, ba tla boela ba phela. Ga bjale ba robetše gomme ba tla dula ba gopolwa ke Modimo, go fihlela letšatšing leo ka lona “bohle bao ba lego mabitleng ba [tla] . . . tšwa.” (Johane 5:28, 29) Ge Beibele e bolela ka tsogo ya bahu, e re homotša ka gore: “Re na le kholofelo ye e le bjalo ka tshetledi ya sekepe ya maphelo a rena, e kgonthišeditšwego le e tiilego.” (Baheberu 6:19) Le gona Modimo o “tiišeditše batho ka moka ka ge a mo [Jesu] tsošitše bahung.”—Ditiro 17:31.

Ge e le ga bjale, gaešita le bao ba lekago go kgahliša Modimo ba tla lebeletšana le dipelaelo. Paul, Janet le Alona ba lebeletšana le dipelaelo ka katlego ka go gata megato e holago, ka go batamela kgauswi le Modimo ka thapelo le ka go aga tumelo kholofelong ya Beibele ya mabapi le bokamoso. Go etša ge a dirile boemong bja bona, “eka Modimo yo a neago kholofelo a ka le tlatša ka lethabo le khutšo ka go mmota ga lena.”—Baroma 15:13.