Alona se, “Saa mete dɔne ne ane a, me ahonle bɔ ɔ bo kɛ ɔsi na mekɔfea ɛleka mɔɔ bɛto bɔmbo a ɔnga me la. Mefea bɔbɔ a mesulo. Mewɔ alienwo a, yemɔ ɔnle kpalɛ fee. Kenle ko bie mɔɔ ɛnee melua gua ne azo la, membɔle ɔ bo kɛ mesu na ɛnee mengola ɛnwomenle die. Ɔhyɛle kpalɛ na me ahonle adɔ me azule nu. Akee dɔne ne zunle bieko.”

Ninyɛne mɔɔ ɔ nee esiane lua la anu ko a le konle. Kɛ neazo la, saa ɛnwu kɛ ɛdawɔ anzɛɛ wɔ kulovolɛ ɛnyia ewule ɛzulolɛ bie a, ɔmaa ɛte nganeɛ kɛ asɛɛ bɛdo bɔmbo bɛbɔ wɔ la. Kenle bie mɔɔ yɛ ɛzulolɛ la noko ye adwenleadwenle to bie mɔ anwo zo. Bɛdwenle nwo kɛ, ‘Asoo yɛ mra, anzɛɛ yɛ nlɔnra badɛnla ewiade mɔɔ konle, ɛtanelilɛ, evinli, maanle nu mɔɔ kakyi, nee ewulenzane wɔ nu la anu ɔ?’ Kɛ ɔkɛyɛ na yɛagyinla adwenleadwenle zɛhae anloa ɛ?

Ninyɛndane sisi la ati, “mɔɔ anye gyi ɔ ti anwo la nwu munzule na ɔtwe ɔ nwo.” (Mrɛlɛbulɛ 27:12) Kɛmɔ yɛbɔ mɔdenle yɛbɔ yɛ nwo bane la, yɛbahola yɛalua ndenle bie mɔ azo yɛabɔ yɛ adwenle nee yɛ nganeɛdelɛ nwo bane. Anyelielɛ mɔɔ basabasayɛlɛ wɔ nu yɛɛ TV zo amaneɛbɔlɛ mɔɔ nvoninli ɛzulolɛ wɔ nu la ye adwenleadwenle to yɛ nee yɛ mra nwo zo. Ninyɛne ɛhye mɔ mɔɔ yɛnrɛnlea la ɛngile kɛ yɛnrɛdwenle mɔɔ fi nu ba la anwo. Nyamenle ambɔ yɛ kɛ  yɛdwenle ninyɛndane nwo. Emomu, ɔwɔ kɛ yɛdwenle “ninyɛne mɔɔ le nɔhalɛ, . . . mɔɔ le fɔɔnwo, mɔɔ anwo te, mɔɔ le kɛnlɛma” la anwo. Saa yɛyɛ zɔ a, ‘Nyamenle ne mɔɔ maa anzodwolɛ la’ bazie yɛ adwenle nee yɛ ahonle gyɛlɛɛnye.—Felepaema 4:8, 9.

Nɔhalɛ diedi maa yɛgyinla adwenleadwenle nloa. Baebolo ne tu yɛ folɛ kɛ ‘yɛyɛ yɛ nye gyɛlɛmgbɛɛnye, na yɛahola yɛayɛ nzɛlɛlɛ.’ (1 Pita 4:7) Yɛbahola yɛazɛlɛ Nyamenle ɛkɛ ne moalɛ nee nrɛlɛbɛ na yɛanyia akɛnrasesebɛ yɛagyinla yɛ ngyegyelɛ nloa, mɔɔ yɛlɛ anwodozo kɛ “yɛbiza ye debie a ɔtie yɛ” a.—1 Dwɔn 5:15.

Baebolo ne maa yɛnwu kɛ Seetan a “sie ɛtane ewiade ɛhye” na ɔdi “ɛtane ewiade ye azo belemgbunli” a na tɛ Nyamenle ɔ. (Dwɔn 12:31; 1 Dwɔn 5:19) Ɛhye ati, mɔɔ Gyisɛse hilele kɛ yɛzɛlɛ kɛ: “Ye yɛ fi munzule nu” la fane Seetan anwo. (Mateyu 6:13) Alona se, saa dɔne ne su a, “Mesɛlɛ Gyihova kɛ ɔboa me ɔmaa menzɔ me nwo. Me hu noko fɛlɛ me na yɛyɛ asɔne. Asɔneyɛlɛ boa kpalɛ.” Kɛmɔ Baebolo ne ka la: “[Gyihova] bikye bɛdabɛ mɔɔ bɛfɛlɛ ye la amuala, ɔbikye bɛdabɛ mɔɔ bɛfɛlɛ ye nɔhalɛ nu la.”—Edwɛndolɛ 145:18.

Wɔ Gyisɛse Boka Zo Edwɛkɛhanlɛ ne anu, ɔhilele ye ɛdoavolɛma ne kɛ bɛzɛlɛ kɛ: “Wɔ belemgbunlililɛ ɛrɛla.” (Mateyu 6:10) Nyamenle Belemgbunlililɛ ne baye adwenleadwenle kɔsɔɔti avi ɛkɛ bɔkɔɔ. Nyamenle balua Gyisɛse mɔɔ le ‘Anzodwolɛ Belemgbunli’ la anwo zo yeamaa ‘bɛagyakyi konle wɔ azɛlɛ ye amuala azo.’ (Ayezaya 9:6; Edwɛndolɛ 46:9) ‘Nyamenle babua maanle maanle ne mɔ ndɛne, Maanle biala ɛnrɛva konle ɛnrɛdoa maanle, yɛɛ bɛnrɛzukoa konle ɛhonlɛ bieko. Awie ɛnrɛha bɛ ɛzulolɛ.’ (Maeka 4:3, 4) Mbusua mɔɔ anye die la ‘basisi azua adɛnla nu, bɛayɛ vanye egyinli na bɛali nuhua ma ne bie.’ (Ayezaya 65:21) “Na awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’”—Ayezaya 33:24.

Ɛnɛ, ɔnva nwo kɛ yɛbanlea yɛ nwo boɛ la, ɔnla aze kɛ yɛbazi ‘esiane mɔɔ yɛ nye ɛnla’ la adenle anzɛɛ yɛahoati kɛ yɛkɛhɔ ɛleka ɛtane wɔ mekɛ ɛtane nu. (Nolobɔvo ne 9:11) Kɛmɔ yehɔ zo ɛvoya dɔɔnwo la, konle, basabasayɛlɛ, nee ewulenzane ɛhɔ zo ɛhu kpalɛma. Anyelazo boni a menli ɛhye mɔɔ bɛnze nwolɛ bie la lɛ a?

Menli mgbe dɔɔnwo mɔɔ Nyamenle ala a ze bɛ dodo la badɛnla aze bieko. Kɛkala ɛdeɛ, bɛwɔ Nyamenle ngakyelɛ nu, kɔkpula kenle mɔɔ ‘mowuamra amuala bɛavi bɛ nla ne mɔ anu bɛavinde’ la. (Dwɔn 5:28, 29) Baebolo ne ka ewudwazo ne anwo edwɛkɛ kɛ: “Anyelazo ɛhye le kɛ sɛkɛ maa yɛ ɛkɛla. Ɔgyi pi, na ɔgyi ye kpundii.” (Hibuluma 6:19) Nyamenle ‘ɛdwazo Gyisɛse ɛvi ewule nu yeva yezi edwɛkɛ ɛhye dawua yemaa awie biala.’—Gyima ne 17:31.

Kɛkala ɛdeɛ, menli mɔɔ ɛlɛbɔ mɔdenle kɛ bɛkɛzɔ Nyamenle anye la bɛadwenledwenle. Paul, Janet, nee Alona ɛva bɛ adwenle ɛli gyima, bɛlua asɔneyɛlɛ zo bɛbikye Nyamenle, na bɛnyia diedi wɔ kenle bie anyelazo mɔɔ wɔ Baebolo ne anu la. Ɛhye ɛmaa bɛgyinla adwenleadwenle nloa. Kɛmɔ ɔboale bɛ la, ‘Nyamenle mɔɔ le yɛ nzuzuguazo la ɛmaa yɛ anyelielɛ nee anzodwolɛ wɔ yɛ diedi mɔɔ wɔ ye nu la ati.’—Wulomuma 15:13.