Alona nin: “Sirena qapariqtinmi sonqoy phatatatan hinan chakiyraq pisin pakakunaypaq. Pakakusqaypipas cuerpoymi khatatataykun. Ichaqa huk ladopi kaspan astawanqa mancharikuni. Huk kutinmi callepi kashaqtiy sirenakuna qaparimurqan. Mana imanakuyta atispan waqayta qallarirqani, manan samariytapas atirqanichu. Unaymanñan sonqoy ‘thak’ nirqan. Hinan yapamanta sirenakuna qaparimurqan”, nispa.

Ichaqa manan chayllachu kan. Mayninqa familianchis grave onqoyniyoq kasqanta yacharuypas huk bombaq phatasqan hinaraqmi mancharichiwanchis. Wakinqa kawsay imayna kasqanta qhawarispan ninku: “¿Imaynan qhepaman kawsay kanqa? ¿Wawaypas nietoykunapas guerrakuna, contaminación, onqoykuna ukhupichu kawsanqa?”, nispa. ¿Iman yanapawasunman chay llakipakuyta atipanapaq?

Biblian nin: “Yuyayniyoqqa mana allin kaqtan reparan hinaspan pakakun”, nispa (Proverbios 27:12). ¡May allinpunin chay consejoqa! Imayna peligromantapas cuidakunchis chay hinatan sonqonchistapas yuyayninchistapas cuidananchis. Sichus maqanakuqta wañuchinakuqta qhawasun otaq sinchi llakikunapaq noticiakunata uyarisun chayqa,  ñoqanchispas wawanchiskunapas astawanmi llakipakusun. Ichaqa manan yanqachu chaytaqa nishanchis, aswanpas sonqonchista pakaykunapaqmi. Diosqa cheqaq kaypi, allin kaypi, chanin kaypi piensananchispaqmi kamawarqanchis, manan mana allin kaqkunapi piensanapaqchu. Chayta ruwasun chayqa, ‘thak-kayta qoq Diosmi’ thak kayninta qowasun (Filipenses 4:8, 9).

Ñawpaqpi yachasqanchis hina Diospi iñiymi yanapawasunman llakipakuyta atipanapaq. Biblian nin: “Makilla kaychis, Diosmanta mañakunaykichispaq”, nispa (1 Pedro 4:7). Diostan rogakunanchis tukuy imatapas allinta ruwanapaq yachayta kallpata qowananchispaq, ichaqa confianzawanmi imatapas ‘mañakunanchis’ (1 Juan 5:15).

Biblian willan ‘kay pachapi kamachikuqqa’ Saqra kasqanta, ‘lliw kay pachataq Saqraq munaychakusqan kashasqanta’ (Juan 12:31; 1 Juan 5:19). Chaymi Jesusqa yachachirqan “mana allinkaqmanta qespichiwayku” nispa mañakunapaq (Mateo 6:13). ¿Imaraykun Diosmanta mañakuna? Alona nin: “Sirenakuna qaparimuqtinmi Diosmanta mañakuni ama sinchita mancharikunaypaq. Hinaspapas qosaymi telefonopi waqyamuwan Diosmanta mañakunaykupaq. Chayñan sonqoy ‘thak’ nin”, nispa. Biblian nin: “Señor Diosqa llapa waqyakuqninkunaq sispallanpin kashan”, nispa (Salmo 145:18).

Orqo patapi yachachishaspan Jesús mañakuyta yachachirqan: “Qhapaqsuyuyki [gobiernoyki, NM] hamuchun”, nispa (Mateo 6:10). Arí, Diospa gobiernonpiqa manañan llakipakuy kanqachu. Diosmi akllarqan “Thak-kaypa Qollanan” Jesucristota ‘awqa-tinkuykunata [guerrata] qolluchinanpaq’ (Isaías 9:6; Salmo 46:9). “Diosmi askha llaqtakunaq ch’aqwayninta kuskachanqa [...]. Manan mayqen suyupas huk suyuwan maqanakunqañachu, manan awqa-tinkuypaqpas wakichikunqakuñachu. [...] Manataqmi pipas manchachiqninku kanqañachu” (Miqueas 4:3, 4). Familiakunan “wasita wasichanqaku, hinaspan chaykunapi tiyanqaku, uvastan plantanqaku, chaypa rurusqantan mikhunqaku” (Isaías 65:21). Hinaspapas “manan mayqellanpas: ‘Onqosqan kani’, ninqachu” (Isaías 33:24).

Chay tiempo chayamunankaman ichaqa imaymanata rikusun (Eclesiastés 9:11). Yaqapaschá kikinchis qonqaylla imapipas rikukusun. Askha inocente runakunan hukpa makinpi otaq guerrakunapi otaq onqospa wañupunqaku. Ichaqa, ¿iman paykunapaq kanqa?

Waranqa-waranqanpi runakunan kawsarimpunqa, Diosllan yachan hayk’a kanankuta. Chay ‘kawsarimpunanku’ p’unchaykaman Diospa yuyayninpi samashanqaku (Juan 5:28, 29). Biblia nin: “Chay suyakuymi allin churasqata allin takyasqata almanchista [otaq kawsayninchista] hap’in, imaynan anclapas barcota allinta sayachin hinata”, nispa (Hebreos 6:19). Diospunin ‘chay hina kasqanta lliw runaman reqsichin’ Jesusta wañusqanmanta kawsarichimpuspa (Hechos 17:31).

Manan pipas librechu kanchis ima llakikuypipas tarikunanchismanta. Ichaqa, ¿iman Paulta, Janet-ta, Alonatapas yanaparqan llakipakuyta atipanankupaq? Sasachakuypaq preparakuy, Diosmanta mañakuy, Diospa promesankunapi confiay ima. Chaymi qantapas yanapasunkiman, Biblian nin: “Suyakusqanchis Diosmi iñiyniykichispi hunt’aykusunkichis kusikuywan thak-kaywan ima”, nispa (Romanos 15:13).