OMESODEL A SUOBEL ER A MEDAL TIA EL BABIER | A ROLEL E NGMO DIAK A SEBEKRENG

A Sebekreng El Kirel A Kdekudel El Tekoi

A Alona a dmu el kmo: “Sel krengesii a ngerel a debusech e ngkmal mo ouedikel a renguk me ak remurt el mo er aike el bomb shelter, engdi ngdirrek el di suebek a renguk. Ngkmal mo metacherbesuk a lsekum ak ngar rikl el diak a techellek el mo mertak. A ta er a taem e ak mirrael er a rael e mo er ngii a debusech, me ak kmal mlo medakt e longelang. Me ngmlo chuib a betok el sikang e ngmocha chelellakl a renguk. E sola e nglmuut el mo er ngii a debusech.”

A mekemad a di ta er aike el betok el kdekudel el tekoi el ngar er ngii. Ke locha dirrek el mo medakt e suebek a rengum sel bo modengei el kmo kau me a lechub e ngbetik er a rengum a mla mo smecher er a meringel el rakt. E a rebebil a kuk suebek a rengrir el kirel a ngar mederir el klebesei. Me te melatk el kmo, a rengelekir te mo kiei er a chelsel a beluulechad el mui er a kikiongel me a mekemad me a delengerenger me a ngeldechel a eltel a beluu me a bekoiueiuul el rakt? Me a leuaisei, e kede mo mekerang?

A Biblia a kmo: “A medengei a tekoi el chad a mesa tellemall a le mei e oibngii er ngii.” (Osisechakl 27:12) Me kede oleiub er kid er a tekoi el sebechel el tomellii a bedenged me a dirrek el uldesued. Tiang a uldimukl er a mubi me a chais er a TV el olecholt a kdekudel el tekoi el rullid kid me a rengeleked el mo suebek a rengud. Ngdiak el belkul a kmo kede mechitechut el chad a lsekum ngchetid el omes aika el tekoi.  A Dios a dimlak lebebid el mo blechoel el melatk a mekngit el tekoi. Ngbai kired el “melebedebek a ikel tekoi el . . . merang, . . . e melemalt, e klikiid, e olechau a bltikerreng.” A doruul el uaisei e a Dios a mo meskid a budech er a uldesued me a rengud.​—Filipi 4:8, 9.

A NGLUNGUUCH A KLOU A ULTUTELEL

A mesisiich el klaumerang a ngosukid el mo diak di lsebek a rengud. A Biblia a mengelechel er kid el mo ‘klekar, me bo le sebeched el meluluuch.’ (1 Petrus 4:7) Ngsebeched el olengit a ngeso me a ulekrael me a blekeu me bo el sebeched el outekangel, e ulterekokl a rengud el kmo “ng rongesid sel dolengit er ngii” aike el dousbech.​—1 Johanes 5:15.

A Biblia a mesaod el kmo a Satan a ngike el “merreder er tial beluulchad” me a “beluulchad el rokir a ngar eungel Ngikel Mekngit.” (Johanes 12:31; 1 Johanes 5:19) Tiaikid a uchul me a Jesus a olisechakl er kid el meluluuch el kmo: “Mosebelemam er Ngikel Mekngit.” (Mateus 6:13) A Alona a kmo: “Sel lebo er ngii a debusech e ak kulengit er a Jehovah me ngmo mengellakl er a renguk. Ngdirrek a bechik el omekedong er ngak er a dengua me aki dmak el meluluuch. Me a nglunguuch a mera el ngosukak.” Me ngua ledung a Bades el kmo: “[A Jehovah a] kmeed er tirkel rokui el omekedong er ngii, el tirkel mera er a rengrir omekedong er ngii.”​—Psalm 145:18.

A OMELTKED EL KIREL A NGAR MEDAD EL KLEBESEI

Ngar sel Cheldecheduch el Ngar er a Rois e a Jesus a ulsisecheklterir a rulebengkel el meluluuch el kmo: “A Rengedem le mei.” (Mateus 6:10) Me a Rengedel a Dios a mo okngemed a rokui el sebekreng er a rengud. Me ngokiu a Jesus el ngii a “King er a Budech,” e a Dios a mo “merrob a mekemad er a beluulchad el rokir.” (Isaia 9:6; Psalm 46:9) “Ng mo meledaes a klaititekangel er a delongelel a ikel beluu, . . . A re beluu a kmal diak lluut el mor a mekemad, ma lechub e lluut el mengedmokl el kirel a mekemad. . . . [Ng] diak a mo omekdakt er tir.” (Mika 4:3, 4) Me a telungalek a “mo toketek a blai e mo kiei er ngii; . . . Te mo dualem a sers er a bilong, e mo dmeu a rengrir er a bilong.” (Isaia 65:21, 22) “Ng mo diak a tal chad el . . . mengeremrum el kmo ng smecher.”​—Isaia 33:24.

Me nguaisei, engdi chelecha el taem e ngdiak el sebeched el oleiub er kid er a rokui el tekoi el mo er ngii, e le “taem ma techall a mor a re bek el chad.” (Olisechakl 9:11) A mekemad me a uldikel me a secher a dirk melemolem el uchul a kodellir a rungil el chad. Me ngera el omelatk a loba tirka el chad?

A diak lemochur el ildois er a rechad el di Dios a medengei a ildisir a lmuut el mo mekiis. Chelechang e te dirk mechiuaiu er a kodall e ngar er a omeltkel a Dios el mo lmuut er sel taem el “tirkel rokui el mla mad a . . . tuobed er a debellir.” (Johanes 5:28, 29) A Biblia a lmuut el chemolodid sel ledu el kmo: “Tiaikid el omelatk a otil a klengar er kid. Ng ungil el kldmokl e ulterekokl.” (Hebru 6:19) Me a Dios a mla ochotii “el mor a rokui el chad er ser a lokisii [a Jesus] er a kodall!”​—Rellir 17:31.

Me chelecha el dongiil er sel taem e tirke el melasem el oldeu er a rengul a Dios a dirk mo suebek a rengrir. A Paul me a Janet me a Alona a ungil el melilt a tekoi, e olekeed er tir er ngii el okiu a nglunguuch, e melisiich er a omeltkir el kirel a ngar mederir el klebesei me bo el sebechir el outekangel a sebekreng. Me ngkmal ungil a uleklatk el ngar er a Biblia el kmo: “Ma Dios, el uchul e kom melatk e mengiil er ngii, le beskemiu a klou el deurreng ma budech, ele kemiu el oumera er ngii.”​—Rom 15:13.

[Baks el ngar er a 9 el llel]

Ngkirem el Omes er a Toktang?

A lsekum ke mla melasem a bebil el tekoi engdi ngdirk suebek a rengum er a bek el taem, e nglocha mla mo kirem el mo omes er a toktang. E le lsekum a sebekreng me a lechub a ringelel a uldasu a di meleketek e ngolechotel a kmo a chad a socherang. Me ngsebechel a toktang el omuchel el merriter er kau el kirel tia el tekoi, e le lebebil er a taem e a sebekreng a mo er ngii el secherel a bedenged a uchul. Seikid e ngmo sebechel a toktang el ngosukau. *

[Footnote]