Alona wangukamba kuti: “Ndati ndavwa kumba kwa alamu, mtima ungwamba kutchimbiya ndipu ndinguthaŵiya kumalu ngakubisamiyaku mabomba. Chinanga kuti ndingubisama kweni ndafipanga mbwenu mtima. Ndafipanga so mtima ukongwa asani nde pamalu ngambula kuvikilirika. Zuŵa linyaki ndayendanga m’msewu ndipu alamu yati yayamba kumba, ndingwamba kuliya kweniso ndatondekanga kututa. Pangujumpha maola nganandi kuti mtima uje m’malu. Pavuli paki, alamu yingwamba so kumba.”

Nkhondu nchimoza mwa vinthu vakofya ukongwa vo ŵanthu afipa navu mtima. Mwakuyeruzgiyapu, vipweteka mtima ukongwa asani isi pamwenga wakwanjiwa widu wasanirika ndi nthenda yakofya. Anyaki afipa mtima chifukwa cha vinthu vo vichitikengi m’nthazi. Yiwu afipa mtima kuti ŵana ŵawu pamwenga azuku ŵawu akuliyengi m’charu cho mwe nkhondu, uchigaŵenga, kunangika kwa chilengedu, ndipuso matenda ngakofya. Kumbi tingachita wuli kuti tileki kusuzgika maŵanaŵanu ndi vinthu venivi?

Pakuti tiziŵa kuti vinthu viheni vichitika, tikhumbika kuvwiya chenjezu lakuti “asani wakuchenje wawona soka wabisama.” (Nthanthi 27:12) Nge mo titijivikiliya kuti tileki kupwetekeka, ndimu so tingachitiya kuti tivikiliyi maŵanaŵanu ngidu. Asani tiwonere masaza nga ndewu kweniso vinthu vakofya vingachitiska kuti isi kweniso ŵana ŵidu asuzgikengi ukongwa maŵanaŵanu. Chinanga kuti tiziŵa kuti vinthu ivi vichitika, kweni tikhumbika  cha kuviwonere m’mavidiyo pamwenga m’manyuzipepala. Chiuta wangupanga maŵanaŵanu ngidu kuti ngasungengi vinthu viheni cha. Mwaviyo, maŵanaŵanu ngidu ngatenere kusunga “vinthu vauneneska, . . . vaurunji, . . . vituŵa, . . . vakwanjika.” Asani tichita ivi, Chiuta watiwovyengi kuti tije ndi chimangu cha m’maŵanaŵanu ndi m’mtima.​—Ŵafilipi 4:8, 9.

Chigomezgu chakukho chititiwovya kuti tileki kufipa mtima ukongwa. Bayibolu lititichitiska kuti “tingazerezganga cha kuromba.” (1 Petro 4:7) Titenere kupempha Yehova kuti watiwovyi ndipuso kuti watipasi zeru ndi chiganga kuti timalani ndi suzgu yo takumana nayu ndipu tikhumbika kuja ndi chigomezgu chakuti “watuvwa vosi vo tipempha.”​—1 Yohane 5:15.

Bayibolu likamba kuti Satana ndiyu “wawusa charu ichi,” ndipu “charu chosi che m’manja mwa muheni mwenuyu.” (Yohane 12:31; 1 Yohane 5:19) Mwaviyo, mazu ngo Yesu wangukamba ngalongo kuti Satana waliku nadi. Yesu wangukamba kuti: Titaskeni ku muheni yo.” (Mateyu 6:13) Alona wangukamba kuti: “Asani alamu yakutcheŵeska yaleka kumba, ndipempha Yehova kuti wandiwovyi kuti ndileki kuchita mantha. Kweniso murumu wangu watindimbiya foni kuti tirombe limoza. Kukamba uneneska, kuromba kutovya ukongwa.” Ivi viyanana waka ndi vo Bayibolu likamba, kuti: “Yehova wepafupi ndi wosi wo atimudana mu uneneska.”​—Sumu 145:18.

Pa Upharazgi waki wa Paphiri, Yesu wangukambiya akusambira ŵaki kuti arombengi kuti: “Ufumu winu uzi.” (Mateyu 6:10) Ufumu waku Chiuta wazamutuzgiyapu limu vinthu vosi viheni vo vititifipiska mtima. Kuporote mwaku Yesu yo ndi “Fumu ya Chimangu,” Chiuta “wazamumaliska nkhondu pacharu chosi chapasi.” (Yesaya 9:6; Sumu 46:9) Chiuta “wazamuyeruzga ŵanthu . . . Mtundu wa ŵanthu wazamunyamuwa so cha lupanga kuti upumani ndi mtundu unyaki, azamusambira so nkhondu cha. . . . ndipu pazamuŵavi wakuŵawofya.” (Mika 4:3, 4) Mabanja ngazamukondwa ndipu ‘ngazamuzenga nyumba ndi kujamu, ngazamulima minda ya mphereska ndi kurya vipasu vaki.’ (Yesaya 65:21) “Palivi wakuja m’charu cho yo wazamukamba kuti ‘ndatama.’”​—Yesaya 33:24.

Mazuŵa nganu, chinanga kuti titcheŵeskeka kuti tileki kukumana ndi ngozi, kweni tikumana navu mbwenu vinthu vamabuchibuchi chifukwa cha kusanirika pamalu ngaheni kweniso pa nyengu yiheni. (Wakutaula 9:11) Kwamba kali, ŵanthu anandi ambula kunanga atufwa chifukwa cha matenda, nkhaza ndipuso nkhondu. Kumbi ŵanthu ŵenaŵa ŵe ndi chilindizga wuli?

Chiuta wakumbuka ŵanthu mamiliyoni nganandi wo akufwa ndipu azamuja so ndi umoyu. Pa nyengu yasonu, yiwu aja ŵaka nge agona ndipu Chiuta watiŵakumbuka mpaka pa nyengu yo “wosi wo ŵe mumiwunda yachikumbusku . . . azamutuwamu.” (Yohane 5:28, 29) Bayibolu lititikambiya vakukwaskana ndi chiyuka kuti: “Chilindizga cho tenachu chenge ndondowa ya umoyu, nchauneneska ndipuso nchakukho.” (Ŵahebere 6:19) Chiuta “wapereka chisimikizgu ku ŵanthu wosi mwakumuyuska [Yesu] kwa akufwa.”​—Machitidu 17:31.

Mazuŵa nganu, chinanga mbanthu wo achita vinthu vakukondwesa Chiuta asuzgika mbwenu maŵanaŵanu. Kuromba kwaku Chiuta, kugomezga vo Bayibolu likamba vakukwaskana ndi kunthazi kwawovya Paul, Janet ndi Alona kuti aleki kusuzgika ukongwa maŵanaŵanu. Nge mo venge ndi Paul, Janet ndi Alona, mphanyi “Chiuta yo wapereka chigomezgu wakupaskani likondwa ndi chimangu chikulu chifukwa cha kugomezga iyu.”​—Ŵaroma 15:13.