Alona mbutaka ate: “Etena kakamoke londjo la losiba la sirène, lakatatɛ mboka wɔma ndo lakalawɔ lo dihole diatoyashɛka anto oma lo waa bɔmbɛ. Koko lakatetemala ndjakiyanya polo lɛkɔ. Koko etena kakimi l’andja aha la dihole dia ndjashɛ mbakamaleke ndjakiyanya. Etena kakamatakɛndakɛndaka lo shinga lakatatɛ mbida ekoko ndo taakamakoke mpɛnga. Dui sɔ diakɔshi wenya efula dia dimi ndjɔlama ki. Oma laasɔ losiba la sirène lakatatɛ mbida nto.”

Awui wa ata wekɔ l’atei w’awui efula wa waale. Ɛnyɛlɔ, naka wambokoshola kana wamboshola onto ɔmɔtshi lokayɛ ngandji la hemɔ ka wolo, kete dui sɔ koka kokiyanya efula. Ndo le anto akina, wɔma wendana la nshi yayaye koka mbaela ekiyanu. Vɔ ndjambolaka ɔnɛ: ‘Onde anaso kana ekana awɔ wayɔsɛna lo andja wa ata, awui wa ngala, olanyelo wa hiɛlɛlɛ, etshikitanu wa djungudungu ndo hemɔ?’ Ngande wakokaso ndɔshana la ekiyanu wa ngasɔ?

Lo mbeya dia akambo wa kɔlɔ tokomɛka, ‘kanga yewo atɛnaka waale, ko nde atoyashɛka.’ (Tukedi 27:12) Oko wasalaso la wolo dia kokɛ demba diaso, sho koka nsala awui amɔtshi dia sho ndjakokɛ lo yimba. Tɔkɛnyɔ t’awui wa ngala ndo kaanga sango yoludi la esato wa wɔma tokonyaka dia sho l’anaso nyomoleka monga l’ekiyanu. Mbewɔ esato w’awui wa ngala halembetshiya dia sho hateye kɛnɛ kele mɛtɛ. Nzambi kototonga dia timba taso ndola l’awui  wa kɔlɔ. Koko sho pombaka ndodia timba taso la “akambo tshɛ wele mɛtɛ, . . .  wosembwe, . . . wele pudipudi, . . . wakoka nangema.” Naka sho nsala ngasɔ, kete “Nzambi ka wɔladi” ayotosha wɔladi wa lo yimba ndo wa l’etei k’otema.—Filipɛ 4:8, 9.

Mbetawɔ ka mɛtɛ tokimanyiyaka dia sho ndɔshana l’ekiyanu. Bible tɔlɔmbaka dia sho mongaka “wonya tshɛ suke dia nɔmba.” (1 Petero 4:7) Sho koka nɔmba Nzambi ekimanyielo kande, lomba ndo dihonga dia sho nsala kɛnɛ kele ɔlɔlɔ tele l’eshikikelo “dia nde tokɛka lo kɛnɛ tshɛ kɔɔlɔmbaso.”—1 Joani 5:15.

Bible nembetshiyaka dia aha Nzambi, koko Satana mbele “owandji w’andja ɔnɛ” ndo ɔnɛ “andja w’otondo wekɔ lo nɔmbɔma oma le Kanga kɔlɔ.” (Joani 12:31; 1 Joani 5:19) Diakɔ diele, Yeso akatetsha dia sho nɔmbaka ɔnɛ: “Ototshungole oma le Kanga kɔlɔ.” (Mateo 6:13) Alona mbutaka ɔnɛ: “Etena tshɛ katatɛ losiba la sirène mbida, dimi nɔmbaka Jehowa dia nde kimanyiyami dia dimi ndjalama. Ndo nto, omɛmi la ngandji mbelɛkami ndo nɔmbaka la mi kaamɛ. Dɔmbɛlɔ mɛtɛ kimanyiyaka.” Diakɔ diata Bible ɔnɛ: ‘Jehowa ekɔ suke la wanɛ tshɛ wɔɔtɛndɛ la otema ɔtɔi.’—Osambu 145:18.

Lo Dako diande dia lo dikona, Yeso aketsha ambeki ande dia nɔmbaka ɔnɛ: “Diolelo diayɛ diaye.” (Mateo 6:10) Diolele diaki Nzambi diayonya ekiyanu tshɛ lo pondjo. Oma lo tshimbo ya Yeso lele “Uwandji wa ki,” Nzambi ayokumiya ‘ata lo nkɛtɛ k’otondo.’ (Isaya 9:6; Osambu 46:9) ‘Nde [Nzambi] ayela kilombo l’atei wa wedja efula . . . Wodja ɔmɔtshi hawotɛmbɛ wodja okina lokuwa la ta, ndo vɔ hawoteka ta nto. . . . Ndooko onto layowaotsha wɔma.’ (Mika 4:3, 4) Nkumbo y’ɔngɛnɔngɛnɔ “wayuhika mvudu, wayudjaseka loko; wayune dikambo di’elua, wayolekaka elua w’uma loko.” (Isaya 65:21) ‘Ndo ndooko onto lodjashi lɛkɔ layota ate: Lekɔ la hemɔ.’—Isaya 33:24.

Ɛlɔ kɛnɛ, oyadi kɛnɛ tshɛ kasala anto dia ndjakokɛ, hongaka nshi tshɛ dui dia wɔdu dia ndjakokɛ oma lo ‘awui wa shashimoya.’ (Undaki 9:11) Aya ɛnɔnyi nkama wele ata, awui wa ngala, ndo wa hemɔ wekɔ lo ntetemala la ndjaka anto w’ɛlɔlɔ. Ko naa elongamelo kele l’anto waha la onongo asɔ?

Miliyɔ y’anto waheyama mbadia wele paka Nzambi oto mbeya lofulo lawɔ wayɔsɛna nto. L’etena kɛnɛ vɔ wekɔ lo djɔ, wekɔ lo namema lo yimba yaki Nzambi ya kokele polo lushi lele “wanɛ tshɛ wele lo waombo wohɔma . . . wayotomba.” (Joani. 5:28, 29) Lo ntɛkɛta dikambo dia eolwelo, Bible toshikikɛka ɔnɛ: “Elongamelo kɛsɔ kele la so, kele oko longo la masuwa le nsɛnɔ yaso kekɔ nge, hasukasuka.” (Hɛbɛru 6:19) Ndo Nzambi ‘akasha anto tshɛ elongamelo lo mbolola Yeso oma lo nyɔi.’—Etsha. 17:31.

Ɛlɔ kɛnɛ, kaanga wanɛ wasala la wolo dia ngɛnyangɛya Nzambi wayohomana la ekiyanu. Lo salaka kɛnɛ kahombama, mbuta ate ndjasukaya la Nzambi lo dɔmbɛlɔ, ndo monga la mbetawɔ lo elongamelo kasha Bible dikambo dia nshi yayaye, Paul, Janet ndo Alona vɔ tshɛ wekɔ lo ntondoya ekiyanu lo yoho ya dimɛna. Oko wakandaakimanyiya lo ekiyanu awɔ, “Nzambi kasha elongamelo anyolodia l’ɔngɛnɔngɛnɔ ndo la wɔladi lo woho wayaɛkɛnyu le nde.”—Rɔmɔ 15:13.