Alönam kënö nin: “Patrülla waqaqta wiyarqa, shonqüpis parakäreqnömi, y ratakunäpaq (tsinkakunäpaq) kaqmanmi ëwakü. Tsëchöpis mantsakashqallam këkä. Cällichönäqa mëchö mana ratakïta puëdirmi peor-raq sientikü. Juk kutim, cällichö këkaptï patrüllakuna waqar qallëkuyarqan. Tsëmi alläpa waqar shütëtapis puëdirqänatsu, y unëtaran alli sientikurqä. Peru yapëmi patrüllakuna waqar qallëkuyarqan”.

Guërra kanqan sitiukunachö täraqkunallatsu manam yarpachakïyoq kayan. Tantiyarinapaq, kastantsik o amïguntsik grävi qeshyayoq kanqanta musyarinqantsikqa itsa alläpa mantsakäratsimashwan. Wakintaqa shamoq tiempupaq pensëmi llakitsin, y itsa kënö tapukuyan: “¿Imanöraq shamoq tiempuchö wamräkuna y willkäkuna kawayanqa, guërrachötsuraq, rakchatashqa Patsachötsuraq o qeshyakuna kanqan tiempuchötsuraq?”. Tsëqa, ¿imataraq rurashwan tsënö yarpachakïkuna chämuptin?

Bibliam nin: “Yachaq nunaqa mana allikuna pasananta tantiyarirmi witikurin” (Proverbius 27:12). Kë consëjuqa alläpa allim, imanömi qeshyakunapita cuidakuntsik, tsënöllam mana alläpa yarpachakunapaqpis  cuidakunantsik. Itsa höraqa televisionchö rikantsik maqanakïta, wanutsinakïta o alläpa mantsanëpaq noticiakunata, tsëqa yarpachakïnintsikta masmi miratsin. Tsëkunata mana rikanqantsikqa yanapamäshun alläpa mana yarpachakunapaqmi. Diosqa manam llakitsikoq cösaskunata yarparänapaqtsu pensënintsikta kamashqa, sinöqa alli kaqta, limpiu kaqta y alli cösaskunata yarparänapaqmi. Tsënö rurashqaqa “alli pasaquita” qokoq Diosmi mas tranquïluta katsimäshun (Filipensis 4:8, 9).

Rikarquntsiknam, alläpa mana yarpachakunapaqqa markäkï alläpa yanapakunqanta. Bibliaqa consejakun mana allipa pasarnin Diosman mana jaqita mañakunapaqmi (1 Pëdru 4:7). Yanapamänapaq, yachëta y valorta qomänapaqmi Diosta mañakïta puëdintsik, tsënöpa alli kaqta mas ruranapaq. Y segürum kantsik “imatapis mañaconqantsicta” wiyamänapaq kaqta (1 Juan 5:15).

Bibliaqa nin, Patsachö kaqkunapa ‘mandaqninqa diablu’ kanqantam, y manam Diostsu (Juan 12:31; 1 Juan 5:19). Tsëmi Jesusqa mañakunapaq kënö yachatsikurqan: “Diablu ishquitsiyämeta munaptin ama jaqiralläyamëtsu” (Mateu 6:13). Mañakïqa mas tranquïlu sientikunapaqmi yanapamantsik. Alönam nin: “Patrüllakuna waqar qallëkuyaptinqa tranquïlu sientikunäpaqmi Diosman mañakü. Y telëfunupam qowä qayaman y ishkäkuna juntum mañakuyä”. Bibliam kënö nin: “Llapan qayakoqninkunapa lädunchömi Jehoväqa këkan” (Salmu 145:18).

‘Reynoyqui shamutsun’ nir mañakuyänampaqmi Jesusqa qateqninkunata yachatsirqan (Mateu 6:10, NTCN). Diospa Gobiernunqa llapan yarpachakïtam ushakätsinqa. “Alli Pasakïchö Kawakïta Apamoq” Jesucristutam Dios akrashqa, pëmi ‘patsapa juk kuchumpita hasta juknin kuchunyaq guërrakunata ushakätsinqa’ (Isaïas 9:6; Salmu 46:9). Diosmi “juzganqa llapan markakunata [...]. Y mananam juk nacion juk nacionpa contran [...] guërrapaq yachakuyanqanatsu”. Jina “manam pipis mantsakätsiyanqanatsu” (Miquëas 4:3, 4). Y familiakunaqa “wayikunatam rurayanqa y tsëchömi yachayanqa; üvastam muruyanqa, y wayunqantam mikuyanqa” (Isaïas 65:21). Tsë witsanqa, “manam ni pï ninqanatsu: ‘Qeshyämi’” (Isaïas 33:24).

Rasumpa kaqchöqa, mëläya alläpa yarpachakurpis manam llapantaqa altsëta puëdintsiktsu (Eclesiastes 9:11). Höraqa mana këkänantsik sitiuchö itsa këkantsik. Jina höraqa guërrachö, maqanakïchö o imëka qeshya kaptinqa culpannaq nunakunam wanuyan. ¡Tsëqa alläpa llakikïpaqmi!

Wanushqakunapita ëkaq nunakuna kawariyämunampaq kaqtaqa Diosllam musyan. Kawarimï junaq chämunqanyaqqa, Diospa yarpëninchömi këkäyan (Juan 5:28, 29). Y tsë kawarimï shuyäkïpaqmi Bibliaqa nin: ‘Alli firmi tsararamaqnintsic, imeca juc estaca barcuta watäyaptin tsararaq cuenta’ kanqanta (Hebrëus 6:19). Y tsë cumplikänampaq kaqtaqa, Dios rikätsimarquntsik Tsurin Jesucristuta kawaritsimurninmi (Hëchus 17:31).

Kanan witsanqa Diosta sirweqkunapis yarpachakuyanmi. Y tsëta venciyänampaqqa Diosman mañakuyanqan y shamoq tiempupaq änikunqankunaman markäkuyanqanmi Paulta, Janetta y Alönataqa yanapashqa. Noqantsiktapis tsënöllam yanapamënintsikta puëdin, porqui Bibliaqa kënömi nin: ‘Dios änimangantsicta shuyararnin, cananga gamcunapis alläpa cushishga alli päsacuychö cawacuyay’ (Romänus 15:13, NTCN).