Alonaca ninmi “Sirenacuna huacajujta ninanda manllarishpami bombacuna na chayaj utujupi pacajungapaj rini. Chaipi cashpapash manllarijunirami. Callepi cashpacarin ashtahuanmi manllarini. Shuj punllaca calleta rijujpi sirenacuna huacai callarijpimi huacajurcani. Samaita cacharitapash na usharcanichu. Ashtaca horascuna jipami calmarircani. Shinapash cutinmi sirenacunaca huacarca” nishpa.

Huaquingunaca bomba tugyanata na manllashpapash shuj familia o shuj rijsi ungunatami manllashpa causan. Cutin shujcunaca shamuj punllacunamanda pinarishpami pensarin: “Ñuca huahuacuna, nietocunaca ¿imashinashi causanga? ¿Guerracuna, ungüicunaca ashtahuan mirangacha?” nishpa. Chaicunamanda ama yapata pinaringapaca ¿imatata rurana canchi?

Bibliapica ninmi: “Ali yuyaita charij runaca, ima llaqui japinata ricushpaca anchurinmi” nishpa (Proverbios 27:12). Chaimandami, imashina ñucanchi cuerpota cuidanchi shinallata ñucanchi yuyaicunatapash cuidana canchi. Imapash manllanai peliculacunata ricushpa o noticiacunapi huañuicuna tiashcatalla ricushpaca ñucanchi huahuacunallata, ñucanchillatami manllarishpa pinarinajushun. Taita Diosca ‘[alita] rurana, tucuicunata juyana’ yuyaicunata umapi churachunmi munan.  Paica ‘casilla ali causaita caraj Taita Diosmi can’ (Filipenses 4:8, 9). Chaimandami nali, manllarinai yuyaicunata umapi churanamandaca cuidarina canchi.

Imashinami ña ricuparcanchi, shinlli feta charishpaca na yapata pinarishunllu. Bibliapica yachachinmi, llaquipi cashpaca mañashpa catinguichi nishpa (1 Pedro 4:7). Chaimandami Taita ‘Dios uyajujta’ seguro cashpa ali yuyaita cuhuai, ama manllangapaj ayudahuai nishpa mañana canchi (1 Juan 5:15).

Bibliapica ninmi, Diablomi cai mundota mandajun nishpa (Juan 12:31; 1 Juan 5:19). Chaimandami Jesusca ‘nalimanda cuidahuangui’ nishpa mañanguichi nishpa yachachirca (Mateo 6:13, NM). Taita Diosta mañashpaca tranquilomi sintirishun. Alonaca ninmi: “Sirenacuna huacai callarijpica Taita Diostami calmaringapaj ayudahuai nishpa mañani. Ñuca cusapash telefonopi cayajpimi ishcandi Taita Diosta mañashpa alillata sintirini” nishpa. Bibliapica ninmi: “Mandaj Diosca, tucui yuyaihuan paita mañajcunata ayudangapaca ladopimi” can nishpa (Salmo 145:18).

Jesusca paipa catijcunataca nircami, Taita Diostaca ‘can mandanaca ucha chayamuchun’ nishpa mañanguichi nishpa (Mateo 6:10). Taita Diospa Reino mandashpami tucui preocupaciongunata tucuchinga. ‘Casilla ali causaita caraj’ Jesustami Taita Diosca cai pachapi tucuilla jatun macanajuicunata tucuchichun agllashca (Isaías 9:6; Salmo 46:9). Taita Diosmi ‘gentecunapa fiñanajushcataca tucuchinga. Shuj llactahuan caishuj llactahuan macanajunapash na tiangachu. Macanajunata yachajunapash na ashtahuan tiangachu. Pipash na manllachingachu’ (Miqueas 4:3, 4). Familiacunapash ‘huasicunata shayachishpami chaipi causanajunga. Uvas chagrata tarpushpami chaipi fucushcata micushpa causanajunga’ (Isaías 65:21). Ashtahuangarin pipash na ungungachu (Isaías 33:24).

Cunanbica ama yapata pinaringapaj cuidarijpipash, huaquinbica na cana pushtucunapi cashcamandami llaqui apanchi (Eclesiastés 9:11). Huaquinbicarin napash culpata charijcunarami guerracunapi o imapash nali ungüicunapi japi tucushpa huañun. Shinapash ¿imata paicunahuanga pasanga?

Ashtaca millón gentecunaca Jehová Diospa yuyaipimi can. Chaimandami paicunaca causaringa (Juan 5:28, 29). Mashnacuna causarinataca na yachanchichu. Shinapash huañushcacuna causarinata seguro cachunmi Bibliapica nin: “Chashna shuyanami, barcota jirru charijunshna ñucanchi almataca, shinllitapacha charijun” nishpa (Hebreos 6:19). Ashtahuangarin huañushcacuna causarinata seguro cachunmi Taita Diosca Jesusta causachirca (Hechos 17:31).

Cunanbica Taita Diosta sirvinajujcunapashmi yapata pinarin. Shinapash Paulpa, Janetpa, Alonapa ejemplota catishpami imata ruranata yachana canchi, Jehovata mañana canchi, shamuj punllacunapi Taita Dios ali causaiguta caranata yarishpami na yapata pinarina canchi. Bibliapica ninmi, ‘japigrinata yarichimujuj Taita Diosmi paita crishcamanda cushijuita, casilla ali causaitapash ninanda caranga’ nishpa (Romanos 15:13).