Alona ŵatite, “Pambikene lisegwe lyakulosya kuti cikuwulice mabomba, mtima wangu ukusawutuka mnope ni ngusatilila kukuuŵa. Nambo atamose pandili kweleko ngusalagape nganisyo mnope. Yikusaŵa yakusawusya mnope pangusoŵa malo gakutilila. Lisiku line ndili mkwenda mwitala, lisegweli lyatandite kupikanika ni natandite kulila mnope mwati papitile maawala gejinji mkanindondoŵe.”

Ngondo jili cimo mwa yindu yakogoya. Mwambone, kumanyilila kuti wawojo kapena jwakunonyelwa jwawo akwete ulwele wakogoya mpaka kwatendekasye kulipikana mpela kuti ŵagombele wuti. Soni ŵane akusalaga nganisyo ligongo lyakogopa yamsogolo. Mwati akusaliwusyaga kuti, Ana yindu yicajendela uli ŵanace, soni yisukulu yetu? Ana cacitama m’cilambo cangondo, cesakale, cayilwele, soni cana yakusawusya yejinji? Kwende tulole yampaka tutende kuti tumalane ni yakulagasya nganisyoyi.

Ligongo lyakumanyilila kuti yakusakala yikusatendekwa, “mundu jwakalamuka paciweni cindu cakogoya akusajuŵa.” (Miyambo 27:12) Mwayiŵelele kuti tukusalingalinga kuteteya cilu cetu, tukusosekwasoni kuteteya nganisyo syetu. Mang’asi gakuwulasyana soni ngani syakulosya yiwulili yakusakala yikusajonjecesya kulaga nganisyo. Kuŵambala kulolela yiwulili yakuwulasyana nganikuŵa kwakwanila. Mlungu nganatupanganya kuti tuganicisyeje yindu yakusakala.  Mmalo mwakwe ŵatupanganyisye kuti tuganicisyeje ya “yiliyose yayili yakuwona, . . .  yakulungama, . . . yeswela, . . . yakunonyelesya.” Patukutenda yeleyi, “Mlungu jwamtendele” cacitupa mtendele wa mumtima soni munganisyo.—Afilipi 4:8, 9.

Cikulupi cisyesyene cikusatukamucisya kumalana ni kulaga nganisyo. Baibulo jikusatulimbikasya kuti ‘tuŵeje mesope kuti tupakombole kupopela.’ (1 Petulo 4:7) Mpaka tum’ŵende Mlungu kuti atukamucisye, atupe lunda soni macili gakuti tukombole kumalana ni yakusawusya yatukusimana nayo, soni tukulupilileje kuti “jwalakwe akusatupikana patukum’ŵenda cilicose.”—1 Yohane 5:15.

Baibulo jikusasala kuti “jwakulamulila jwa cilamboci,” ali Satana ngaŵaga Mlungu, soni jikusati “cilambo cosope cili m’miyala mwa jwakusakala jula.” (Yohane 12:31; 1 Yohane 5:19) M’yoyo, Yesu paŵasasile kuti tupopeleje kuti, “Atakulupusye kwa jwakusakalajo,” ŵasalaga ya yakutendekwa yisyesyene ngaŵa yakwamba kuwanicisya. (Matayo 6:13) Alona ŵatite, “Palitandite lisegwe lyakulosya kuti cikuwulice mabomba, ngusam’ŵenda Yehofa kuti angamucisye kuwusimana mtima. Ŵamkwangu akusambilanga ni akusapopela tuli yalumo. Lipopelo likusakamucisya kwabasi!” Baibulo jikusati, “Yehofa ali ciŵandika wosope ŵakuŵilanjila pa jwalakwe. Jwalakwe ali ciŵandika wosope ŵakusam’ŵilanga mu usyesyene.”—Salimo 145:18.

Mu ngani jaŵaŵecete petumbi, Yesu ŵajiganyisye ŵakumkuya ŵakwe kupopela kuti, “Ucimwene wawo uyice.” (Matayo 6:10) Ucimwene wa Mlungu ucityosya kulaga nganisyo kwamtundu wuliwose. Kupitila mwa Yesu, jwali “Mwenye jwa Mtendele,” Mlungu ‘cacimasya ngondo mpaka kumbesi kwa cilambo capasi.’ (Yesaya 9:6; Salimo 46:9) ‘[Mlungu] cacijilamula mitundu ja ŵandu . . . Mtundu wa ŵandu ngasiwunyakula upanga kulimbana ni ujakwe, soni ngasalijiganyasoni ngondo. . . . Ngasipapagwa jwakwajogoya.’ (Mika 4:3, 4) Maŵasa gakusangalala ‘gacitaŵa nyumba ni kutamamo, gacilima migunda ja mipeleya ni kulya yisogosi yakwe. (Yesaya 65:21) “Ŵakutama mwelemo pangali jwacaciŵeceta kuti: ‘Une ngulwala.’”—Yesaya 33:24.

Atamose kuti Moŵa agano pana yindu yejinji yakutukalamusya, nambo ngaŵa mkuŵambala “yakutendekwa yangayijembeceya” ndaŵi syosope, kapena kuŵambala kutama pamalo gangaŵajilwa pandaŵi jangaŵajilwa. (Mlaliki 9:11) Ngondo, kuwulasyana, soni yilwele yikwendelecelape kuwulaga ŵandu. Ana ŵandu ŵangalemwaŵa akwete cembeceyo catuli?

Ŵandu mamiliyoni gejinji ŵaŵawile cacikolasoni umi. Apano, Yehofa akwakumbucila jemanjaji mpaka pandaŵi jele “ŵandu ŵali m’malembe gacikumbucilo . . . cacijimuka.” (Yohane 5:28, 29) Pakwamba ya kwimuka ku ŵawe, Baibulo jikusati, “Cembeceyo catukweteci cili mpela nangula jwa umi wetu soni cili cisyesyene ni cakulimba.” (Ahebeli 6:19) Mlungu “ŵapelece umboni kwa ŵandu wosope mwakumjimusya [Yesu] ku ŵawe.”—Masengo 17:31.

Ndaŵi ajino, atamose ŵandu ŵakusalingalinga kumsangalasya Mlungu akusasimana ni yakulagasya nganisyo. Paul, Janet, soni Alona akumalana ni yindu yayikusalagasya nganisyo mwakutenda yindu yampaka yakamucisye. Jemanjaji akusam’ŵandicila Mlungu mwipopelo, soni akusalimbisya cikulupi cawo pa cembeceyo ca yindu yaŵayisasile m’Baibulo. “Mlungu jwakusapeleka cembeceyo ŵape cisangalalo soni mtendele wosope ligongo lyakumkulupilila kwawo” mpela muŵatendele ni Paul, Janet, soni Alona.—Aloma 15:13.