“Kon nakakabati ako hin uwang han sirena, ginkukulba dayon ako ngan nadalagan ngadto ha paksol o taragoan kon may nabuto nga bomba,” siring ni Alona. “Pero bisan didto, ginkukulba la gihapon ako. Kondi mas grabe ito kon aada ako ha gawas, diin waray ako natatagoan. Ngani usa ka beses, samtang nagbabaktas ako ha kalsada, nagtinangis ako ngan diri makaginhawa. Naglabay anay an pipira ka oras antes ako kumalma. Katapos, umuwang na liwat an sirena.”

An girra usa la han damu nga hinungdan han peligro. Pananglitan, an paghibaro nga ikaw o an usa han imo hinigugma may makamaratay nga sakit puropariho liwat hin naigo ka hin bomba. Ngan an iba liwat nababaraka mahitungod han ira magigin tidaraon. Nababaraka hira, ‘Magdadaku ba an amon mga anak, o an ira mga anak, ha kalibotan nga kalyap an girra, krimen, polusyon, duro nga pagbuburobag-o han klima, ngan epidemya?’ Paonan-o naton aatubangon an sugad nga mga kabaraka?

Tungod kay maaram nga may mahitatabo nga maraot, “an tawo nga mainalam-agamon [o, maaramon] nakakakita han karaotan, ngan naluok.” (Proberbios 27:12) Ngan sugad la nga ginpapanalipdan naton an aton pisikal nga kahimsog, may ginhihimo liwat kita basi panalipdan an aton mental ngan emosyonal nga kahimsog. An madarahog nga mga kaliawan ngan bisan an makangingirhat nga mga news nakakadugang han aton mga kabaraka ngan ha kabaraka han aton mga anak. An paglikay hini diri nangangahulogan nga ginbabalewaray naton an reyalidad han kinabuhi. Waray himoa han Dios an aton utok basi maghinunahuna  hin maraot. Lugod, sadang naton ito pun-on hin “bisan ano nga totoo, . . . matadong, . . . putli, . . . makapaaghat han gugma.” Kon bubuhaton naton ito, “an Dios han kamurayawan” maghahatag ha aton hin kamurayawan ha hunahuna ngan kasingkasing.—Filipos 4:8, 9.

An tinuod nga pagtoo nabulig ha aton nga maatubang an kabaraka. An Biblia nag-aaghat ha aton nga “magin mabinantayon may kalabotan ha mga pag-ampo.” (1 Pedro 4:7) Mahimo kita maghangyo ha Dios hin bulig, kinaadman, ngan kaisog basi maatubang ha pinakamaopay nga paagi an aton sitwasyon, nga nasarig nga “namamati hiya ha aton anoman an aton gin-aaro.”—1 Juan 5:15.

An Biblia nasiring nga hi Satanas “an magmarando hini nga kalibotan,” diri an Dios, ngan “an bug-os nga kalibotan kontrolado han gahum han usa nga maraot.” (Juan 12:31; 1 Juan 5:19) Salit diri simboliko nga mga pulong an gin-gamit ni Jesus ha pag-ampo nga iya igintutdo ha aton: “Talwasa kami tikang ha usa nga maraot.” (Mateo 6:13) “Kon nababatian ko an uwang han sirena, nag-aampo dayon ako kan Jehova nga buligan ako nga makontrol an akon emosyon,” siring ni Alona. “Gintatawagan liwat ako han akon hinigugma nga bana ngan nag-aampo kami. Daku gud nga bulig an pag-ampo.” Sugad la han ginsisiring han Biblia: “Hi Jehova hirani ha ira ngatanan nga nagsasangpit ha iya, ha ira ngatanan nga nagsasangpit ha iya hin kamatuoran.”—Salmo 145:18.

Ha Sermon ha Bukid, gintutdoan ni Jesus an iya mga sumurunod nga mag-ampo: “Kumanhi unta an imo Ginhadian.” (Mateo 6:10) Bug-os nga wawad-on ha kadayonan han Ginhadian han Dios an ngatanan nga kabaraka. Pinaagi kan Jesus, an Prinsipe han Kamurayawan, ‘papaukyon han Dios an mga pag-away tubtob ha kataposan han tuna.’ (Isaias 9:6; Salmo 46:9) An Dios ‘maghuhukom ha damu nga katawohan. An nasud diri mawaay hin kampilan patok ha nasud, diri na man hira mag-aaram han away. Waray bisan hin-o nga maghahadlok ha ira.’ (Mika 4:3, 4) An malipayon nga mga pamilya “magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini.” (Isaias 65:21) “Ngan an umurukoy diri masiring: Ako masakit.”—Isaias 33:24.

Yana, bisan pa han aton duro nga paghinirot, diri naton pirme malilikyan an diri ginlalaoman nga mga panhitabo o mahingada ha sayop nga lugar ha sayop nga panahon. (Eklesiastes 9:11) Sugad han nahitatabo ha sulod hin mga siglo na, an girra, kamadarahog, ngan sakit padayon nga nagigin hinungdan han kamatayon han mag-opay nga tawo. Ano an paglaom hinin inosente nga mga biktima?

An minilyon nga tawo nga nagkamatay, nga Dios la an maaram han espisipiko nga kadamu, mabubuhi utro. Yana, sugad hin nakaturog la hira, nagpapabilin ha hingpit nga panumdoman han Dios tubtob ha panahon nga “an ngatanan nga aadto ha handumanan nga mga lubnganan . . . mababanhaw.” (Juan 5:28, 29) May kalabotan ha pagkabanhaw, an Biblia nagpapasarig: “Ini nga aton paglaom pariho hin angkla han kalag, nga sigurado ngan marig-on.” (Hebreo 6:19) Ngan an Dios naghatag ha ‘ngatanan nga tawo hin kasigurohan hini tungod kay iya ginbanhaw hi Jesus.’—Buhat 17:31.

Yana, bisan adton nangangalimbasog nga mapalipay an Dios makakaeksperyensya hin mga kabaraka. Nalamposan nira Paul, Janet, ngan Alona an mga kabaraka pinaagi ha paggamit hin praktikal nga kinaadman, paghirani ha Dios pinaagi ha pag-ampo, ngan pagkaada hin pagtoo ha mga saad ha Biblia para ha tidaraon. Sugad la nga ginbuligan hira han Dios, “hinaot an Dios nga naghahatag hin paglaom maghatag ha iyo hin daku nga kalipay ngan kamurayawan pinaagi han iyo pagsarig ha iya.”—Roma 15:13.